زاڭ جوباسى 2019-2023 جىلدارعا ارنالعان ناقتىلانعان ماكروەكونوميكالىق كورسەتكىشتەر نەگىزىندە ازىرلەندى جانە قازاقستان رەسپۋبليكاسىنىڭ تۇڭعىش پرەزيدەنتى-ەلباسىنىڭ «نۇر وتان» پارتياسىنىڭ XVIII سەزىندە, مەملەكەت باسشىسىنىڭ جىل سايىنعى جولداۋلارىندا ايتقان تاپسىرمالارىن, «قازاقستان رەسپۋبليكاسىنىڭ مەملەكەتتىك باسقارۋ جۇيەسىن ودان ءارى جەتىلدىرۋ جونىندەگى شارالار تۋرالى» پرەزيدەنت جارلىعىن ىسكە اسىرۋعا باعىتتالعان.
الەمدەگى قازىرگى جاعدايدى, سىرتقى نارىقتارداعى كورسەتكىشتەردى جانە 2018 جىلعى ەكونوميكالىق دامۋ قورىتىندىلارىن ەسكەرە وتىرىپ, قازاقستان رەسپۋبليكاسىنىڭ 2019-2023 جىلدارعا ارنالعان الەۋمەتتىك – ەكونوميكالىق دامۋ بولجامى اياسىندا 2019 جىلعا ارنالعان ماكروەكونوميكالىق كورسەتكىشتەردىڭ بولجامى ناقتىلاندى.
وسىلايشا, بازالىق ستسەناريدە 2019 جىلى مۇناي باعاسى باررەلىنە 55 اقش دوللارى دەڭگەيىندە ساقتالدى.
2019 جىلى نومينالدى جالپى ىشكى ءونىم 64 335,0 ملرد تەڭگە كولەمىندە باعالانادى, بۇل 2018 جىلعى قاراشادا ماقۇلدانعان كورسەتكىشتەن 323,5 ملرد تەڭگەگە ارتىق. جان باسىنا شاققانداعى جالپى ىشكى ءونىم 9 409,2 اقش دوللارىن قۇرايدى. جالپى ىشكى ءونىمنىڭ ناقتى ءوسىمى 3,8 % دەڭگەيىندە ساقتالدى.
ۇلتتىق بانك جىلدىق ينفلياتسيانىڭ بۇرىن جوسپارلانعان 4-6% شەگىندەگى ماقساتتى ءدالىزىن ساقتاپ قالدى.
2019 جىلعا ارنالعان رەسپۋبليكالىق بيۋدجەتتىڭ كىرىس بولجامى (ترانسفەرتتەر ءتۇسىمىن ەسەپتەمەگەندە) 6 986,3 ملرد.تەڭگە سوماسىندا بەلگىلەندى.
2019 جىلعا ارنالعان ترانسفەرتتەردىڭ تۇسىمدەرى 621,0 ملرد تەڭگەگە ۇلعايىپ, جالپى سوماسى 3 466,1 ملرد تەڭگەنى قۇرايدى.
2019 جىلعا ارنالعان رەسپۋبليكالىق بيۋدجەت تۇزەتىلىپ, 1 168,8 ملرد تەڭگەگە ۇلعايدى جانە بيۋدجەتتىڭ شىعىستارى 11 895,1 ملرد تەڭگە سوماسىندا كوزدەلىپ وتىر.
كورسەتىلگەن ۇلعايتۋلاردى, سونداي-اق قاراجاتتى قايتا ءبولۋدى ەسكەرە وتىرىپ, رەسپۋبليكالىق بيۋدجەتتىڭ شىعىستارى:
- «الەۋمەتتىك قامقورلىق» جاڭا الەۋمەتتىك شارالارعا 444,3 ملرد تەڭگە سوماسىندا;
- قازاقستان رەسپۋبليكاسى پرەزيدەنتىنىڭ «باسەكەگە قابىلەتتىلىكتى ارتتىرۋ جونىندەگى كەيبىر شارالار تۋرالى» تىكەلەي ينۆەستيتسيالار قورىن قۇرۋعا ارنالعان جارلىعىن ىسكە اسىرۋعا 370,0 ملرد تەڭگە سوماسىندا;
- «جاستار جىلى» اياسىنداعى شارالارعا 24,6 ملرد تەڭگە سوماسىندا;
- وڭىرلىك ينفراقۇرىلىمدى دامىتۋ جونىندەگى شارالارعا;
- ەلدىڭ بۇرىن قابىلدانعان مىندەتتەمەلەرىنە جىبەرىلەتىن بولدى.
