ءوزارا ءتيىمدى قارىم-قاتىناسقا ءورىس كەڭ
سەيسەنبى, 4 قىركۇيەك 2012 7:46
ۇستىمىزدەگى جىلدىڭ 11 اقپانىندا قازاقستان رەسپۋبليكاسى مەن گەرمانيا فەدەراتيۆتىك رەسپۋبليكاسىنىڭ اراسىنداعى ديپلوماتيالىق قارىم-قاتىناس ورناعانىنا 20 جىل تولعان ەدى. گەرمانيا قازاقستاننىڭ تاۋەلسىزدىگىن تانىعان ەۋروپاداعى العاشقى ەلدەردىڭ ءبىرى بولدى. ءبىز گفر-ءدى ەۋروپاداعى نەگىزگى سەرىكتەسىمىز رەتىندە قاراستىرامىز, ال قازاقستان گەرمانيا ءۇشىن ورتالىق ازياداعى باسىمدىق بەرەتىن مەملەكەت بولىپ تابىلادى.
سەيسەنبى, 4 قىركۇيەك 2012 7:46
ۇستىمىزدەگى جىلدىڭ 11 اقپانىندا قازاقستان رەسپۋبليكاسى مەن گەرمانيا فەدەراتيۆتىك رەسپۋبليكاسىنىڭ اراسىنداعى ديپلوماتيالىق قارىم-قاتىناس ورناعانىنا 20 جىل تولعان ەدى. گەرمانيا قازاقستاننىڭ تاۋەلسىزدىگىن تانىعان ەۋروپاداعى العاشقى ەلدەردىڭ ءبىرى بولدى. ءبىز گفر-ءدى ەۋروپاداعى نەگىزگى سەرىكتەسىمىز رەتىندە قاراستىرامىز, ال قازاقستان گەرمانيا ءۇشىن ورتالىق ازياداعى باسىمدىق بەرەتىن مەملەكەت بولىپ تابىلادى.
بۇگىنگى كۇندە قازاقستان مەن گەرمانيا اراسىنداعى بارلىق سالالارداعى ىنتىماقتاستىق قارقىندى دامىپ كەلەدى, ەڭ جوعارى دەڭگەيدەگى پارمەندى ساياسي ۇنقاتىسۋ قولداۋ تابۋدا. ۇكىمەتارالىق, پارلامەنتارالىق جانە پارتياارالىق بايلانىستار, سونداي-اق عىلىمي, ىسكەرلىك, شىعارماشىلىق ينتەلليگەنتسيا توپتارى اراسىنداعى ۇنقاتىسۋ ءوزارا قۇرمەت, سەنىم جانە اشىقتىق نەگىزىندە تۇراقتى تۇردە نىعايىپ كەلەدى.
ديپلوماتيالىق قارىم-قاتىناستاردىڭ 20 جىلدىعى – ءبىزدىڭ جاس مەملەكەتىمىز ءۇشىن ايتۋلى وقيعا. ونى ءبىز قازاقستان پرەزيدەنتى ن.ءا.نازارباەۆتىڭ گفر-عا جوعارى دەڭگەيدەگى جەتىنشى ساپارىنىڭ تابىستى وتۋىنەن كورەمىز. ساپار بارىسىندا قازاقستان-گەرمانيا قاتىناستارىنىڭ ۇزاق مەرزىمدى جانە جوعارى دەڭگەيدى كورسەتەتىن سەرپىندى جوبا ەكەنى دالەلدەندى.
وسى ورايدا, ەلدەرىمىزدىڭ باسشىلارى قول جەتكىزگەن ءتۇرلى باعىتتارداعى ۋاعدالاستىقتاردى اتاپ وتۋگە ءتيىسپىن. شيكىزات, ونەركاسىپ جانە تەحنولوگيالار سالالارىنداعى ارىپتەستىك تۋرالى ۇكىمەتارالىق كەلىسىمدەردى ىسكە اسىرۋ شەڭبەرىندە جانە ينۆەستيتسيالىق جوبالاردى تالقىلاۋ ماقساتىمەن گەرمانيا ەكونوميكاسى شىعىس كوميتەتىنىڭ توراعاسى ەكحارد كوردەس باستاعان نەمىس ىسكەر توپتارىنىڭ دەلەگاتسياسى ۇستىمىزدەگى جىلعى قىركۇيەك ايىنىڭ سوڭىندا قازاقستانعا ساپارمەن كەلەدى دەپ كۇتىلۋدە. ءدال سول كۇندەرى استانادا ءبىرقاتار نەمىس ساياساتكەرلەرى مەن ساراپشىلارىنىڭ قاتىسۋىمەن بەرلين ەۋرازيالىق كلۋبىنىڭ ەكىنشى وتىرىسى وتكىزىلەدى. گەرمانيادا كەڭىنەن تاراعان «دۋالدى» جۇيە نەگىزىندە قازاقستاندا بىرلەسىپ كاسىبي-تەحنيكالىق كادر دايىنداۋ باستاماسى ىلگەرىلەتىلەدى. وسى ورايدا, قازاقستاندا دۋالدى ءبىلىم بەرۋدى ەنگىزۋ تۋرالى ءتيىستى ەكىجاقتى قۇجات ازىرلەنۋدە.
