24 ساعات
سارسەنبى, 25 قاڭتار 2012 7:54
فرانتسيا سەناتى دا وسى ەل پارلامەنتىنىڭ تومەنگى پالاتاسى سەكىلدى ارمياندارعا قارسى گەنوتسيدتى مويىنداۋدان باس تارتقاندارعا قىلمىستىق جاۋاپكەرشىلىكتى قاراستىراتىن زاڭ جوباسىن ماقۇلدادى. ول بويىنشا كىنالى دەپ تابىلعان ادام 40 مىڭ ەۋرو ايىپپۇل تولەيدى نەمەسە 1 جىلعا سوتتالادى. فرانتسيانىڭ قادامىن ءتۇركيا فرانتسۋز تاراپى جاۋاپسىزدىعىنىڭ جارقىن مىسالى دەپ مالىمدەدى.
سارسەنبى, 25 قاڭتار 2012 7:54
فرانتسيا سەناتى دا وسى ەل پارلامەنتىنىڭ تومەنگى پالاتاسى سەكىلدى ارمياندارعا قارسى گەنوتسيدتى مويىنداۋدان باس تارتقاندارعا قىلمىستىق جاۋاپكەرشىلىكتى قاراستىراتىن زاڭ جوباسىن ماقۇلدادى. ول بويىنشا كىنالى دەپ تابىلعان ادام 40 مىڭ ەۋرو ايىپپۇل تولەيدى نەمەسە 1 جىلعا سوتتالادى. فرانتسيانىڭ قادامىن ءتۇركيا فرانتسۋز تاراپى جاۋاپسىزدىعىنىڭ جارقىن مىسالى دەپ مالىمدەدى.
سيريا باسشىلىعى اراب مەملەكەتتەرىنىڭ ليگاسى (امل) ۇسىنعان قاندايدا ءبىر باستامالاردان باس تارتاتىنىن جاريا ەتتى. مۇنداي مالىمدەمەنى سيريانىڭ سىرتقى ىستەر ءمينيسترى ۆاليد مۋاللەم جاسادى. ول سونداي-اق امل-ءدى سيريانىڭ ىشكى جانجالىن حالىقارالىق دەڭگەيگە شىعارۋعا ارەكەتتەنىپ وتىر دەپ سىن تەزىنە الدى.
ۇلىبريتانيانىڭ تازا قارىزى 1993 جىلدان بەرى العاش رەت رەكوردتىق كورسەتكىشكە جەتىپ, 1,19 تريلليون ەۋرونى قۇرادى. بۇل جالپى قارىز بەن ۆاليۋتا رەزەرۆى اراسىنداعى ايىرماشىلىق بولىپ تابىلادى. اتالعان قارجى ەل ىشكى جالپى ءونىمىنىڭ 64,2 پايىزى دەگەن ءسوز.
يزرايل اسكەريلەرى كەشە ەرتەڭگىسىن حاماس قوزعالىسىنان پالەستينالىق دەپۋتات ابۋل دجاببار فۋكاحانى قاماۋعا الدى. ول ءوزىنىڭ ۇيىندە تۇتقىندالدى. سوڭعى 5 كۇن ىشىندە فۋكاحا يزرايل تۇتقىنداعان ءتورتىنشى پالەستينالىق دەپۋتات بولىپ وتىر. ال قازىرگى كەزدە يزرايل تۇرمەلەرىنە اتالعان قوزعالىستىڭ 24 دەپۋتاتى قامالعان.
اقش-تىڭ فەدەرالدى تەرگەۋ بيۋروسى لاڭكەستىككە قاتىسى بار دەگەن كۇدىكپەن وزبەكستاندىق بوسقىندى قاماۋعا الدى. كولورادو شتاتىندا تۇرىپ جاتقان 35 جاستاعى وزبەك ەميگرانتى جامشيد مۋحتوروۆ حالىقارالىق و’حارا اۋەجايىندا تۇتقىندالعان. ول پاكستاندا ورىن تەپكەن لاڭكەستىك توپقا قوسىلماق نيەتىندە بولعانىن جاسىرماسا كەرەك.
رەسەي سۋداننان ءوز بىتىمگەرشىلەرىن شىعاراتىن بولدى. وسىنداي جارلىققا رەسەي پرەزيدەنتى د.مەدۆەدەۆ قول قويدى. جارلىق بۇۇ قاۋىپسىزدىك كەڭەسىنىڭ 2011 جىلدىڭ 11 شىلدەسىندەگى سۋدانداعى بىتىمگەرشىلىك ميسسياسىن اياقتاۋ جونىندەگى شەشىمىنە وراي شىعارىلدى.
قىرعىزستاندا 400-دەن استام تۇتقىن نارازىلىق رەتىندە اۋىزدارىن تىگىپ تاستادى. وسىلايشا ولار وزدەرىنىڭ بىشكەكتەگى سيزو-1 قىزمەتكەرلەرىنىڭ قاتىگەزدىگىنە نارازىلىقتارىن ءبىلدىردى. اتالعان تۇزەۋ ورنىندا جاقىندا تارتىپسىزدىكتەر قاتاڭ باسىلعان بولاتىن.
اقش پرەزيدەنتى باراك وباماعا اتلانتاداعى سوتقا كەلۋ ءمىندەتتەلدى. تالاپتىڭ مازمۇنى مىناداي: ول اقش اۋماعىندا تۋماعاندىقتان, پرەزيدەنت بولا المايدى. اتالعان ءىس بويىنشا تىڭداۋ 26 قاڭتارعا بەلگىلەنگەن. ءىستى اكىمشىلىك-قۇقىق بۇزۋشىلىق بويىنشا سۋديا جۇرگىزۋى ءتيىس. تالاپتى دجوردجيا تۇرعىنى بەرگەن كورىنەدى.
رەسەي ليبەرال-دەموكراتيالىق پارتياسىنىڭ سەركەسى ۆلاديمير جيرينوۆسكي مەملەكەتتىك دۋماعا اقش-تىڭ جاڭا ەلشىسىنىڭ وپپوزيتسيامەن كەزدەسۋىنە بارعان ءۇش دەپۋتات – ي.پونومارەۆ پەن و.دميتريەۆانى جانە ل.كالاشنيكوۆتى جازالاۋدى ۇسىندى. باس ليبەرال-دەموكراتتىڭ پىكىرىنشە, كەزدەسۋگە قاتىسقان دەپۋتاتتار مانداتتارىن وزدەرى تاپسىرۋلارى ءتيىس نەمەسە ولاردى مەملەكەتتىك دۋمادا وتىرۋ قۇقىنان ايىرۋ قاجەت.
ماسكەۋ مەتروسىندا جاپپاي توبەلەس سالدارىنان 1 ادام اۋىر جاراقات السا, 8-ءى قامالعان. توبەلەسكە 9 ادام قاتىسسا, 2-ءۋى قىرعىزستان ازاماتى كورىنەدى. ەكى قىرعىز دا ماسكەۋدە وتكەن جىلدىڭ شىلدەسىنەن بەرى تىركەۋ قۇجاتىنسىز ءجۇرىپتى. توبەلەسكە قاتىسقانداردىڭ بارلىعى قىزۋ ەكەن.
اقپارات اگەنتتىكتەرىنىڭ ماتەريالدارى نەگىزىندە ازىرلەندى.