2019 جىلعا ارنالعان رەسپۋبليكالىق بيۋدجەت تاپشىلىعى 347,6 ملرد تەڭگەگە ۇلعايىپ, 1 326,6 ملرد تەڭگەنى نەمەسە جالپى ىشكى ءونىمنىڭ 2,1% - ىن قۇرادى.
سونىمەن قاتار, اعىمداعى جىلعى 20 ناۋرىزدا پارلامەنت پالاتالارىنىڭ بىرلەسكەن وتىرىسىندا ماڭىزدى شەشىمدەر قابىلداندى جانە قازاقستان رەسپۋبليكاسىنىڭ پرەزيدەنتى وسى زاڭ جوباسىنا وزگەرىستەر مەن تولىقتىرۋلار ەنگىزۋدى تالاپ ەتەتىن بىرقاتار تاپسىرمالار بەرگەن بولاتىن:
- استانانى نۇر-سۇلتان قالاسى دەپ قايتا اتاۋ;
- جاڭا مەملەكەتتىك ورگان – قازاقستان رەسپۋبليكاسى تۇڭعىش پرەزيدەنتىنىڭ-ەلباسىنىڭ كەڭسەسىن قۇرۋ;
- بيۋدجەت سالاسىنداعى جالاقىسى تومەن قىزمەتكەرلەردىڭ جانە اتقارۋشى ورگاندارداعى تومەنگى ساناتتاعى مەملەكەتتىك قىزمەتشىلەردىڭ ەڭبەكاقىسىن ارتتىرۋ مەرزىمىن بيىلعى جىلدىڭ 1 شىلدەسىنەن 1 ماۋسىمىنا اۋىستىرۋ.
بۇل تاپسىرمالاردى ىسكە اسىرۋ ءۇشىن 38,8 ملرد تەڭگە تالاپ ەتىلىپ وتىر, ولاردى رەسپۋبليكالىق بيۋدجەتتىڭ تاپشىلىعى ەسەبىنەن ونىڭ نومينالدى ءمانىن ارتتىرا وتىرىپ ءارى جالپى ىشكى ونىمگە قاتىستى مولشەرىن 2,1% دەڭگەيىندە ساقتاي وتىرىپ جوسپارلاۋ ۇسىنىلادى.
كوميتەتتىڭ كەڭەيتىلگەن وتىرىسىندا سونداي-اق «قازاقستان رەسپۋبليكاسىنىڭ ۇلتتىق قورىنان 2019-2021 جىلدارعا ارنالعان كەپىلدەندىرىلگەن ترانسفەرت تۋرالى» زاڭعا وزگەرىس تە قارالدى.
بۇل زاڭ جوباسىمەن ۇلتتىق قوردان 2019 جىلعا ارنالعان رەسپۋبليكالىق بيۋدجەتكە بەرىلەتىن كەپىلدەندىرىلگەن ترانسفەرت كولەمى 2 700 ملرد.تەڭگە سوماسىندا بەلگىلەندى.
2019 جىلى رەسپۋبليكالىق بيۋدجەت شىعىستارىنىڭ 23%-ى كەپىلدىك بەرىلگەن ترانسفەرت ەسەبىنەن قارجىلاندىرىلادى, بۇل ۇلتتىق قورداعى قاراجاتتىڭ تومەندەتىلمەيتىن قالدىعى بويىنشا ءتيىستى قارجى جىلىنىڭ سوڭىنداعى جالپى ىشكى ءونىمنىڭ بولجامدى مانىنەن 30%-ى مولشەرىندە شارتتاردىڭ ورىندالۋىن قامتاماسىز ەتەدى.
