اتىراۋ وبلىسى اكىمىنىڭ ءبىرىنشى ورىنباسارى سەرىك شاپكەنوۆتىڭ تاپسىرماسىمەن مەكتەپ-ينتەرنات باسشىلىعىنىڭ تاراپىنان قول كوتەرۋ جاعدايىنا بايلانىستى قىزمەتتىك ءىس جۇرگىزەتىن كوميسسيا قۇرىلدى جانە قىلمىستىق قۋدالاۋ, ونىڭ ىشىندە جۇمىستان بوساتۋ تۋرالى شەشىم قابىلدانادى.
- قازىر پروكۋراتۋرا قول كوتەرگەن تاربيەشىلەرگە قاتىستى سوتقا دەيىنگى تەرگەۋ جۇرگىزۋدە.بۇل جابايىلىق جانە ءبىز بۇعان توسقاۋىل قويۋىمىز كەرەك, الدىمەن مەكتەپ-ينتەرناتتاردىڭ باسشىلىعىن تەكسەرگەن ءجون, بۇل ءوز قىزمەتتەرىنە سالعىرت قاراۋ. بارلىعىن تەكسەرىپ, قاتاڭ جازالاۋ كەرەك,- دەپ تاپسىردى سەرىك شاپكەنوۆ كوميسسيا جيىنىندا.
سونىمەن قاتار, وبلىس اكىمىنىڭ ءبىرىنشى ورىنباسارى مۇمكىندىگى شەكتەۋلى بالالاردى قاداعالايتىن جۇمىسپەن قامتۋدى ۇيلەستىرۋ جانە الەۋمەتتىك باعدارمالار باسقارماسى باسشىسىنىڭ ورىنباسارىنا سوگىس جاريالاۋدى تاپسىردى.
- كوميسسيا قۇرامىنا قوعام بەلسەندىلەرى كىرەدى, وسى كوميسسياعا كەز- كەلگەن مەكەمەنى كەز-كەلگەن ۋاقىتتا قاداعالاپ, تەكسەرۋ قۇقىعى بەرىلۋى ءتيىس, ەرەكشە بالالاردى وقىتۋدى جەكە قاداعالاعان ءجون,- دەيدى شاپكەنوۆ. – سونداي-اق, بارلىق مەكتەپ-ينتەرناتتار سىنىپتارى ينتەرنەتكە قوسىلىپ, اتا-انالاردىڭ, قوعام بەلسەندىلەرى مەن تەكسەرۋشى ورگانعا باقىلاۋعا مۇمكىندىك جاسالادى.
اتىراۋ
