بۇكىل قوعام, بارلىق ادام – اقپاراتتىق تەحنولوگيا تۇتقاسىنا اينالدى. قالاداعى قىزمەت, زاۋىتتاعى جۇمىس, ەلدەگى شارۋا بۇگىندە اقپاراتتىق تەحنولوگيا تۇرلەرىنە تىعىز بايلانىستى. كومپيۋتەرسىز شارۋا بىتپەيدى, عالامتورسىز ۇدەرىس جوق. دەرەكتىڭ ءبارى كومپيۋتەردە. بايلانىس جولدارى كوپ, ءبىرى تولقىن شاشىپ اۋە ارقىلى تارالادى, ءبىرى ۇساق بولشەكتەردى اتقىلاي وتىرىپ الىستاعى ەكراندا گولوگرامما جاسايدى.
اقپارات ۇلعايعان سايىن ونى ساقتايتىن جادتىڭ كولەمى دە ۇلكەيە تۇسەدى, ءپىشىنى كىشىرەيە بەرەدى. بۇكىل الەم – ءبىر تۇيمە.
سوڭى نە بولادى, ەشكىم بىلمەيدى. بۇرىن اقپارات عالامشاردىڭ ەسىندە قالاتىن ەدى, قازىر عالام ادامنىڭ قالتاسىندا جۇرەدى.
جەردەگى اقپاراتتى اۋەلى ارحەولوگتار, سوسىن تاريحشىلار, كەيىن ءار سالالىق عالىمدار زەرتتەيتىن ەدى. بۇگىن كومپيۋتەردە راستالادى نە جالعاندىعى ايقىندالادى.
كومپيۋتەر ادام بالاسىنىڭ باستى ەڭبەك قارۋىنا اينالدى. ۇيدە دە, تۇزدە دە, قالادا دا, دالادا دا ەڭبەك شارتى – كومپيۋتەر. دالىرەك – عالامتور قوسىلعان كومپيۋتەر.
بەسەنەدەن بەلگىلى, كەز كەلگەن اقپارات كولىگى – ءتىل. ءتىل ەلدى ءبىر-بىرىمەن جالعايتىن كوپىرگە, ءبىر-بىرىنە اقپار-مالىمەت تاسىمالدايتىن, الماساتىن, جاسىراتىن جەلىگە اينالدى.
جارىق الاپات شاقىرىمداردا جىلدامدىقتان وزدى, جىلدامدىق كەڭىستىكتەردە دىبىستى ارتقا تاستادى.
ءبىر ورىندا تۇرعان وبەكتىڭ جوقتىعى, كۇللى عالامدى بىركەلكىلەندىردى. الەمدە ءبارى ءبىر-بىرىنە تەڭ, تىنىش كۇيدىڭ ءوزى قوزعالىستا, ابسوليۋتتىك كەڭىستىك نەمەسە ۋاقىت جوق, بۇكىل دەنەلەر كوورديناتتارى سالىستىرمالى. بۇل پرينتسيپ عالامتور جاساعاندا نەگىزگە الىندى. ءالى كۇنگە دەيىن باس پروتسەسسور جوق, جەلىگە بايلانعان بارلىق كومپيۋتەردىڭ مارتەبەلەرى بىردەي. مۇنداي تالاپ اقپاراتتىڭ بۇكىل جۇيەگە بىرىڭعاي تارالۋىنا مۇمكىندىك بەردى. اقپارات جۇكتەگەن كومپيۋتەر ىستەن شىعىپ قالسا دا, تۇسكەن مالىمەت جوعالمايتىن بولادى.
ءتىلدى تاڭبا تۇرعىسىندا تانىعان كونتسەپت عالامشار مەن عالامزاتتى ءماتىن رەتىندە كوردى, سانادى, ءتۇسىندى.
كلاۆياتۋرا باسقاندا ءسىز ءارىپ تەرمەيسىز, ءار قارىپكە بايلانىپ تۇرعان تسيفردى تۇرتەسىز.
تىلدەسۋ وڭاي بولا تۇسكەنىمەن, ءتۇسىنىسۋ قيىنداپ كەتتى. قازىر بايلانىس قۇرالدارىنىڭ بۇرىنعىداي قادىرى جوق. سويلەسۋدەن ءسىز باس تارتقانىڭىزبەن, باسقا بىرەۋ تىلدەسۋگە دايىن تۇرادى.
بايلانىستىڭ قاجەتسىز ءتۇرى كوبەيىپ كەتتى. ارينە ول سۇرانىستى تۋدىرعانىمەن, ءتۇپتىڭ تۇبىندە پايداسىز, قاجەتسىز ءىس-ارەكەت ەدى. قاجەتتىلىك قالىپتاسپاسا دا دۇنيە توڭكەرىلمەيتىن-ءدى.
تىلدەسۋ – ءومىر ءسۇرۋ. عالامتورسىز ءومىر جوق. تىرشىلىكتىڭ كەپىلى – شەكسىز ينتەرنەت.
ديدار امانتاي,
جازۋشى
