مەگاپوليستە 2016 جىلدان باستاپ قوعامدىق كولىكتەردى كەشەندى رەفورمالاۋ ءىسى جۇيەلى جۇزەگە اسىپ كەلەدى. جاياۋ جۇرگىنشىلەر اۋماعى ارتىپ, ۆەلوسيپەد جولدارى جەلىسى ۇلعايتىلعان. سونداي-اق, كۇرە جولدارداعى كولىك جىلدامدىعى تومەندەتىلدى.
ناقتى شارالاردىڭ ارقاسىندا جكو كەزىندە ادام ءولىمىنىڭ سانى از دا بولسا ازايعان, الايدا جول قازاسى ستاتيستيكاسى ءالى دە جوعارى. ماسەلەن, 2018 جىلى قالا جولدارىندا 133 ادام قازا تاۋىپ, 5200 ادام ءتۇرلى جاراقات العان.
الماتى اكىمى باۋىرجان بايبەك قالالىق موبيلدىلىك باسقارماسىنا ۇزدىك الەمدىك پراكتيكانى ەسكەرە وتىرىپ, جولداردا ادام قازاسى مەن جاراقات الۋدى ازايتۋعا باعىتتالعان جوسپار جاساۋدى تاپسىرعان ەدى. ساراپتاما كورسەتكەندەي, جول اپاتتارى نەگىزىنەن ءتورت جانە ودان دا كوپ جولاقتى كۇرە جولداردا جانە جول قوزعالىسى كەزىندە وقىس قيمىل جاساۋعا مۇمكىندىك بەرمەيتىن ەلدى مەكەندەردە ورىن الاتىندىعى انىقتالعان.
ماماندار جاياۋ جۇرگىنشىلەردىڭ قاتىسى بار جول-كولىك وقيعالارى كوبىنەسە جۇما كۇنى, ساعات 10.00-دەن 20.00-گە دەيىنگى ارالىقتا ءجيى بولاتىندىعىن ايتادى. Vision Zeroنىڭ جاھاندىق كونتسەپتسياسىنا وراي جاياۋ جۇرگىنشى جول-كولىك وقيعاسىنا قاتىسۋشى. بۇل قالا تۇرعىندارى ءۇشىن جەكە اۆتوكولىكتەردەن كورى ءتۇرلى قوعامدىق كولىكتەردىڭ قىزمەتىن پايدالانۋ ءتيىمدى ەكەنىن كورسەتەدى.
زەرتتەۋ كورسەتكەندەي, قوعامدىق كولىك دامىعان اۋدانداردىڭ تۇرعىندارى اۆتوموبيلدەنگەن ورتاداعى ادامدارعا قاراعاندا جول-كولىك اپاتىنا بەس ەسە از تۇسەدى ەكەن. BRT, LRT جەلىلەرىن كەڭەيتۋ جانە مەترو جكو قىسقارتۋدىڭ نەگىزگى تۇتقالارى بولىپ تابىلادى. «Vision Zero Almaty» ءىس-قيمىل جوسپارىندا جولداردىڭ, كوشەلەردىڭ, ءتۇرلى بەلگىلەردىڭ وزگەرۋى جانە «قاۋىپسىز قالا», «قاۋىپسىز كوشە», «قاۋىپسىز جىلدامدىق», «قاۋىپسىز قوعامدىق كولىك», «جول قوزعالىسىن باقىلاۋدىڭ ينتەللەكتۋالدى جۇيەسى», «بارلىق قىزمەتتەردى ۇيلەستىرۋ» جانە باسقا قادامدار كورىنىس تاپقان.
«بۇل قادامدار ارقىلى جكو ءجيى بولاتىن ۋچاسكەلەرگە زەرتتەۋ جۇرگىزىلەدى جانە پروبلەمالى بۇرىلىستاردا جول قوزعالىسى وزگەرتىلەدى. جولداردى اعىمداعى وزگەرتۋ قىلتالاردى, بەكەتتىك, تروتۋارلىق جانە قولدان جاسالعان كەدىر-بۇدىرلاردى, بوللاردتارتى تەگىستەۋ ەسەبىنەن اتقارىلادى. سونىمەن قاتار, كوزگە كەرى اسەر ەتەتىن ۆيزۋالدى ەلەمەنتتەر سانى ازايادى. بەكىتىلگەن ءىس-قيمىل جوسپارى نەگىزىندە جاڭا ادىستەردى ەنگىزۋدىڭ ارقاسىندا جاياۋ جۇرگىنشىنىڭ قاۋىپسىزدىگى ارتادى, جاياۋ جۇرگىنشىلەرگە ارنالعان وتپەلى جولدارعا ديودتى جارىق شامدارى, ال ادامدار كوپ جينالاتىن وتپەلى جەرلەرگە كنوپكالى باعدارشامدار ورناتىلادى, باعدارشامدارعا جاسىل فازانى ەرتە كورسەتەتىن قوسىمشا بەكىتىلەدى», – دەپ حابارلايدى قالا اكىمدىگىنىڭ ءباسپاسوز قىزمەتى.
الماتى
