گالا-وپەرا – بۇل وتاندىق ءارى الەمدىك وپەرا كلاسسيكاسىنىڭ جاۋھارلارىمەن بىرگە مۋزىكالىق توسىنسىيلاردى قامتىپ, ۇنەمى اۋقىمدى باعدارلاماعا قۇرىلاتىن جوبا. كوكتەمگى مەرەكەلەر قارساڭىندا جۇرتشىلىق نازارىنا قازاقستاندىق كومپوزيتورلار – ە.راحماديەۆ, س.مۇحامەدجانوۆ جانە كلاسسيكتەر – دج.روسسيني, دج.پۋچچيني, دج.ۆەردي, گ.دونيتسەتتي, پ.ماسكاني, ج.ماسسنە, ج.وففەنباح, ك.سەن-سانس, ا.دۆورجاك, ا.بورودين ت.ب. سازگەرلەردىڭ كورەرمەن كوڭىلىنە جاقىن شىعارمالارى ازىرلەنگەن.
- اتالمىش گالا-كونتسەرت باسقالارىنان ءوزىنىڭ تۇتاستىعىمەن ەرەكشەلەنەدى, ول كلاستەرلىك جۇيەگە قۇرىلعان: اسپاپتىق جانە ۆوكالدىق نومىرلەردىڭ كوپشىلىگى ءوزارا بايلانىسقان. ماسەلەن, دج.ۆەرديدىڭ «تاعدىر كۇشى» وپەراسىنىڭ ۋۆەرتيۋراسى وسى وپەراداعى لەونورانىڭ ارياسىمەن جالعاسادى, سونداي-اق پ.ماسكانيدىڭ «اۋىل ابىرويى» وپەراسى سانتۋتستسانىڭ ارياسىمەن جانە ينتەرمەتستسومەن ۇسىنىلادى. دج.ءپۋچچينيدىڭ ايگىلى «مانون لەسكو» وپەراسىنا تاعى ءبىر كلاستەر ارنالعان: تىڭدارمانعا ينتەرمەتستسو, مانون ارياسى مەن دە گريە ارياسىن ۇسىنامىز. «استانا وپەرا» تەاترىنىڭ جەتەكشى سوليستەرى مەدەت چوتاباەۆ پەن مايرا مۇحامەدقىزى ورىندايتىن دج.ءپۋچچينيدىڭ «بوگەما» وپەراسىنان ساحنالىق كورىنىستەر كەشتىڭ كوركىن اشا تۇسپەك. كونتسەرت ا.ءبوروديننىڭ «كنياز يگور» وپەراسىنان اتاقتى قىپشاق بيىمەن اياقتالادى, - دەپ اتاپ ءوتتى ماەسترو ابزال مۇحيتدينوۆ.
كونتسەرتكە قر مەملەكەتتىك سىيلىعىنىڭ لاۋرەاتتارى سۇندەت بايعوجين (قازاقستاننىڭ ەڭبك سىڭىرگەن قايراتكەرى), مايرا مۇحامەدقىزى (قازاقستاننىڭ ەڭبەك سىڭىرگەن ءارتىسى), قازاقستاننىڭ ەڭبەك سىڭىرگەن ارتىستەرى – جاننات باقتاي, عاليا بايعازينوۆا; قازاقستاننىڭ ەڭبەك سىڭىرگەن قايراتكەرلەرى – جۇپار عابدۋللينا, بيبىگۇل جانۇزاق, دينا حامزينا, مەدەت چوتاباەۆ, جان تاپين, مەيىر باينەش, تالعات مۇساباەۆ, جانات شىبىقباەۆ; ارمەنيانىڭ حالىق ءارتىسى بارسەگ تۋمانيان; حالىقارالىق بايقاۋلاردىڭ لاۋرەاتتارى – ەلەنا گانجا, سالتانات مۇراتبەكوۆا, تاتيانا ۆيتسينسكايا, گۇلجانات ساپاقوۆا, بەيىمبەت تاڭارىقوۆ, رامزات بالاكيشيەۆ, بولات ەسىمحانوۆ جانە ت.ب. قاتىسادى. باس حورمەيستەر – قازاقستاننىڭ ەڭبەك سىڭىرگەن قايراتكەرى ەرجان ءداۋىتوۆ. كونتسەرت رەجيسسەرى – ەرەنباق تويكەنوۆ.
