- رەسەيدەگى گران-پري تۋرنيرىندە ءبىز العاش رەت ۇزدىك بەس كوماندا قاتارىنا ەندىك. بۇگىنگە دەيىن ءبىزدىڭ الدىمىزدى وراپ كەلگەن تۇركيا مەن ءازىربايجان قىزدارىنان وسى جولى وزدىق. بۇل باسىمدىقتى ءارى قاراي ارتتىرا تۇسكىمىز كەلەدى. ماسكەۋدەگى باسەكە جىلدىڭ ەڭ العاشقى رەسمي دوداسى بولعاندىقتان, كوماندالار مەن جەكەلەي سىن قاتىسۋشىلارى كوپتەگەن قاتەلىكتەر جىبەردى. ويتكەنى, ماۋسىم باسىندا بارلىعى دا جاڭا باعدارلاما دايىندايدى. ال ونى اينا-قاتەسىز ورىنداپ, ء«پىسىرۋ» ءۇشىن ءالى ۋاقىت كەرەك. گيمناستار شامامەن كوكتەمنىڭ اياعى مەن جاز باستالعاندا ناعىز بابىندا بولادى, - دەيدى باپكەر.
توپتىق جاتتىعۋدان قازاقستان كومانداسىندا التى سپورتشى ونەر كورسەتەدى.
ولار: دجەسسيكا بۋدنيك, دايانا جاكۋپوۆا, رەگينا سۇلتانوۆا, جانەركە داۋلەتقۇلوۆا, ساعينا مۇراتقىزى جانە داريا شارافيدەنوۆا.
- گيمناستاردىڭ بارلىعى دەرلىك مەنىڭ كوز الدىمدا ءوستى. ولاردى التى جاسىنان باستاپ تاربيەلەدىم. بۇگىندە ولار سۇلۋ ءارى سىمباتتى قىزدارعا اينالدى. ولار بۇرىن استانا قالاسىنىڭ كومانداسى رەتىندە باق سىناعان, ەندى مىنە, ۇلتتىق قۇرامانىڭ نەگىزىن قالاپ وتىر. تەك ەكى سپورتشىنى باسقا قالادان تاپقانىمىزدى ايتقىم كەلەدى. جانەركە داۋلەتقۇلوۆا تاراز, ساعينا مۇراتقىزى شىمكەنت قالاسىنداعى كوركەم گيمناستيكا مەكتەبىنىڭ تۇلەگى. ەكەۋىن ازىرگە ءبىر باعدارلاماعا قوسىپ ءجۇرمىن, بولاشاقتا شىڭدالا تۇسەرى ءسوزسىز. قىزداردىڭ ءبارى تالانتتى, ءبارى سۇلۋ, - دەيدى وكسانا نەچيتايلو.
باپكەردىڭ ايتۋىنشا, گران-پري كەزەڭدەرىن باعالايتىن تورەشىلەر قاتارىنا قازاقستاندىقتار ەنبەگەن. بۇعان بىزدەگى تورەشىلەر كىشى ساناتتا بولۋى اسەر ەتىپ وتىر.
- توپتىق جاتتىعۋعا باعا بەرەتىن قازىلار قاتارىندا ءبىزدىڭ وكىلىمىز جوق. گيمناستار ونەرىن باعالاۋدى جوعارى ساناتتى تورەشىلەرگە تاپسىرادى. وكىنىشكە قاراي, سانتى تومەن بولعاندىقتان, قازاقستاندىق ماماندار قازىلار قۇرامىنا ەنبەگەن. نەگىزى, وزىمىزدەن ءبىر تورەشىنىڭ توردە وتىرعانى ارتىق بولمايدى. كەلەسى ماۋسىمدا وسى ماسەلە وڭ شەشىمىن تاپسا دەگەن تىلەگىم بار. ال جالپى دايىندىققا كەلەر بولساق, ايتارلىقتاي قيىندىق جوق. استاناداعى فەدەراتسيانىڭ ارنايى زالىندا دايىندالامىز. ۇلتتىق وليمپيادالىق كوميتەتى بار شىعىنىمىزدى كوتەرىپ, جاعدايىمىزدى جاساۋدا, - دەيدى باپكەر.
كوركەم گيمناستيكادان قازاقستان كومانداسى ناۋرىز ايىندا ۋكراينا استاناسى كيەۆتە وتەتىن گران-پري كەزەڭىنە دايىندالۋدا. قۇراما الدىندا ازيا جانە الەم چەمپيوناتتارىندا ءساتتى ونەر كورسەتۋ مىندەتى تۇر.
- ءبىزدىڭ كوماندامىز ءالى جاس. ماسكەۋدەگى تۋرنيردەن سوڭ كوپتەگەن شەتەلدىك مامانداردىڭ كوڭىلىنەن شىققان جايىمىز بار. ايتارلىقتاي قاتەلىك جىبەرمەدىك. ماۋسىم باسى بولعاندىقتان, ەڭ مىقتى دەگەن رەسەي قۇراماسىنىڭ ءوزى بىلگەنىنەن جاڭىلدى. دەگەنمەن, گيمناستاردى بۇل ءۇشىن كىنالاۋعا بولمايدى. ەڭ ماڭىزدى جارىستىڭ ءبارى الدا. جازدا تايلاندتا وتەتىن ازيا چەمپيوناتى مەن قىركۇيەك ايىندا باكۋدە وتەتىن الەم چەمپيوناتىنا قاتىسۋ جوسپارى تۇر. سول سىنداردا ايانىپ قالماۋعا تىرىسامىز. ارينە, وليمپيادا جولداماسى دا ويىمىزدا. بىراق ليتسەنزيا جەڭىپ الۋ وڭايعا سوقپايدى, - دەدى كوماندا باپكەرى.
