قازاقستاننىڭ 30-دان استام ۇن تارتاتىن جانە 105 استىق ساقتاۋ كاسىپورنى قىتاي تىزىمىنە قوسىلدى

دەر كەزىندە قابىلدانعان شارالار شەگىرتكەلەردىڭ تارالۋ ايماعىن وتكەن جىلعى 1،9 ملن. گەكتاردان اعىمداعى جىلى بولجانىپ وتىرعان 950،4 مىڭ گەكتارعا دەيىن ەكى ەسەگە ازايتۋعا مۇمكىندىك بەردى: فاو-نىڭ عىلىمي ۇسىنىمدارىن ەسكەرە وتىرىپ، وڭدەۋدىڭ جاڭا ادىستەرى قولدانىلادى.

«جالپى، اسا قاۋىپتى ورگانيزمدەرمەن زالالدانعان الاڭ 2016 جىلعى 5،1 ملن. گەكتاردان 2019 جىلى 3،9 ملن. گەكتارعا دەيىن تومەندەدى، كارانتيندىك ءارامشوپ سانالاتىن تىكەنەكتى القانىڭ تارالۋ وشاقتارى تولىعىمەن جويىلدى، امەريكالىق اق كوبەلەك، كومستوك سىمىرى، كاليفورنيالىق قالقانشالى سىمىر جانە شىعىس جەمىس جەمىرى سياقتى بىرقاتار كارانتيندىك وبەكتىلەردىڭ تارالۋ الاڭى قىسقاردى»، دەيدى اۋىل شارۋاشىلىعى ءمينيسترى ساپارحان وماروۆ.

ءمينيستردىڭ ايتۋىنشا، قازاقستان اۋماعىن كارانتيندىك وبەكتىلەردىڭ ەنۋى مەن تارالۋىنان قورعاۋ ماقساتىندا 2019 جىلى 19 اقپاندا قىرعىزستان اۋماعىنان قۇرما، الما، تۇقىمدىق جانە تاعامدىق كارتوپ اكەلۋگە تىيىم سالۋ ارقىلى ۋاقىتشا كارانتيندىك فيتوسانيتاريالىق شارالار ەنگىزىلدى.
وزبەكستان مەن قىرعىزستانداعى ارىپتەستەرمەن فيتوسانيتاريالىق، كارانتيندىك باقىلاۋ سالاسىنداعى ىنتىماقتاستىق جونىندەگى جول كارتالارىنا قول قويىلدى.

«2018 جىلى قىتايدىڭ باس كەدەن باسقارماسىمەن قازاقستاننان قىتايعا جوڭىشقا، راپس كۇنجاراسى، ارپا جانە جۇگەرى ەكسپورتتاۋعا قويىلاتىن فيتوسانيتاريالىق تالاپتارعا قول قويىلدى، ارپا مەن جۇگەرى بويىنشا 2 كاسىپورىنعا ينسپەكتسيا جۇرگىزىلدى، بۇل اتالعان ءونىمدى رەسمي تۇردە جەتكىزە باستاۋعا مۇمكىندىك بەردى»، دەيدى مينيستر.

بايانداماداعى دەرەكتەردە كورسەتىلگەندەي، 30-دان استام ۇن تارتاتىن قازاقستان كاسىپورىنى جانە 105 استىق ساقتاۋ كاسىپورنى قىتاي تىزىمىنە قوسىلدى، بۇل استىق پەن ۇننىڭ قىتاي نارىعىنا ەكسپورتىن ۇلعايتۋعا مۇمكىندىك بەرمەك.

«ەلىمىزدىڭ ۆەتەريناريالىق جانە فيتوسانيتاريالىق قىزمەتتەرىنىڭ بەلسەندى جۇمىسىنىڭ ارقاسىندا باسقا ەلدەردىڭ تىزىلىمدەرىنە بارلىعى 2557 قازاقستاندىق ەكسپورتتاۋشى كاسىپورىن، ونىڭ ىشىندە ەۋرازيالىق ەكونوميكالىق وداق تىزىلىمىندە 2212 وتاندىق كاسىپورىن ەنگەنىن تاعى دا اتاپ ءوتۋ ماڭىزدى»، دەدى ۆەدومستۆا باسشىسى.