فوتو: primeminister.kz
«ەلباسى كەز كەلگەن ەكونوميكالىق جەتىستىكتەر ءاربىر ادامنىڭ ءال-اۋقاتىنىڭ وسۋىنە جول اشۋى كەرەك ەكەنىن ايتىپ ءوتتى. وسىعان وراي, ەلباسىنىڭ "الەۋمەتتىك قامقورلىق" جاڭا الەۋمەتتىك باستامالارى ەلىمىزدى الەۋمەتتىك دامۋدىڭ جاڭا دەڭگەيىنە شىعارۋى ءتيىس», — دەدى ا. مامين.
حالىقتىڭ تۇرمىس ساپاسىن ارتتىرۋ جانە قازاقستاندى الەۋمەتتىك باعدارلانعان مەملەكەت رەتىندە دامىتۋ — ءاربىر ۇكىمەت مۇشەسى ءۇشىن نەگىزگى باسىمدىق بولۋى ءتيىس.
پرەمەر-مينيستر كەلەسى باعىتتار بويىنشا مەملەكەت باسشىسىنىڭ جاڭا الەۋمەتتىك ساياساتىن ىسكە اسىرۋعا دەرەۋ كىرىسۋدى تاپسىردى:
- حالىقتىڭ تابىسىن ارتتىرۋ جانە تۇرمىسى تومەن ادامداردى قولداۋ;
- كوپبالالى جانە از قامتىلعان وتباسىلاردى تۇرعىن ۇيمەن قامتاماسىز ەتۋ;
- ءبىلىم بەرۋ جانە دەنساۋلىق ساقتاۋ سالالارىن, الەۋمەتتىك ينفراقۇرىلىمدى جاڭعىرتۋ;
- وڭىرلەردى كەشەندى تۇردە دامىتۋ.
ماسەلەنى قاراۋ بارىسىندا مەملەكەت باسشىسىنىڭ العا قويعان تاپسىرمالارىن ورىنداۋ شارالارى تۋرالى پرەمەر-ءمينيستردىڭ ءبىرىنشى ورىنباسارى – قارجى ءمينيسترى ءا. سمايىلوۆ, پرەمەر-ءمينيستردىڭ ورىنباسارى گ. ابدىقالىقوۆا, ەڭبەك جانە حالىقتى الەۋمەتتىك قورعاۋ ءمينيسترى ب. ساپارباەۆ, ءبىلىم جانە عىلىم ءمينيسترى ك. ءشامشيدينوۆا, دەنساۋلىق ساقتاۋ ءمينيسترى ە. ءبىرتانوۆ, ۇلتتىق ەكونوميكا ءمينيسترى ر. دالەنوۆ, يندۋستريا جانە ينفراقۇرىلىمدىق دامۋ ءمينيسترى ر. سكليار, ەنەرگەتيكا ءمينيسترى ق. بوزىمباەۆ, سونداي-اق الماتى وبلىسىنىڭ اكىمى ا. باتالوۆ, قاراعاندى وبلىسىنىڭ اكىمى ە. قوشانوۆ, استانا قالاسىنىڭ اكىمى ب. سۇلتانوۆ باياندادى.
سونىمەن قاتار, وتىرىستا «نۇر وتان» پارتياسىنىڭ حاتشىسى ف. قۋانعانوۆ ءسوز سويلەدى.
پرەمەر-مينيستر اسقار مامين ماسەلەنى قاراۋ قورىتىندىسى بويىنشا ورتالىق جانە جەرگىلىكتى مەملەكەتتىك ورگاندارعا بىرقاتار ناقتى تاپسىرمالار بەردى.
«مەملەكەت باسشىسى ۇكىمەت پەن اكىمدەردىڭ الدىنا حالىقتىڭ تۇرمىس ساپاسىن جاقسارتۋعا قاتىستى ماڭىزدى مىندەتتەر قويدى. ولاردىڭ شەشىمىن تابۋ ۇكىمەت پەن اكىمدەردىڭ ۇيلەسكەن بىرلەسكەن جۇمىسىن تالاپ ەتەدى. ەلباسىنىڭ پارتيا سەزىندە العان قوعاين بارلىق تاپسىرمالارى ساپالى ءارى ۋاقىتىلى ورىندالۋى ءتيىس. ۇكىمەت مۇقتاج ازاماتتاردى الەۋمەتتىك قولداۋ بويىنشا ءتيىمدى جۇمىس جۇرگىزۋى كەرەك. بيۋروكراتيا مەن فورماليزمگە جول بەرىلمەسىن», — دەدى ا. مامين.
قاراپايىم ادامداردىڭ ماسەلەلەرىن شەشۋ قاجەتتىگى اتالىپ ءوتتى. بارلىق مەملەكەتتىك ورگاندار, اسىرەسە جەرگىلىكتى جەرلەردە, وسى باعىتتا قارقىندى جۇمىس اتقارۋى كەرەك. ا. مامين ءىرى قالالاردىڭ قالا ماڭى اۋماعىندا, شاعىن جانە مونو قالالاردا تۇرعىنداردىڭ قولايلى ءومىر سۇرۋىنە جاعداي جاساۋدى, اسىرەسە اۋىلدا جاڭا تۇراقتى جۇمىس ورىندارىنىڭ اشىلۋىن قامتاماسىز ەتۋدى تاپسىردى.
الەۋمەتتىك ينفراقۇرىلىمدى دامىتۋ تۇرعىسىنان ءبىلىم بەرۋ, دەنساۋلىق ساقتاۋ, مادەنيەت جانە سپورت وبەكتىلەرىن سالۋ, ولاردىڭ قولجەتىمدىلىگى مەن قىزمەت كورسەتۋ ساپاسىن قامتاماسىز ەتۋ تاپسىرىلدى.
ينجەنەرلىك-كوممۋنالدىق ينفراقۇرىلىمدى, ونىڭ ىشىندە جەرگىلىكتى جول جەلىلەرىن, ەلەكتر ەنەرگەتيكاسى مەن گازبەن جابدىقتاۋدى جاڭعىرتۋ ماسەلەلەرىنە ەرەكشە كوڭىل ءبولۋ تاپسىرىلدى.
«ەلباسىنىڭ الەۋمەتتىك باستامالارىنىڭ ءاربىر باعىتى بويىنشا ورىنداۋ مەرزىمى مەن جاۋاپتى مەملەكەتتىك ورگانداردى ناقتى كورسەتىپ, جول كارتالارى ازىرلەنسىن. باعىتتاردىڭ ارقايسىسىن دامىتۋ ەلىمىزدىڭ الەۋمەتتىك-ەكونوميكالىق دامۋىنا, حالىقتىڭ تۇرمىس ساپاسىنىڭ جانە از قامتىلعان جانە كومەككە اسا مۇقتاج ازاماتتاردىڭ تابىسىنىڭ ارتۋىنا ۇلكەن سەرپىن بەرەدى», — دەپ پرەمەر-مينيستر ا. مامين, بارلىق ءىس-شارالاردى جۇزەگە اسىرۋعا دەرەۋ كىرىسۋدى تاپسىردى.
