العىس ايتۋ كۇنىن مەرەكەلەۋ اياسىندا استانا قالاسىنىڭ ەتنيكالىق بىرلەستىكتەرىنىڭ وكىلدەرى بوتانيكالىق باقتا «قازاق ەلىنە مىڭ العىس!» مونۋمەنتىنە گۇل شوقتارىن قويدى. العىس كۇنى 1 ناۋرىزدا, قازاقستان حالقى اسسامبلەياسىنىڭ قۇرىلعان كۇنى مەرەكەلەنەدى. مەيرامنىڭ باستى يدەياسى – قوعامدىق كەلىسىم مەن ازاماتتىق بىرەگەيلىكتى, جالپىۇلتتىق بىرلىكتى نىعايتۋ.
مەرەكە 2016 جىلى پرەزيدەنت نۇرسۇلتان نازارباەۆتىڭ جارلىعىمەن بەكىتىلگەن. «استانا اكىمى باقىت سۇلتانوۆتىڭ اتىنان سىزدەردى كەلە جاتقان مەرەكەمەن قۇتتىقتاۋعا رۇقسات ەتىڭىزدەر. جەر اۋدارۋدىڭ قورقىنىشتى جىلدارىن باستان كەشكەن جانە قازاقستاندى جاڭا وتان تۇتقان ادامدارعا قۇرمەت رەتىندە بۇل كۇن بارلىق قازاقستاندىقتاردىڭ جادىندا قالادى. سول كەزدە ەركىنەن تىس بىرنەشە ۇلت وكىلى قازاق دالاسىنا جەر اۋدارىلدى. قازاق دالاسى قانشالىقتى كەڭ بولسا, حالىقتىڭ رۋحى دا سونشالىقتى دارحان. جەر اۋدارىلعان حالىققا زور ىقىلاس, كومەك جانە قامقورلىق كورسەتتى. قازاقستاندى ءوز ءۇيى سانايتىن ادامداردىڭ ءبىر ۇرپاعى ءوستى. ۇلكەندەرگە ءوز ەتنوسىنىڭ داستۇرلەرىن قولداۋ جانە باسقا حالىقتاردىڭ مادەنيەتىن سىيلاعانى ءۇشىن العىس ايتامىن», – دەدى استانا قالاسى اكىمىنىڭ ورىنباسارى نۇرلان نۇركەنوۆ.
«قازاق ەلىنە مىڭ العىس!» مونۋمەنتى استانانىڭ 20 جىلدىعىن مەرەكەلەۋ اياسىندا قاراعاندى وبلىسىنىڭ قولداۋىمەن ورناتىلدى. ول قۋعىن-سۇرگىن جىلدارى قازاقستانعا قونىستانعان كوپتەگەن ۇلت وكىلدەرىن قابىلداعان قازاق حالقىنىڭ مەيىرباندىعىن بىلدىرەدى. كومپوزيتسيانىڭ ورتاسىندا وزگە ۇلتتىڭ 3 ءسابيىن قورعاشتاپ تۇرعان جاس قازاق ايەل بەينەلەنگەن. «بۇگىن ءبىز ءۇشىن تولعانىسقا تولى كۇن. ءبىز گۇل شوقتارىن قويىپ, سول جىلدارى كوپتەگەن حالىقتاردى قۇشاق جايا قارسى العانى ءۇشىن قازاق جەرىنە تاعى دا العىس ايتامىز. مەنىڭ انام وتكەن جىلى 100 جاسقا تولدى. بۇگىن ول بايىرعى حالىقتىڭ مەيىرىمدىلىگى مەن كومەگى بىزگە جاڭا ءۇي, وتاندى تابۋعا قالاي كومەكتەسكەنىن ك ۇلىمسىرەپ, تەرەڭ قۇرمەتپەن ەسكە الادى. ءبىز وركەندەۋ مەن مۇمكىندىكتەرگە تولى تاتۋ ەلدە ءومىر ءسۇرىپ جاتقانىمىزعا ۇلكەن راحمەت ايتامىز», – دەپ ءوز اسەرىمەن ءبولىستى استانا قالاسى «كارىستەردىڭ ەتنومادەني بىرلەستىگى» قوعامدىق بىرلەستىگى توراعاسىنىڭ ورىنباسارى روزا پاك.
سالتاناتتى شاراعا قر پرەزيدەنتى اكىمشىلىگىنىڭ قىزمەتكەرلەرى, قحا دەپۋتاتتارى, ەتنومادەني بىرلەستىكتەردىڭ وكىلدەرى, «جاڭعىرۋ جولى» رەسپۋبليكالىق جاستار قوزعالىسىنىڭ بەلسەندىلەرى, قوعام قايراتكەرلەرى, ەلوردا تۇرعىندارى مەن قوناقتارى قاتىستى. العىس كۇنىن مەرەكەلەۋ اياسىندا قازاقستاندا 1,5 مىڭنان استام ءتۇرلى مادەني-بۇقارالىق جانە قايىرىمدىلىق ءىس-شارالار وتەدى. ولارعا 1,4 ملن استام ادام قاتىسادى دەپ كۇتىلۋدە.
