قاتىسۋشىلار وليمپيادادا ءوز ءبىلىم دەڭگەيىن دالەلدەي وتىرىپ, 300 گرانت پەن جەڭىلدىكتىڭ ءبىرىن ۇتىپ الۋ ءۇشىن سىنعا ءتۇستى. ايتا كەتكەن ءجون, بۇل وليمپيادا - جاستار جىلى اياسىندا ءبىلىم ىزدەگەن جاس تالاپكەرلەرگە ۋنيۆەرسيتەت تاراپىنان ۇسىنىلىپ وتىرعان تاپتىرماس مۇمكىندىك.
بيىلعى وليمپيادا بەسىنشى جىل وتكىزىلىپ وتىرعاندىقتان اۋقىمىن دا ءبىراز كەڭەيتىپ, رەسپۋبليكا اۋماعىنداعى ءىرى قالالار مەن شالعاي اۋدانداردى دا قامتىدى. SPT وليمپياداسىنا قاتىسۋعا جالپى سانى 11160 وقۋشى ءوتىنىش بىلدىرگەن. ونىڭ 10535-ءى ەمتيxانعا قاتىسۋعا رۇقسات الىپ, 619-ى ونلاين تىركەلۋ بارىسىندا وليمپيادا شارتتارىنا قۇجاتتارى ساي كەلمەگەنى ءۇشىن ەمتيحانعا جىبەرىلمەگەن بولاتىن. ۇيىمداستىرۋشىلار كەلتىرىپ وتىرعان ستاتيستيكاعا سايكەس, وليمپياداعا قاتىسۋعا قۇلشىنىسى جوعارى قالالاردىڭ ىشىندە الماتى (2170 وقۋشى) كوش باستاپ تۇر. سونداي-اق, شىمكەنتتەن 1243, قىزىلوردادان 847, استانادان 791 جانە اقتاۋ قالاسىنان 752 تالاپكەر قاتىسقان ەكەن. ارنايى بەلگىلەنگەن 22 تەست ورتالىعىنا جينالعان تالاپكەرلەر فيزيكا, گەوگرافيا, حيميا-بيولوگيا, اعىلشىن ءتىلى, ادەبيەت, تاريح پاندەرىنەن تەست تاپسىردى.
سدۋ ۋنيۆەرسيتەتىنىڭ كامپۋسى الماتى قالاسى ءۇشىن قازاقستان بويىنشا ەڭ ۇلكەن SPT تەست ورتالىعى رەتىندە بەلگىلەنىپ, مۇندا تەست تاپسىرۋعا كەلگەن 2170 تالاپكەر جانە 300-دەن استام اتا-انا بالالارىن قولداۋعا جينالدى. سدۋ تاراپىنان رەكتور, دەكاندار مەن سدۋ پروفەسسورلارىنىڭ قاتىسۋىمەن اتا-انالار مەن وليمپيادا قاتىسۋشىلارىنا ماماندىق تاڭداۋ, فاكۋلتتەرمەن تانىسۋ, باس ساراپشىلاردان كاسىبي كەڭەس الۋ, ۋنيۆەرسيتەت كامپۋسى بويىنشا ەكسكۋرسيا, شەبەرلىك ساعاتتارى مەن شەت تىلدەرىن ۇيرەنۋ بويىنشا ءىس-شارالار مەن مادەني ويىن-ساۋىق باعدارلاماسى ۇسىنىلدى.
قاتىسۋشىلاردىڭ ناتيجەسى 10 ناۋرىزدان كەيىن ۋنيۆەرسيتەتتىڭ رەسمي سايتىندا جاريالاناتىن بولادى. جەڭىمپازدار 4 وقۋ جىلىنا جارامدى گرانتتارمەن جانە جەڭىلدىك سەرتيفيكاتتارىمەن ماراپاتتالادى. SPT وليمپياداسىنىڭ سەرتيفيكاتىن پايدالانۋ ءۇشىن تالاپكەر ۇبت-دان نەبارى 50 ۇپاي جيناۋى جەتكىلىكتى بولىپ تابىلادى.
