«نۇر وتان» پارتياسىنىڭ كەزەكتى XVIII سەزىندە ەلىمىزدىڭ دەنساۋلىق ساقتاۋ سالاسىن دامىتۋعا قاتىستى جاۋاپتى مىندەت پەن ناقتى تاپسىرما جۇكتەلدى. مەملەكەت باسشىسى نۇرسۇلتان نازارباەۆ اتاپ ايتقانداي, مەديتسينا سالاسىنا بولىنەتىن قوسىمشا قارجى ۇلتىمىزدىڭ دەنساۋلىعىن ساقتاۋعا قىزمەت ەتىپ, سالاماتتى ۇرپاق قالىپتاستىرۋعا جۇمسالۋى ءتيىس.
انىعىندا, «وتاندىق مەديتسينا, ەڭ الدىمەن, پروفيلاكتيكا مەن سالاماتتى ءومىر سالتىن ىنتالاندىرۋدى باعدار ەتكەنى ءجون. قوعامدىق دەنساۋلىق ساقتاۋ قىزمەتى مەن باستاپقى مەديتسينالىق-سانيتارلىق كومەك شىعىستارى دەنساۋلىق ساقتاۋدى قارجىلاندىرۋدىڭ جالپى كولەمىندە 40-تان 60 پايىزعا دەيىن ۇلعايتىلۋى ءتيىس. بۇل – الەمدەگى بارلىق دامىعان ەلدىڭ تاجىريبەسى. دەنساۋلىق ساقتاۋ سالاسىن دامىتۋعا قوسىمشا 120 ميلليارد تەڭگە ءبولۋدى تاپسىرامىن», دەگەن ەلباسى ءسوزى بارلىق ارىپتەسىمە ءوزىمىز تاڭداعان قىزمەتتىك سالامىزدى قولداۋ عانا ەمەس, دارىگەردىڭ پارىزى مەن جاۋاپكەرشىلىگىن دە ەسەلەپ ارتتىرۋدى مىندەتتەيدى.
راس, ادام جانىنا اراشا تۇرۋ دارىگەردىڭ كاسىبي پارىزى بولعانىمەن, قازىرگى زامانعى تەحنيكانىڭ دامۋى مەديتسينا ءۇشىن ارقا سۇيەيتىن ماڭىزدى بولىككە اينالدى. ياعني, دامىعان تەحنولوگيا دەرتتى دەر كەزىندە انىقتاۋعا, كۇردەلى وتا جاساۋداعى دالدىكتى قامتاماسىز ەتۋگە تاپتىرماس كومەكشىنىڭ ورنىن باستى. دەمەك, ءبىزدىڭ قىزمەتىمىز ءاردايىم وسى قۇرال-جابدىقپەن تىعىز بايلانىستا بولا بەرمەك. وسى ورايدا ءبىزدىڭ الماتى وبلىسىنداعى دەنساۋلىق ساقتاۋ سالاسىنىڭ جۇمىسىنا كوز جۇگىرتىپ, اتقارىلعان ىسكە توقتالا كەتكەن ورىندى. بۇگىنگى ايماقتاعى ەمحانالاردى قاجەتتى قۇرال-جابدىقپەن قامتۋ جۇمىسى وڭ باعىتتا ءجۇرىپ جاتىر. وڭىردە مەديتسينالىق جابدىقتارمەن قامتاماسىز ەتۋ دەڭگەيى 83 پايىزعا دەيىن جەتتى. ونىڭ ىشىندە ناۋقاسقا ءبىرىنشى قول ۇشىن سوزاتىن جەدەل جاردەم قىزمەتىنە ەرەكشە جاعداي جاسالۋدا, ياعني سانيتارلىق اۆتوكولىكپەن قامتۋ 78 پايىزعا دەيىن ارتتى.
قازىرگى كۇنى دەنساۋلىق سالاسىنىڭ جۇمىسىن تسيفرلى باعىتقا كوشىرۋ ماماندار ءۇشىن دە, تۇرعىندار ءۇشىن دە ءتيىمدى بولىپ وتىر. وسى باعىتتا ايماقتا «جەتىسۋ» مەديتسينالىق اقپاراتتىق جۇيەسى ەنگىزىلۋدە. بۇل بويىنشا تۇرعىندار قاجەتتى سۇراقتارى مەن كەرەكتى قىزمەتتى ءموبيلدى قوسىمشالار ارقىلى الۋعا قول جەتكىزەدى. دارىگەر قابىلداۋىنا جازىلۋ, قاجەتتى مامان كەڭەسى, اۋرۋحانا كەزەگى سياقتى قىزمەتتەر وڭتايلانىپ, ناۋقاسقا قولايلى جاعداي تۋدى. وسى جەردە ازاماتتاردى «ەلەكتروندى دەنساۋلىق پاسپورتىمەن» قامتۋ تۋرالى ايتقان ءجون. قازىر وبلىس تۇرعىندارىنىڭ 83 پايىزىندا بۇل قۇجات بار. ال مەديتسينا مەكەمەلەرىنىڭ 53 پايىزى قاعازسىز قۇجات اينالىمىنا ءوتتى.
وڭىردەگى ادام دەنساۋلىعىن قورعاۋعا باعىتتالعان شارانىڭ ماڭىزدىسى, مەديتسينالىق قىزمەت كورسەتەتىن ەمحانا مەن اۋرۋحانالاردىڭ تيىمدىلىگىن ارتتىرۋ بولىپ وتىر. وكىنىشكە قاراي, كوپ اۋداندا مەكەمە عيماراتتارى ەسكىرگەن, ورىن جەتىسپەۋشىلىگى بار. قۋانىشتىسى, وبلىس اكىمدىگى بۇل ماسەلەنى شەشۋدى قولعا الدى. وتكەن جىلى وبلىس بويىنشا دەنساۋلىق ساقتاۋ سالاسىندا 15 نىسان جاڭادان سالىندى. بيىل تاعى 12 نىساننىڭ قۇرىلىسى اياقتالماق. اسىرەسە اۋدان ورتالىقتارىنداعى اۋرۋحانالاردىڭ كۇردەلى جوندەۋدەن ءوتىپ, جاڭا عيماراتقا كوشۋى دارىگەرلەردىڭ جۇمىسىنا جاردەم بەرىپ, ەم-دوم ساپاسىن ارتتىراتىنى انىق.
نەگىزى, جاقسى ءسوزدى كوپ ايتقان دۇرىس. مەن وتكەن جىلى ارىپتەستەرىمنىڭ كاسىبي قىزمەتىنىڭ ارقاسىندا وبلىستاعى جالپى ءولىم-ءجىتىم كورسەتكىشىنىڭ 3,6 پايىزعا ازايعانىن اتاپ كەتكىم كەلەدى. بۇل مەملەكەتىمىزدىڭ مەديتسينا سالاسىنا جاساعان قولداۋى مەن اق جەلەڭدى جانداردىڭ جۇمىس ساپاسىنا ماڭىز بەرۋىنىڭ ايقىن كورىنىسى. ال «نۇر وتان» پارتياسىنىڭ كەزەكتى XVIII سەزىندە دەنساۋلىق ساقتاۋ سالاسىن دامىتۋعا قاتىستى ەلباسى بەرگەن تاپسىرما وسى جۇمىستى شيراتىپ, ودان ءارى جانداندىرا تۇسەدى.
ومىرزاق نيزبەكوۆ,
الماتى وبلىستىق دەنساۋلىق ساقتاۋ باسقارماسى باسشىسىنىڭ ورىنباسارى
تالدىقورعان
