ەۋروپامەن ارادا كوپىر بولۋعا دايىن

قازاقستان رەسپۋبليكاسى پارلامەنتى ءماجىلىسىنىڭ توراعاسى ورال مۇحامەدجانوۆ بۇرناعى كۇنى ەلىمىزگە مەملەكەتتىك ساپارمەن كەلگەن رۋمىنيا رەسپۋبليكاسىنىڭ پرەزيدەنتى ترايان باسەسكۋمەن كەزدەسىپ, ەكىجاقتى قارىم-قاتىناستار ماسەلەلەرى بارىسى تۋرالى اڭگىمەلەستى. سپيكەر ءوز سوزىندە ەكىجاقتى قارىم-قاتىناستاردا, سونداي-اق حالىقارالىق ساياساتتا ەكى ەلدىڭ اراسىندا ەشقانداي پروبلەمالار مەن قايشىلىقتاردىڭ جوقتىعىن اتاپ ءوتتى. ەۋروپا وداعى ەلدەرى­مەن ارىپتەستىك ورناتۋ قازاقستان سىرتقى ساياساتىنىڭ ماڭىزدى ءبىر باسىمدىعى بولىپ قالا بەرەدى. ەكىجاقتى قارىم-قاتىناستار ءىر­گەتاسىنىڭ نىعايۋىنا قازاقستان تاراپىنان قابىلدانعان “ەۋرو­پا­عا جول” باعدارلاماسى مەن ەۋ­رو­پا وداعىنىڭ ورتالىق ازيا ەلدەرى جونىندەگى ۇستانعان سترا­تەگياسى ءوز سەپتىگىن تيگىزىپ وتىر. سوندىقتان رۋمىنيا پرەزي­دەنتى­نىڭ بۇل ساپارى ەكىجاقتى قا­رىم-قاتىناستاردى دامىتۋدىڭ نىشانىنا اينالۋى ءتيىس, دەدى. ورال بايعونىس ۇلى. پارلامەنت جۇمىسى جانە ەل­دەگى جاعداي تۋرالى قىسقاشا ايتا كەتكەن سپيكەر “بۇگىنگى تاڭدا ماجىلىستە ەلباسىنىڭ بيىلعى جولداۋىندا جاريا ەتىلگەن قا­زاقستاننىڭ 2020 ستراتەگيالىق جوسپارىن جۇزەگە اسىرۋدىڭ نە­گىزىن قالايتىن زاڭ جوبالارى قا­رالىپ جاتىر. سول سەكىلدى يندۋس­تريالىق-يننوۆاتسيالىق باعدار­لا­مالاردىڭ ورىندالۋىن قامتا­ما­سىز ەتەتىن زاڭدار قابىلدانۋى كەرەك”, – دەدى. ءماجىلىس توراعا­سى مارتەبەلى مەيمانعا ەلىمىزدىڭ اتىنا ايتقان جىلى لەبىزى ءۇشىن ريزاشىلىعىن جەتكىزىپ, ەكى مەم­لەكەت باسشىلارى­نىڭ دوستىق بايلانىسىنىڭ ارقاسىندا ىنتى­ماق­تاستىق قارىم-قاتىناس جاڭا دەڭ­گەيگە كوتەرىلە­تىنىنە سەنىم ءبىلدىردى. ت.باسەسكۋ ءوز كەزەگىندە رۋمى­نيا قازاقستاننىڭ ەقىۇ-عا توراعالىق ەتۋىن بىردەن قولداعان مەملەكەت ەكەنىن, قازاقستان پرە­زيدەنتى نۇرسۇلتان نازارباەۆتىڭ استانادا ەقىۇ-نىڭ ءسامميتىن وتكىزۋ تۋرالى باستاماسىن دا قولدايتىنىن جەتكىزدى. ء“بىزدىڭ ەل قازاقستانمەن اراداعى قارىم-قاتىناستى نىعايتا ءتۇسۋدى ماقسات تۇتادى. ويتكەنى, قازاقستان – ورتالىق ازياداعى ساياسي تۇراق­تى­لىعى ساقتالعان, كەلەشەگى زور