پرەمەر-مينيستر دەنساۋلىق ساقتاۋ ءمينيسترى ە. ءبىرتانوۆ پەن بىرقاتار ءوڭىر اكىمدەرىنىڭ باياندامالارىن تىڭداعاننان كەيىن, قر ۇكىمەتىنىڭ الدىندا حالىققا مەديتسينالىق كومەكتىڭ قولجەتىمدىلىگىن قامتاماسىز ەتۋ جانە ونىڭ ساپاسىن جاقسارتۋ — ورتاق مىندەتى تۇرعانىن اتاپ ءوتتى.
«بۇل قازاقستاندىقتاردىڭ دەنساۋلىعىن جاقسارتىپ, ءومىر ءسۇرۋ ۇزاقتىعى مەن ساپاسىن ارتتىرادى. وسى رەتتە حالىقتىڭ العاشقى مەديتسينالىق كومەككە قولجەتىمدىلىگى ماسەلەسى اسا ماڭىزدى ماسەلە», — دەپ ا. مامين, اتالعان جۇيەدەگى پروبلەمالاردى – العاشقى بۋىن دارىگەرلەرىنىڭ جۇكتەمەسىنىڭ اۋىر ەكەنىن جانە مامان تاپشىلىعى بار ەكەنىن اتاپ ءوتتى.
ۇكىمەت «اۋىل – ەل بەسىگى» جوباسى اياسىندا جاڭا الەۋمەتتىك ستاندارتتاردى ەنگىزىپ, اۋىلدىق جەرلەردە دەنساۋلىق ساقتاۋ ۇيىمدارىنىڭ قۇرىلىسى بويىنشا وڭىرلىك ستاندارتتار جۇيەسىن ازىرلەۋدە.
ۇكىمەت باسشىسى مىندەتتەردى ىسكە اسىرۋ ماقساتىندا دەنساۋلىق ساقتاۋ مينيسترلىگىنە جانە وڭىرلەردىڭ اكىمدىكتەرىنە كەلەسى باعىتتار بويىنشا جۇمىستى ۇيىمداستىرۋدى تاپسىردى.
بىرىنشىدەن, جاڭا العاشقى مەديتسينالىق-سانيتاريالىق كومەك نىساندارىن اشۋ ارقىلى جالپى پراكتيكا دارىگەرلەرىنىڭ جۇكتەمەسىن ازايتۋدى قامتاماسىز ەتۋ. سونىمەن قاتار, بۇل نىساندار قاجەتتى مەديتسينالىق قۇرالدارمەن جاراقتاندىرىلۋى قاجەت.
قاراعاندى وبلىسىنداعى كوكتاس اۋىلى جانە جامبىل وبلىسىنداعى گرودەكوۆو اۋىلىندا ءتيىمدى جۇزەگە اسىرىلعان جوبالار اتاپ ءوتىلدى. پرەمەر-ءمينيستردىڭ ايتۋىنشا, ەندى وسى وڭ تاجىريبە باسقا دا وڭىرلەردە قولدانىلۋى كەرەك.
ەكىنشىدەن, جاس مامانداردىڭ اۋىلداردا تۇراقتى جۇمىس ىستەپ, ەلدى مەكەندەردە قالۋىن قامتاماسىز ەتۋ ماقساتىندا الەۋمەتتىك قولداۋ كورسەتۋ ماسەلەلەرىن پىسىقتاۋ قاجەت.
مىسال رەتىندە سولتۇستىك قازاقستان جانە تۇركىستان وبلىستارىندا جاس ماماندارعا جوعارى كوتەرمە اقى تولەۋ, ال باتىس قازاقستان جانە قاراعاندى وبلىستارىندا تۇرعىن ۇيمەن قامتاماسىز ەتۋ جۇمىسى ۇيىمداستىرىلعانى اتالىپ ءوتتى. پرەمەر-مينيستر وسىنداي باستامالارعا اسا كوڭىل ءبولۋ كەرەك ەكەنىن ايتتى.
ۇشىنشىدەن, ەلباسىنىڭ تاپسىرماسىن ءتيىمدى ورىنداۋ ماقساتىندا دەنساۋلىق ساقتاۋ مينيسترلىگىنىڭ العاشقى مەديتسينالىق-سانيتاريالىق كومەكتى دامىتۋ بويىنشا ءىس-شارالار جوسپارىن ۇكىمەت دەڭگەيىنە كوتەرۋ كەرەك. دەنساۋلىق ساقتاۋ مينيسترلىگىنە ءبىر اي مەرزىمدە ءىس-شارالاردىڭ جانداندىرىلعان جوسپارىن اكىمدىكتەرمەن پىسىقتاپ, ونى بەكىتۋ ءۇشىن پرەمەر-مينيستر كەڭسەسىنە ەنگىزۋ تاپسىرىلدى.
