تالدىقورعاندا وتكەن مارقۇمداردىڭ جانازاسىنا قورعانىس ءمينيسترى نۇرلان ەرمەكباەۆ, قازاقستان مۇسىلداندارى ءدىنىي باسقارماسىنىڭ توراعاسى, باس ءمۇفتي سەرىكباي قاجى وراز, الماتى وبلىسىنىڭ اكىمى اماندىق باتالوۆ قاتىستى.
قايعىلى وقيعا 27 ناۋرىز كۇنى قىزىلوردا وبلىسىنىڭ اۋماعىندا بولعان ەدى. وقۋ-جاتتىعۋ ويىندارىنا قاتىسۋ ءۇشىن اۋەگە كوتەرىلگەن اسكەري تەحنيكا توسىننان اپاتقا ۇشىرىپ, تىكۇشاق بورتىنداعى 13 ادام تۇگەلدەي قازا تاپتى. ازاماتتىق بورىشىن اتقارۋ بارىسىندا قازا تاپقان جاۋىنگەرلەردىڭ اراسىندا الماتى وبلىسىندا تۋىپ-وسكەن 8 ازامات بولعان. بۇگىن جەتىسۋلىقتار مارقۇمداردى اقتىق ساپارعا شىعارىپ سالدى.
بۇعان دەيىن قازا تاپقان اسكەري قىزمەتشىلەردىڭ وتباسىمەن قورعانىس مينيسترلىگىنىڭ اتىنان كەزدەسكەن تالدىقورعانداعى 21/751 اسكەري ءبولىم كومانديرىنىڭ ورىنباسارى بەكبولات جۇماباەۆ مارقۇمداردىڭ تۋعان-تۋىستارىنا ماتەريالدىق كومەك كورسەتىلەتىنىن ايتتى. اتاپ ايتقاندا, قورعانىس مينيسترلىگى جاۋىنگەرلەردىڭدىڭ وتباسى تۇرىپ جاتقان ءۇيدى جەكەشەلەندىرىپ بەرمەك نەمەسە ولارعا باسپانا ساتىپ الۋ ءۇشىن قارجى بولەدى. سونداي-اق, وبلىس اكىمدىگى تاراپىنان دا قازا بولعانداردىڭ وتباسىنا الەۋمەتتىك جەڭىلدىكتەر مەن تولەمدەر جاسالادى. بۇل تۋرالى الماتى وبلىسىنىڭ اكىمى اماندىق باتالوۆ قازا بولعانداردىڭ جاقىندارى مەن تۋعان-تۋىستارىنا كوڭىل ايتۋ بارىسىندا مالىمدەدى.
الماتى وبلىسى