قازاقستان مەن گەرمانيا قاتىناسىنداعى 20 جىلدىق كەزەڭدە ەلدەردىڭ يگىلىگىنە ارنالعان باسقا دا ماعىنالى وقيعالار مەن جوبالاردى اتاپ كورسەتۋگە بولادى. اسىرەسە, نەمىس تاراپى جاساعان ساپارلاردىڭ سانى ءوسىپ كەلەدى. 2010 جىلى فەدەرالدىق كانتسلەر انگەلا مەركەلدىڭ قازاقستانعا ەكى مارتە جولى ءتۇسىپ, استانادا وتكەن ەقىۇ سامميتىنىڭ جۇمىسىنا قاتىستى. 2010 جىلى قازاندا استاناعا بۋندەستاگ پرەزيدەنتى ن.لاممەرتتىڭ كەلۋىن دە ۇلكەن وقيعا قاتارىنا قوسقان ءجون. بۇل گەرمانيا پارلامەنتى تومەنگى پالاتاسى جەتەكشىسىنىڭ قازاقستانعا تۇڭعىش ساپارى بولعان ەدى. 2012 جىلى قاراشا ايىندا وتەتىن قازاقستان پارلامەنتى ءماجىلىسىنىڭ ءتوراعاسى ن.نىعماتۋلليننىڭ بەرلينگە جاۋاپ ساپارى پارلامەنتارالىق ىنتىماقتاستىققا ەلەۋلى سەرپىن بەرەدى دەپ ۇمىتتەندىرەدى.
ەكى ەل اراسىنداعى ساۋدا-ساتتىق ماسەلەلەرى دە ماڭىزدى باعىتتاردىڭ ءبىرى بولىپ قالا بەرمەك. 2011 جىلدىڭ قورىتىندىسى بويىنشا قازاقستان مەن گەرمانيا اراسىنداعى ساۋدا اينالىمى داعدارىسقا دەيىنگى دەڭگەيىنە جەتىپ, 6,2 ملرد. ەۋرونى (+20%) قۇرادى, بۇل – گفر-ءدىڭ ورتالىق ازيا مەملەكەتتەرىمەن بۇكىل سىرتقى ساۋدا كولەمىنىڭ 85 پايىزى دەگەن ءسوز. 2012 جىلدىڭ ءبىرىنشى جارتىجىلدىعىندا ساۋدا كورسەتكىشتەرى 3,1 ملرد. ەۋرو بولدى. ەلىمىزدە نەمىس كاپيتالىنىڭ قاتىسۋىمەن 1200-دەن استام مەكەمە تىركەلگەن. ءبىزدىڭ مەملەكەتتەرىمىز ساۋدا-ەكونوميكالىق ىنتىماقتاستىق ءجونىندەگى ۇكىمەتارالىق جۇمىس توبى مەن ستراتەگيالىق ىنتىماقتاستىق جونىندەگى ىسكەرلىك توبىنىڭ شەڭبەرىندە بەلسەندى تۇردە وزەكتى ماسەلەلەردى قاراستىرادى.
قازاقستان رەسپۋبليكاسى مەن گەرمانيا فەدەراتيۆتىك رەسپۋبليكاسىنىڭ اراسىنداعى ماڭىزدى بايلانىس رەتىندە نەمىس ۇلتىنىڭ قازاقستان ازاماتتارى (200 مىڭ ادام), سونداي-اق بۇرىن قازاقستاندا تۇرعان گەرمانيا ازاماتتارى (900 مىڭنان اسا ادام) بار ەكەنى بەلگىلى, ءبىز ولاردىڭ مۇقتاجدارىنا ەرەكشە نازار اۋدارامىز. قازاقستان رەسپۋبليكاسىندا ءومىر ءسۇرىپ جاتقان ەتنوستىق نەمىستەردىڭ ماسەلەلەرى بويىنشا قازاقستان-گەرمانيا ۇكىمەتارالىق كوميسسيانىڭ جۇمىسى ناتيجەلى جەتىستىكتەرگە قول جەتكىزدى. 2010 جىلدان باستاپ گۋمبولد اتىنداعى بەرلين ۋنيۆەرسيتەتىندە «قازاقستان جانە قازاق ءتىلى» لەكتوراتى اشىلىپ, بۇل ءجايت نەمىس ستۋدەنتتەرى اراسىندا قىزىعۋشىلىق تۋدىرىپ وتىر. ءبىز وسى ءبىرلەسكەن جوباعا ودان ءارى قولداۋ كورسەتۋ نيەتىندەمىز.
گفر سىرتقى ىستەر فەدەرالدىق ءمينيسترى گيدو ۆەستەرۆەللەنىڭ ءۇستىمىزدەگى جىلعى 29 تامىزدا قازاقستانعا رەسمي ساپارمەن كەلۋى جانە «يادرولىق سىناقتارعا تىيىم سالۋدان – يادرولىق قارۋسىز الەمگە» اتتى حالىقارالىق كونفەرەنتسياعا قاتىسۋى ەكى ەل اراسىنداعى ديپلوماتيالىق قارىم-قاتىناس ورناعان كۇننەن بەرى كەلە جاتقان جيىرما جىل ىشىندە قالىپتاسقان ستراتەگيالىق ىنتىماقتاستىق دەڭگەيىن, سونداي-اق حالىقارالىق پروبلەماتيكاعا قاتىستى كوزقاراستارىمىزدىڭ ورتاقتىعىن دالەلدەيدى دەگەن ويدامىز.
الداعى قازاقستان-گەرمانيا جوعارى دەڭگەيدەگى كەلىسسوزدەرى, قالىپتاسقان ءداستۇر بويىنشا, حالىقتارىمىز يگىلىگى ءۇشىن ودان ءارى كوپجاقتى ۇنقاتىسۋدى جالعاستىرۋعا جاڭا مۇمكىندىكتەر اشادى دەگەن سەنىمدەمىز.
نۇرلان ونجانوۆ,
قازاقستاننىڭ گەرمانياداعى توتەنشە جانە وكىلەتتى ەلشىسى.
