اتىراۋ وبلىسى اكىمىنىڭ ءبىرىنشى ورىنباسارى سەرىك شاپكەنوۆ قوعام وكىلدەرىمەن بىرگە مەكتەپ-ينتەرناتتاعى بالالاردىڭ جاعدايلارىن تەكسەردى. وڭىرلىك كوممۋنيكاتسيالار قىزمەتى حابارلاعانداي, كوميسسيا مۇشەلەرى بالالاردىڭ پالاتالارىن قاراپ, وقۋ-ادىستەمەلىك بازامەن, اسحانا مەن مەدبولىمشەنىڭ جاعدايىمەن تانىسقان.
كوميسسيا مۇشەلەرى تاربيەشىلەر تاراپىنان دۇرىس باقىلاۋدىڭ جوقتىعىنا, بالالار جاتقان پالاتالاردىڭ سانيتارلىق نورمالارعا ساي ەمەستىگىنە كوز جەتكىزگەن.
مەكەمە ديرەكتورى رىمبەك تۇرداعاليدىڭ ايتۋىنشا, ول بۇل لاۋازىمعا وتكەن جىلى كەلگەن.
-جاۋاپكەرشىلىكتەن جالتارۋعا بۇل سەبەپ ەمەس. جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى ەكى اي بۇرىن تاعايىندالدى, مەن دە وسى سالاعا جاقىننان بەرى جەتەكشىلىك ەتەمىن, بىراق بۇل بىزدەن دە, وسى سالاعا بىرنەشە جىلدان بەرى جەتەكشىلىك جاساپ وتىرعان ادامداردان دا جاۋاپكەرشىلىكتى الىپ تاستامايدى. بارلىعىنا شارا قولدانىلادى, ەرەكشە بالالارعا تىكەلەي جاۋاپتى باسقارما باسشىسىنىڭ ورىنباسارىنا سوگىس جاريالاندى, مۇنىمەن دە اياقتالمايدى, قىزمەتتىك تەكسەرۋ قورتىندىسىمەن بارلىق جاۋاپتى تۇلعالارعا قاتىستى شەشىم قابىلدانادى, -دەدى شاپكەنوۆ. -ءبىز جاعدايدى جۇرتشىلىقتىڭ اشىق باقىلاۋىنا شىعارامىز - ۇەۇ وكىلدەرى ءار ينتەرناتتى قاراپ, ءبىزدىڭ جۇمىسىمىزعا باقىلاۋ جاسايدى. سىزدەردىڭ وتكەن جىلى لاۋازىمعا تاعايىندالىپ, بىراق ەشقانداي شارا قولدانباعاندارىڭىز ءبارىن ءوز بەتىمەن جىبەرگەندەرىڭىزدى كورسەتەدى.
ديرەكتوردىڭ كابينەتىندە بەينە باقىلاۋ كامەراسى بار, سول ارقىلى بالالارعا قول كوتەرۋ دەرەكتەرى انىقتالعان. جاعدايدى مەكەمە قىزمەتكەرلەرى ەمەس, پروكۋراتۋرا انىقتادى.
-ءسىزدىڭ كابينەتتە وتىرىپ, قىزمەتكەرلەرىڭىزدىڭ بالالارمەن قانداي قارىم-قاتىناستا ەكەنىن قاراۋعا مۇرشاڭىز بولمادى,-دەدى سەرىك شاپكەنوۆ. -ءتىپتى ءسىزدىڭ وزىڭىزگە جاساپ وتىرعان جاعدايىڭىز بەن بالالاردىڭ ءحالىن سالىستىرۋ ارقىلى كوپ نارسەگە كوز جەتكىزۋگە بولادى. ەگەر بالالار ءسىزدىڭ جۇمىس ورنىڭىزدىڭ جاعدايىنداي جەردە ءومىر سۇرسە, ءبارى باسقاشا بولار ەدى. بۇل-جاۋاپسىزدىق.
وبلىستا كوميسسيا قۇرىلدى, قۇرامىندا ءبىلىم بەرۋ, حالىقتى الەۋمەتتىك قولداۋ, قوعامدىق دەنساۋلىق ساقتاۋ, دەنساۋلىق ساقتاۋ سالالارىنىڭ وكىلدەرى, قارجى اۋديتورلارى مەن قوعام وكىلدەرى بار. كوميسسياعا مۇمكىندىگى شەكتەۋلى, پسيحونەۆرولوگيالىق اۋىتقۋى بار ادامدار تۇراتىن مەكەمەلەردى كەز كەلگەن ۋاقىتتا تەكسەرۋگە قۇقىق بەرىلگەن. كوميسسيا جۇمىسىنىڭ قورتىندىسى بويىنشا جاعدايدى جاقسارتۋعا ۇسىنىستار بەرىلەدى.
اتىراۋ وبلىسى اكىمىنىڭ ءبىرىنشى ورىنباسارى بارلىق كابينەتتەرگە ينتەرنەتكە قوسىلعان ۆەب-كامەرا ورناتۋعا تاپسىرما بەردى, سول ارقىلى اتا-انالار, كوميسسيا مۇشەلەرى مەن تەكسەرۋشى ورگاندار بالالاردىڭ جاعدايىن تاۋلىك بويى باقىلاي الادى.
اتىراۋ
