ءىس-شارانى قۇقىقتىق ماسەلەلەر مەن حالىقارالىق قاتىناستار جونىندەگى كوميسسياسىنىڭ توراعاسى يسمەت ۋچما جۇرگىزدى. كۇن تارتىبىندە تۇركپا-عا مۇشە ەلدەردەگى جوعارى ءبىلىم بەرۋ سالاسىنداعى ەكۆيۆالەنتتىك پروتسەستەر, تۇركى الەمىنە ورتاق قۇندىلىقتار مەن تاريحي-مادەني مۇرالارىن ساقتاۋ جانە قورعاۋ, باسقا دا ماسەلەلەر قارالدى.
وتىرىسقا ءماجىلىس دەپۋتاتتارى, ءازىربايجان, قىرعىزستان, تۇركيا ەلدەرىنىڭ پارلامەنتشىلەرى, تۇركپا قۇقىقتىق ماسەلەلەر جانە حالىقارالىق قاتىناستار جونىندەگى كوميسسيا مۇشەلەرى, مۇشە-پارلامەنتتەردىڭ زاڭ دەپارتامەنتتەرىنىڭ وكىلدەرى, تۇركى ىنتىماقتاستىق ۇيىمدارىنىڭ وكىلدەرى قاتىستى.
2014 جىلعى 18 ناۋرىزدا ستامبۋلدا وتكەن ءبىرىنشى سەميناردا تاراپتار ەۋروپالىق وداق پەن تاۋەلسىز مەملەكەتتەر دوستاستىعى پارلامەنتارالىق اسسامبلەياسى كونتەكستىندە ءوز تاجىريبەلەرىمەن ءبولىستى. ال 2016 جىلعى 18 ناۋرىزدا انكارادا وتكەن ەكىنشى سەميناردا, تاراپتار ءوز ەلدەرىندەگى وتىرىستىڭ اتاۋىنا قاتىستى قولدانىستاعى قۇقىقتىق بازامەن, ياعني مادەني بايلىقتى ساقتاۋ جانە دامىتۋ بويىنشا بىرلەسكەن زاڭنامالىق كۇش-جىگەرمەن ءبولىسىپ, مادەنيەت جانە تۋريزم سالاسىنداعى ناقتى تاقىرىپتار بويىنشا جۇمىستى جالعاستىرۋدى شەشتى.
ال, بۇگىنگى وتكەن شارانىڭ ماقساتى – زاڭنامانى ۇيلەستىرۋ ۇدەرىسىن جاقسارتۋ ءۇشىن ناقتى تاقىرىپتارى مەن كۇنتىزبەلىك جوسپارى بار جول كارتاسىن انىقتاۋ. وتىرىس بارىسىندا تۇركيا رەسپۋبليكاسى ۇلتتىق جينالىسىنىڭ ساراپشىسى ەردجان دۋردۋلار تۇركى الەمىنىڭ ماتەريالدىق ەمەس مادەني مۇراسىن قورعاۋ تۋرالى مودەلدىك زاڭمەن تانىستىردى. ءازىربايجان رەسپۋبليكاسى ميللي مەدجليسىنىڭ مەملەكەتتىك قۇرىلىس زاڭناماسىنىڭ ديرەكتسياسى باسشىسىنىڭ ورىنباسارى فۋاد ماممادوۆ, تۇركى اكادەمياسىنىڭ پرەزيدەنتى دارحان قىدىرالى تاقىرىپ بويىنشا باياندادى.
سونىمەن قاتار, وسى كۇنى پارلامەنتشىلەر تۇركپا قۇقىقتىق ماسەلەلەر جانە حالىقارالىق قاتىناستار جونىندەگى كوميسسياسىنىڭ جەتىنشى وتىرىسىنىڭ جۇمىسىنا قاتىستى. وندا تۇركپا-عا قاتىسۋشى-ەلدەردەگى جوعارى ءبىلىم بەرۋدەگى بالامالىلىق ۇدەرىستەرىنىڭ ماسەلەلەرى تالقىلاندى.
بايانداماشىلار جوعارى ءبىلىمنىڭ تۇراقتى ەكونوميكالىق جانە الەۋمەتتىك دامۋداعى رولىنە ەرەكشە توقتالدى. وسى ورايدا تۇركپا-عا قاتىسۋشى ەلدەردىڭ ساپالى دا, ساندىق جاعىنان جوعارى ءبىلىم بەرۋدىڭ جاقسى دامىعان جانە وزىق جۇيەلەرى بار ەكەندىگى ايتىلدى. تۇركپا-عا قاتىسۋشى ەلدەر قۇقىقتىق جانە ينستيتۋتسيونالدىق شەڭبەرلەرىن نىعايتا وتىرىپ, وزدەرىنىڭ جەكە وقۋ جۇيەلەرىن ءارى قاراي دامىتىپ, جوعارى ءبىلىمدى جاقسارتۋعا ۇلكەن ۇلەس قوسا الاتىنى اتاپ ءوتىلدى.
تالقىلاۋ قورىتىندىسى بويىنشا ءتيىستى ۇسىنىمدار قابىلداندى.
