بۇل كاسىپورىن جىلىنا 3000 تونناعا جۋىق بالمۇزداق, 15 توننا تۇشپارا ءونىمىن شىعارادى. سونداي-اق, سەرىكتەستىككە قاراستى بىلتىر ىسكە قوسىلعان شوكولادتى گلازۋر جانە شوكولاد وڭدەيتىن تسەحىنىڭ جوبالىق قۇنى – 800 ملن. تەڭگە. الداعى ۋاقىتتا تسەحتا جىلىنا 1100 توننا شوكولادتى گلازۋر مەن شوكولاد ونىمدەرى وندىرىلەتىن بولادى.
بۇدان سوڭ ءوڭىر باسشىسى تولەبي اۋدانى, كيەلىتاس اۋىلدىق وكرۋگىندە ورنالاسقان «گازپرومنەفت-بيتۋم قازاقستان» جشس مۇناي ونىمدەرىن وڭدەيتىن زاۋىتتىڭ جۇمىسىن كورىپ, «شىمكەنت قۇس» جشس قۇس ەتىن وندىرەتىن تسەحىنىڭ جاڭا قۇرىلىس جۇمىستارىمەن تانىستى. 2019 جىلدىڭ قازان ايىندا ىسكە قوسىلاتىن جوباعا 896 ملن. تەڭگە ينۆەستيتسيا تارتىلعان. مۇندا جىلىنا 2500 توننا قۇس ەتىن ءوندىرۋ جوسپارلانعان. ومىرزاق شوكەەۆ اۋدان باسشىسىنا قۇس ەتىن ءوندىرۋدى ارتتىرىپ, كاسىپكەرلەرگە قاجەتتى جەر تەلىمدەرىن ءبولۋدى جۇكتەدى.
سونداي-اق, وبلىس اكىمى «قازىعۇرت باقتارى» اۋىلشارۋاشىلىق وندىرىستىك كوپپەراتيۆىندە دە بولدى. ەگىس القابىندا بۇگىنگى تاڭدا 265 000 كوشەت وتىرعىزىلعان. 140 گا اۋماقتىڭ 110 گەكتارى الما باۋ, ال قالعان 28 گەكتاردىڭ قۇرىلىسى جۇرگىزىلۋدە. كوشەتتىڭ بارلىعى يتاليادان اكەلىنگەن. سونىڭ ىشىندە گرەنين سيت سورتى – 50 مىڭ, ايدارەد – 50 مىڭ, گولدەن دەليشەس – 115 مىڭ ءتۇپ. سونىمەن بىرگە, گالا سورتى 50 004 ءتۇپ ەگىلگەن. جالپى ەگىس القابىنا 1 ملرد. تەڭگە قارجى بولىنگەن. وندا ومىرزاق ەستاي ۇلى جاۋاپتى سالا باسشىلارىنا قارقىندى باۋ كولەمىن ارتتىرۋ جونىندە تاپسىرما بەردى. مول ءونىم الۋدا تامشىلاپ سۋعارۋ ءادىسىنىڭ تيىمدىلىگىن ايتتى.
اۋدانداعى ءوندىرىس ورىندارىن ارالاعان ءوڭىر باسشىسى كاسىپكەرلىكتى دامىتۋ, جۇمىس ورىندارىن اشۋ جونىندە تاپسىرمالار بەرىپ, تۇرعىنداردىڭ ءال-اۋقاتىن جاقسارتاتىن جۇمىستاردى جانداندىرۋدى تاپسىردى.
