Pioneer Concept قوعامدىق قورى مەن InfoJump سپورتتىق ماركەتينگ اگەنتتىگى باستاماشىل بولعان مادەني ءىس-شاراعا «Nur Otan» پارتياسى الماتى قالالىق فيليالى مەن قالالىق اكىمدىك قولداۋ كورسەتتى.
«ماقسات – اۋتيزم دەرتىنە شالدىققان بالالارعا شۋاقتى مەيىرىم مەن قۋانىش سىيلاۋ ارقىلى وسى جابىق تاقىرىپقا قوعامنىڭ نازارىن اۋدارۋ», - دەدى جيىندى اشقان Pioneer Concept قق ديرەكتورى جانات قاراتاي.
بۇگىندە اۋتيزم الەمدىك دەڭگەيدەگى ماسەلەگە اينالعان. سوندىقتان, 2007 جىلى 18 جەلتوقساندا بىرىككەن ۇلتتار ۇيىمىنىڭ باس اسسامبلەياسىندا ارنايى قارالىپ, ناتيجەسىندە 2008 جىلدان باستاپ, 2 ءساۋىر اۋتيزم تۋرالى اقپارات تاراتۋ كۇنى بولىپ جاريالاندى.
شىنىن ايتقاندا, اۋتيزم قازاقستاندا كوپ ايتىلا بەرمەيدى. ستاتيستيكا بويىنشا, ەلىمىزدە 4 مىڭداي بالا وسى دەرتپەن ەسەپكە الىنعان. دياگنوزى ەرتە انىقتالسا, ونداي بالانى مەكتەپكە دەيىن وڭالتۋ مۇمكىندىگى بار ەكەنىن مەديتسينا دالەلدەپ وتىر.
سونىمەن قاتار, اۋتيزممەن تۋعان سابيلەر ءدارى-دارمەكپەن عانا ەمدەلمەيتىنىن كوپ ادام بىلە بەرمەيدى. ولاردى ساۋىقتىرۋ, بەيىمدەۋ ءۇشىن ۇلكەن پسيحولوگيالىق كومەك كەرەك. سول سەبەپتى, Nur Otan پارتياسى مەن مەملەكەت ءتۇرلى باعدارلامالار قابىلداپ, ۇكىمەتتىك ەمەس ۇيىمدارمەن بىرلەسە جۇمىس ىستەپ كەلەدى. اتاپ ايتقاندا, ەلباسىمىزدىڭ تاپسىرماسى بويىنشا, پارتيالىق «كەدەرگىسىز كەلەشەك» جوباسى ەنگىزىلىپ, ينكليۋزيۆتى ءبىلىم بەرۋ, مۇگەدەكتەردى ەڭبەككە ورنالاستىرۋ سياقتى شارالار تۇراقتى جۇزەگە اسىرىلۋدا.
«وسى جوبا اياسىندا 2015 جىلدان بەرى قالامىزدا ەرەكشە قاجەتتىلىگى بار جاندارعا بولىنەتىن قارجى كولەمى 2,4 ملرد. تەڭگەدەن 4,2 ملرد. تەڭگەگە (ياعني 2 ەسەگە) ارتتى. تەك, وتكەن جىلدىڭ وزىندە 1 مىڭنان استام مۇگەدەك جاندار جۇمىسقا ورنالاستىرىلدى. باسقا دا اتاۋلى كومەكتەر تۇراقتى كورسەتىلۋدە, - دەدى ءوز سوزىندە Nur Otan پارتياسى اقف توراعاسىنىڭ ءبىرىنشى ورىنباسارى ستانيسلاۆ كانكۋروۆ.
سونداي-اق, الماتى, نۇر-سۇلتان, قىزىلوردا, وسكەمەن قالالارىندا بيزنەس كومەگىمەن اۋتيزمنەن وڭالتۋ ورتالىقتارى قۇرىلىپ, بالالاردىڭ سپورتپەن, مۋزىكامەن اينالىسۋىنا مۇمكىندىكتەر جاسالىپ وتىر. ناتيجەسىندە «ءاۋتيزمدى جەڭەمىز» جوباسى پايدا بولىپ, جاس بالالاردىڭ ءومىر سۇرۋگە دەگەن قۇلشىنىسىن وياتتى. كىشكەنتاي ۇلدار مەن قىزدار قانداي قيىندىق بولسا دا, ونى جەڭۋگە بولاتىنىن دالەلدەدى. جاس بيشىلەر, انشىلەر ءوز ونەرلەرىن ورتاعا سالىپ, جينالعان كوپشىلىكتىڭ ىستىق ىقىلاسىنا بولەندى.
بۇگىنگى اكتسيا سونىڭ جارقىن جالعاسى دەپ بىلەمىز.
ساپارباي پارمانقۇل,
«Egemen Qazaqstan»
الماتى
