ۋكراينا استاناسىنداعى وقىس وقيعا جايلى الماتىلىق تۇرعىن مەحيربان باكيەۆا ءوزىنىڭ فەيسبۋك پاراقشاسىندا جازدى.
«باتىرلار ارامىزدا ءجۇر. كيەۆتەگى اۋەجايدا كوز الدىمىزدا قايعىلى جاعداي ورىن الا جازدادى. اۋەجايدا كىشكەنە قىز بالا تالىپ, دەمالا الماي جەرگە قۇلاپ قالدى. ءبارى ونىڭ ماڭايىنا جينالا قالعان ەدى. اۋرە-سارساڭدا سول جەردەگىلەردىڭ ءبىرى دارىگەرلەرگە قوڭىراۋ شالىپ جاتسا, ەكىنشىسى اۋەجاي قىزمەتكەرلەرى شاقىرۋعا جۇگىرىپ كەتكەن ەدى. ال قىز بالانىڭ جاعدايى ءتىپتى كۇردەلەنە ءتۇسىپ, تىپتەن دەمالا الماي جاتقان ەدى», - دەپ جازادى الماتىلىق تۇرعىن.
ونىڭ جازۋىنشا, دارىگەرلەر تەز كەلە قويماعان. «كەنەت قىز بالاعا ءبىر جىگىت جۇگىرىپ كەلىپ, ەم جاسادى. ادامدار توبى ءبىر ۋاقىت ءۇنسىز قالىپ ەدى. كەنەتتەن قىز بالا تەرەڭ دەم الىپ, جوتەلە باستادى. ءبارىمىز قۋانىپ, ءبىرىمىز شاپالاقتاپ, ءبىرىمىز كوزىمىزدىڭ جاسىن ءسۇرتىپ جاتىرمىز. مەن دە جىلادىم. ءبىر ۋاقىتتا قاتتى ۇرەيلەنىپ, قاتتى قۋاندىق. جىگىتكە جاقىنداعانىمدا ول دا جىلاپ تۇرعانىن كوردىم. قولى دىرىلەپ تۇر ەدى», - دەيدى ول.
بەلگىلى بولعانداي, قىز بالانى شىمكەنت قالاسىنىڭ تۇرعىنى الەكسەي كۋديەنكو قۇتقارىپ العان ەكەن.
«ءبىرشاما ۋاقىتتان كەيىن وقيعا ورنىنا دارىگەرلەر كەلدى. قىز بالانىڭ ومىرىنە ءتونىپ تۇرعان قاۋىپ جوق بولىپ شىقتى. ءبىزدىڭ ەلىمىزدە باتىرلار تۇراتىنىن ءبارى بىلسە دەيمىن. شىمكەنتتىكتەر, سىزدەردىڭ قالالارىڭىزدا ناعىز باتىر بار. تانىس بولساڭىزدار, مىندەتتى تۇردە قۇرمەت كورسەتىڭىزدەر. ول مەن ءۇشىن باتىر. راحمەت ساعان جاقسى ادام», - دەپ جازادى مەحريبان.
