وسى ورايدا ە.ءبىرتانوۆ اتالعان ماسەلەگە بايلانىستى 2018 جىلى جان-جاقتى ساراپتاما جۇرگىزىلگەنىن ايتتى.
«پروبلەمانى انىقتاپ, وتكەن جىلدىڭ كوكتەمىندە قۇقىققورعاۋ ورگاندارىنا بەردىك. بۇل فاكتىلەردى سوڭعى ۋاقىتقا دەيىن قۇقىققورعاۋ ورگاندارىمەن, باس پروكۋراتۋرامەن بىرگە تەكسەردىك. 28 قىلمىستىق ءىس قوزعالدى. ءمان-جايىن قۇقىققورعاۋ ورگاندارى حابارلايتىن بولادى», - دەدى ول. ونىڭ دەرەگىنشە, قازىرگى ۋاقىتتا تەكسەرۋ شارالارىنىڭ ەكىنشى كەزەڭى باستالدى. «قازىرگى ۋاقىتتا ناركولوگيالىق, پسيحياتريالىق, تۋبەركۋلەزگە قارسى ديسپانسەرلەردە, ۆيچ ورتالىقتارىندا تەكسەرۋدىڭ ەكىنشى كەزەڭىن جۇرگىزىپ جاتىرمىز. بۇل قورىتىندى القا جينالىسىنان كەيىن بەرگەن تاپسىرمام. قازىردىڭ وزىندە ءتيىمسىز جوسپارلاۋ فاكتىلەرى انىقتالىپ جاتىر. مۇنىڭ بارلىعىن انىقتاۋعا قىزمەتتەردى تسيفرلاندىرۋ مۇمكىندىك بەرەدى. بۇل جۇمىستاردى ودان ارى دا جالعاستىرامىز», - دەدى ول. ايتا كەتەيىك, قر باس پروكۋرورىنىڭ ورىنباسارى اندرەي لۋكين قازاقستان ازاماتتارىنا ارنالعان ءينسۋليندى وزبەكستانعا ساتۋ فاكتىسى بويىنشا پروكۋراتۋرا تەكسەرۋ جۇرگىزىپ جاتقانىن ءمالىم ەتكەن بولاتىن. قر دەنساۋلىق ساقتاۋ مينيسترلىگى فارماتسيا كوميتەتىنىڭ توراعاسى ليۋدميلا بيۋرابەكوۆا دا قازاقستاندىقتارعا ارنالعان ءينسۋليننىڭ وزبەكستاندا ساتىلىپ جاتقانىنا بايلانىستى اقپاراتقا پىكىر بىلدىرگەن ەدى. «ينسۋليندەر بىرىڭعاي ديستريبيۋتور (سك-فارماتسيا) ارقىلى ساتىپ الىنىپ, قازاقستاننىڭ تىكەلەي مەديتسينالىق ۇيىمدارىنا كەلىپ تۇسەدى. ول جەردە ينسۋليندەر رەتسەپت رەتىندە جازىلىپ, پاتسيەنتتەردىڭ قولىنا تاپسىرىلادى. وتكەن جىلى ءبىز بولشەك ساۋدا جەلىسىندە بىرىڭعاي ديستريبيۋتور ارقىلى الىنعان وسىنداي پرەپاراتتاردىڭ ساتىلۋ جاعدايلارىن انىقتاعان بولاتىنبىز. بۇل فاكتىلەر تۋرالى قۇقىق قورعاۋ ورگاندارىنا دا حابار بەردىك. ءبىز پاتسيەنتتەردىڭ سول پرەپاراتتى العانىنان نەمەسە باسقا جەرگە (وزبەكستانداعى دارىحانالارعا) ساتقانىنان حابارىمىز جوق. بولماسا ول پرەپاراتتار سىزىلىپ تاستالىپ, مەديتسينالىق ۇيىمداردان الىنىپ كەتكەن. باسقا ورگاندار مەن پروكۋراتۋرا ناقتى وسى ءىستىڭ ءمان-جايىن انىقتاۋ ۇستىندە», - دەگەن ەدى ليۋدميلا بيۋرابەكوۆا.
ەسكە سالا كەتسەك, وسى جىلدىڭ باسىندا تاشكەنت جۋرناليستەرى ءدارىحانالاردان قازاق تىلىندە تاڭبالانعان ينسۋلين ساتىلىپ جاتقانىن حابارلاعان ەدى.
