ۇكىمەتتىك كەلىسسوزدەر قورىتىندىسى بويىنشا قىرعىز رەسپۋبليكاسىنداعى فيتوسانيتاريالىق كارانتيندىك باقىلاۋدى كۇشەيتۋ ماسەلەلەرى بويىنشا ەلدەردىڭ فيتوسانيتاريالىق قىزمەتتەرى اراسىندا جول كارتاسىنا قول قويىلدى. قۇجاتتا 17 تارماقتان تۇراتىن ءىس-شارالاردىڭ ناقتى ءتىزىمى قاراستىرىلعان, ونىڭ ءبىرىنشى كەزەكتى تارماقتارىن وسى جىلدىڭ اقپان ايىنان باستاپ ماۋسىم ايىنا دەيىنگى كەزەڭدە قىرعىزستاننىڭ فيتوسانيتاريالىق قىزمەتى ىسكە اسىرۋى ءتيىس.
قىرعىز تاراپى قازاقستانعا كارتوپ, الما جانە قۇرما جەتكىزۋگە قويىلعان تىيىمدى الىپ تاستاۋ تۋرالى ءوتىنىش ءبىلدىردى. ءوز كەزەگىندە قازاقستان 2018 جىل مەن 2019 جىلعى اقپان ارالىعىندا انىقتالعان 465 بۇزۋشىلىقتى قىرعىزدىڭ فيتوسانيتاريالىق قىزمەتى جويعانى تۋرالى اقپاراتتى قازاقستاندىق تاراپ قاراعاننان كەيىن بيىل 19 اقپاندا ۋاقىتشا ەنگىزىلگەن فيتوسانيتاريالىق كارانتيندىك شارالاردى الىپ تاستاۋعا دايىن ەكەنىن ءبىلدىردى.
مەملەكەتتىك شەكارانىڭ قازاقستان–قىرعىزستان ۋچاسكەسىندەگى ۆەتەرينارلىق-سانيتارلىق باقىلاۋ ماسەلەلەرىنە ەرەكشە كوڭىل ءبولىندى.
جالپى العاندا, تاراپتاردىڭ پىكىرىنشە, باقىلاۋدىڭ سانيتارلىق-كارانتيندىك, ۆەتەرينارلىق-سانيتارلىق, كارانتيندىك فيتوسانيتاريالىق جانە باسقا دا تۇرلەرىنىڭ باعىتتارى بويىنشا شارالار كەشەنى ەكىجاقتى ىنتىماقتاستىقتى نىعايتىپ, ەۋرازيالىق ەكونوميكالىق وداق اياسىنداعى ءوزارا ءىس-قيمىلدى كەڭەيتۋگە جول اشادى.
بۇدان وزگە, سۋ-ەنەرگەتيكا سالاسىنداعى ورتاق ۇستانىمدار انىقتالدى. ترانسشەكارالىق سۋ رەسۋرستارىن ەسەپتەۋدى اۆتوماتتاندىرۋ تۋرالى ۋاعدالاستىققا قول جەتكىزىلدى.