مەملەكەت. قازاقستان مەن ەۋرو­پالىق وداق اراسىندا رۋمىنيا ىنتىماقتاستىق كوپىرى ءرولىن ات­قارا الار ەدى. قازاقستان كاسىپ­كەر­لەرى ءبىزدىڭ ەلگە كەلىپ, ودان ءارى ەۋروپانىڭ وزگە مەملەكەت­تە­رى­نە بارىپ, وزدەرىنىڭ قىزمەت­تە­رىن دامىتۋىنا تولىق مۇمكىندىك بار”, – دەدى رۋمىنيا پرە­زي­دەنتى. وسى رەتتە ترايان باسەسكۋ نۇر­سۇلتان نازارباەۆتىڭ قازاق­ستان­نىڭ بەلدى دەگەن ساياسات­كەر­لەرىمەن كەزدەسۋگە مۇمكىندىك جاساعانى ءۇشىن ريزاشىلىعىن جەتكىزدى. ءوزىنىڭ بۇل ساپارى ءبىر عانا ماقساتتى, ياعني ەكىجاقتى ءارىپ­تەستىكتى نىعايتۋ ماقساتىن كوز­دەيتىندىگىن اتاپ كورسەتتى. ءمار­تەبەلى مەيمان ءوز ەلىنىڭ ور­تالىق ازيا مەن ەۋروپا وداعى اي­ماعىن جالعاستىراتىن كوپىر بولۋعا دايىن ەكەندىگىن دە قاي­تالاي جەتكىزدى. ارينە, مۇنداي ءرول­دى اتقارۋ ۇلكەن جاۋاپكەر­شى­لىك جۇكتەسە, بۇل ورايدا قازاق­ستانمەن تىعىز قارىم-قاتىناس ورناتۋدىڭ ءمانى دە ەرەكشەلەنە تۇسەدى. ەكەۋارا اڭگىمە بارىسىندا ءماجىلىس توراعاسى رۋمىنيا قا­زاق­ستاننىڭ ورتالىق-شىعىس ەۋرو­پاداعى باستى ەكونوميكالىق ارىپتەسى ەكەنىن اتاپ ءوتتى. الەم جۇرتشىلىعىن اۋرەگە سالعان قار­جى داعدارىسى دا ەكى ەلدىڭ ارا­سىن­داعى ساۋدا اينالىمىنا كوپ اسەرىن تيگىزە قويماعان. كەزدەسۋدەن كەيىن رۋمىنيا پرەزيدەنتى ءما­جىلىستىڭ قۇرمەتتى قوناقتار كىتا­بىنا تىلەگىن جازىپ, قولتاڭباسىن قالدىردى. وسى كەزدەسۋگە ءماجىلىس دەپۋتاتتارى امزەبەك جولشى­بەكوۆ, گۇلجان قاراعۇسوۆا جانە ناتاليا گەللەرت قاتىستى. سول كۇنى مارتەبەلى مەيمان قا­زاقستان رەسپۋبليكاسى پرەزي­دەنتى جانىنداعى مەملەكەتتىك باس­قارۋ اكادەمياسىنىڭ پروفەس­سور­لىق-وقىتۋشىلار قۇرامىمەن جانە تىنداۋشىلارىمەن كەزدە­سىپ, ولاردىڭ الدىندا لەكتسيا وقى­دى. ونىڭ تاقىرىبى قازاق­ستان-رۋمىنيا قارىم-قاتىناسىن دامىتۋ مەن وڭىردەگى احۋالعا ارنالدى. ارتىنان ول تۇڭعىش پرەزيدەنت مۇراجايىن ارالاپ, وندا قويىلعان ەكسپوناتتارمەن تانىستى. ودان كەيىن وتان قورعاۋشىلار مونۋمەنتىندەگى ماڭگى الاۋعا گۇل شوقتارىن قويدى جانە “استاناباسجوسپار” عيماراتىن­دا بولىپ, استانانىڭ دامۋى با­رى­سىنان جان-جاقتى ماعلۇمات الدى. ءتۇس اۋا رۋمىنيا پرەزي­دەن­تى قاراعاندى قالاسىنا ۇشىپ كەتتى.