پاۆلودارلىق وقۋشى 1360 سىرىڭكەدەن كەسەنە قۇراستىردى

ۇيرمە اۋىل بالالارىن تەحنولوگيا، ساۋلەت، قۇرىلىس سالالارىنا بەيىمدەپ، فيزيكا، ماتەماتيكا پاندەرىنە قىزىعۋشىلىقتارىن ارتتىرۋدا.

-كەسەنەنى جاساۋعا ەكى جىلداي ۋاقىت كەتتى. ارينە، وتە كۇردەلى جۇمىس. وقۋشىلاردان شىدامدىلىقتى تالاپ ەتەدى. ودان كەيىن تەمىردەن قىران بۇركىت جاسادىق، -دەيدى  اسقار ماعزۇم ۇلى.

مەكتەپتىڭ 10 سىنىپ وقۋشىسى تەمىرلان قاليەۆتىڭ ايتۋىنشا، كەسەنە قۇراستىرۋدا ەڭ قيىنى-سىرىڭكەنىڭ جىڭىشكە تاياقشالارىن ءبىر-بىرىنە جەلىمدەپ جابىستىرۋدا بولىپتى.

 تاياقشالاردى ءبىر شەتىنەن باستاپ، سوڭىنان دەيىن ءتۇزۋ كۇيىندە ءتىزىپ شىعۋ دا وڭايعا سوقپاپتى. ءۇيى مەن شەبەرحانا اراسىنا كوتەرىپ ءجۇرىپ جاساپ شىققان ەكەن.

تۇركىستانداعى ۇلى بابا كەسەنەسىن سۋرەتتەن كورىپ قىزىعىپ، ءوزىم دە شاعىن كەسكىنىن جاساپ كورسەم قايتەدى دەگەن ويعا كەلگەن. الدىمەن جوباسىن سىزىپ، قاجەتتى جابدىقتارىن دايىندادى. ۇستازى اسقار اعاسىمەن اقىلداسىپ بارىپ، قولعا الىپتى.

ال، جارقىراپ تۇرعان قىران بۇركىتتى تەمىردەن سىنىپتاسى سۇلتان جۇتاەۆ جاساپتى.

الداعى ۋاقىتتا تەمىرلان مەن سۇلتان قوبىز جاسايتىن بولسا، وعان 8 مىڭنان استام سىرىڭكە جەلىمدەۋ كەرەك ەكەن.

ۇيىرمە مۇشەلەرىنىڭ بارلىعى دا الۋان قولونەر تۋىندىلارىن جاسايدى، وسىعان وراي عىلىمي جوبالارىن قورعايدى.

سىنىپتاستارى ەركەش سەرىك، قايرات احانوۆ، ايدىن بايحانوۆ، سايلاۋ تولەپبەرگەن،شەرحان جانباەۆ بارلىعى دا رەسپۋبليكالىق قولونەر، يننوۆاتسيالىق كورمەلەردىڭ جەڭىمپازدارى.

بيىل زەينوللا اسىلان بولسا، «يننوۆاتسيالىق پاۆلودار» جوباسى ءۇشىن وبلىس ورتالىعىنداعى يننوۆاتسيالىق ەۋرازيا ۋنيۆەرسيتەتىنىڭ وقۋ گرانتىن يەلەندى.

سونىمەن بىرگە، وقۋشىلار «يننوۆاتسيالىق پاۆلودار»، «جاس تەحنيكتەر – اۋىل شارۋاشىلىعىنا»، «اعاشتان، تاستان، سازدان بۇيىمدار جاساۋ»، «مەتالدى وڭدەپ، زەرگەرلىك بۇيىمدار، بەدەر سالۋ، سوعۋ» سياقتى ۇيىرمەنىڭ ءتۇرلى بولىمدەرىنە ساباقتان تىس ۋاقىتتا كەلە الادى.  

تاقتايدى سۇرگىلەۋ، قۇراستىرىپ، بەكىتۋ، سىممەن ىسىپ كۇيدىرۋ، كەسىپ الۋ، ارلەۋ، اعاش بولشەكتەرىن جەلىمدەۋ ادىستەرىنە ۇيرەنەدى.

 جۇقا مەتالدى وڭدەۋ تەحنولوگياسى بويىنشا ەلەكتر قۇرىلعىلارىن قاڭقاعا بەكىتۋ، سۋ سورعى قوندىرعىسىن قۇراستىرۋ ادىستەرى، سۋ سورعىنى حاۋىزعا ورناتۋ، بەزەندىرۋ شامدارىن ەلەكترلىك جالعاۋ ارقىلى ءتۇرلى سىزبالار دايىندايدى.

مىسالى، بوتەلكە قاقپاقتارى، قالدىق ماتەريالداردان كوركەم بۇيىمدار، ماكەتتەر جاساۋ ارقىلى تاعى دا پايداعا جارايتىنىن،قورشاعان ورتانى لاستاماۋدى تۇسىنەدى.

وقۋشىلار ءتۇرلى كولىكتەر، كەمەلەر كەسكىندەرىن جاساعان بولسا، ەندى تىكۇشاق قاڭقاسىن، نەگىزگى جانە ارتقى قالاقشالارىن قۇراستىرۋدا.

-مەنىڭ ىزدەنىستەرىم-جاڭا تەحنولوگيالار. تەحنولوگيالار سىرىن بالالارعا ۇيرەتۋ. ءار بالانىڭ وزىنشە جاساعان يننوۆاتسيالىق ىزدەنىس ەڭبەگى جەتىستىككە جەتكىزەدى. وقۋشىلارىمىز جاساعان قولونەر جۇمىستارى بايقاۋلارعا قاتىسىپ، كورمەلەرگە قويىلادى. بالالار ىنتالانادى. العا قاراي تالپىنىپ، ۇنەمى ىزدەنىستە جۇرەدى، –دەيدى اسقار ماعزام ۇلى.

پاۆلودار وبلىسى،

قىزىلجار اۋىلى

سۋرەتتى تۇسىرگەن: الميرا اقانوۆا