قازاقستان سۋديالار وداعىنىڭ شىمكەنت فيليالىنىڭ ۇيىمداستىرعان شارادا قالالىق سوتتىڭ توراعاسى ەربول راقىمبەكوۆ قاتىسىپ, ىزگىلىكتى شارانىڭ ءمان-ماڭىزىنا توقتالىپ ءوتتى.
«حالقىمىزدا «جەتىم كورسەڭ جەبەي ءجۇر», دەگەن ۇلاعاتتى ءسوز بار. سوندىقتان سوت سالاسىنىڭ قىزمەتكەرلەرى ارقاشان قوعام كومەگىنە مۇقتاج ازاماتتارعا كومەك كورسەتىپ كەلەدى. يگىلىكتى باستاما رەتىندە قالانىڭ سۋديالارى مەن سوت ماماندارى توقسان سايىن وزدەرىنىڭ ءبىر كۇندىك جالاقىسىن №4 بالالار ءۇيى تاربيەلەنۋشىلەرىنىڭ «تۇرعىن ءۇي قۇرىلىس جيناق بانكىندەگى» جەكە جيناق شوتتارىنا اۋداراتىن بولدى», دەدى ەربول راقىمبەكوۆ.
جيىندا ءسوز العان بالالار ءۇيىنىڭ تاربيەلەنۋشىلەرى بايان اليمبەتوۆا مەن الەكساندرا پۋستوۆويتوۆا: «ءبىز ءۇشىن بۇل باستامانىڭ ماڭىزى وتە زور. سەبەبى, ءبىز ەندى بولاشاعىمىزعا سەنىممەن قارايتىن بولامىز», دەپ ءوز ريزاشىلىقتارىن ءبىلدىردى.
ايتا كەتەرلىگى, شىمكەنت قالاسىنىڭ سوتتارى بەس جىلدان بەرى شاھارداعى №4 بالالار ءۇيىنىڭ تاربيەلەنۋشىلەرىن ءوز قامقورلىقتارىنا الىپ كەلەدى. باسقوسۋدا قازاقستان سۋديالار وداعىنىڭ شىمكەنت فيليالىنىڭ توراعاسى ايدوس سۇلتانوۆ اتا-انا مەيىرىمىنە مۇقتاج جاسوسپىرىمدەرگە ءار مەرەكە سايىن ماتەريالدىق كومەك كورسەتىپ, ولارعا سىيلىقتار اپارىپ تۇراتىندىعىن تىلگە تيەك ەتتى.
«تاعدىر تاۋقىمەتىن تارتىپ, ءوسىپ كەلە جاتقان بالالاردىڭ بارلىعى ءبىلىم الىپ, ماتەريالدىق جاعىنان قامتاماسىز ەتىلۋى كەرەك. ويتكەنى, بالالار – مەملەكەتىمىزدىڭ بولاشاعى. بۇل بولىنگەن قارجى ءار بالا 18 جاسقا تولعانعا دەيىن ونىڭ جەكە شوتىنا اۋدارىلىپ, تۇرعىن ءۇي ساتىپ الۋ ءۇشىن جيناقتالادى», دەدى شىمكەنت قالاسى بويىنشا سوتتار اكىمشىسىنىڭ باسشىسى نۇرسۇلتان بايتىلەسوۆ.
شىمكەنت
