980 ميلليارد تەڭگە
مەملەكەت باسشىسى 2019 جىلعى 1 شىلدەدەن بيۋدجەتتىك سالانىڭ تومەن جالاقىلى جۇمىسكەرلەرىنىڭ ەڭبەكاقىسىن 30 پايىزعا دەيىن ارتتىرۋدى; اۋداندىق, وبلىستىق دەڭگەيلەردە تىكەلەي ازاماتتارمەن جۇمىس ىستەيتىن اتقارۋشى ورگانداردىڭ تومەنگى قىزمەتكەرلەرىنىڭ ەڭبەكاقىسىن ورتاشا 25 پايىزعا كوتەرۋدى تاپسىردى. بۇل ماقساتتارعا 2019-2021 جىلدارى قوسىمشا 980 ميلليارد تەڭگە بولىنەدى.
350 ميلليارد تەڭگە
ەلباسى 2025 جىلعا دەيىن وبلىستىق جانە اۋداندىق ماڭىزداعى جولداردى جوندەۋدى تاپسىردى. وسى ماقساتتى جۇزەگە اسىرۋ ءۇشىن قوسىمشا 350 ميلليارد تەڭگە بولىنەدى.
«سوڭعى جىلدارى رەسپۋبليكالىق اۆتوكولىك جەلىلەرى قۇرىلىسى بويىنشا اسا زور, تاريحي ماڭىزدى جۇمىستار جۇرگىزىلدى. تۇتاستاي العاندا, ءبىز 12,5 مىڭ كم اۆتوموبيل جولى مەن 2,5 مىڭ كم تەمىر جول, تەڭىز پورتتارىن سالدىق جانە جوندەۋدەن وتكىزدىك. ارينە, اۆتوباندار سالعان ماڭىزدى, بىراق ۇيگە دەيىن جول سالعان ودان دا ماڭىزدىراق. زاماناۋي جەرگىلىكتى جولدار جەلىسىن كەڭەيتۋ – بۇل ورىندالۋىن پارتيا باقىلاۋىنا الۋى ءتيىس ۇكىمەتتىڭ شەشۋشى مىندەتى. اتالعان ماقساتتارعا قوسىمشا 350 ميلليارد تەڭگە ءبولۋدى تاپسىرامىن. بۇل شارالار 2025 جىلعا قاراي وبلىستىق جانە اۋداندىق ماڭىزداعى اۆتوجولداردىڭ 95 پايىزىن جاقسارتۋعا جاردەمدەسەدى» دەدى ن.نازارباەۆ.
330 ميلليارد تەڭگە
كوممۋنالدىق سالانى جەتىلدىرۋ ءۇشىن جالپى سوماسى 330 ميلليارد تەڭگە قاراستىرىلىپ وتىر. سۋمەن جانە كارىز جۇيەلەرىمەن قامتاماسىز ەتۋ ءۇشىن قوسىمشا 140 ميلليارد تەڭگە, گازداندىرۋ جانە ەلەكترمەن قامتاماسىز ەتۋ جۇمىستارىنا شامامەن قوسىمشا 190 ميلليارد تەڭگە بولىنەدى.
300 ميلليارد تەڭگە
قازاقستان پرەزيدەنتى سونداي-اق مۇگەدەك بالا تاربيەلەپ وتىرعان اتا-انالارعا, قامقورشىلار مەن وتباسىلارعا (تۇلعالارعا) جاردەماقىنى 30 پايىزعا كوتەرۋدى تاپسىردى. بۇل شارا 100 مىڭنان استام ادامدى قامتيدى. ونى جۇزەگە اسىرۋعا 2019-2021 جىلدارى قوسىمشا 300 ميلليارد تەڭگەدەن استام قاراجات ءبولۋ تاپسىرىلىپ وتىر.
180 ميلليارد تەڭگە
ەلباسى وڭىرلىك كولىك ينفراقۇرىلىمدارىنىڭ بارلىق نىسانى, ونىڭ ىشىندە اەروپورتتار, اۆتو جانە تەمىر جول ۆوكزالدارى جاڭعىرتىلۋى ءتيىس ەكەندىگىن اتاپ كورسەتتى. استانا, الماتى جانە شىمكەنت سياقتى ءىرى قالالاردىڭ شەت اۋماقتارىندا قالىپتاسقان پروبلەمالاردى شەشۋ ءۇشىن 2019-2021 جىلدارعا قوسىمشا 90 ميلليارد تەڭگە بولىنەدى.
سونداي-اق اۋىل حالقىنىڭ تۇرمىسىن جاقسارتۋ ماقساتىندا «اۋىل – ەل بەسىگى» ارنايى جوباسى ازىرلەنبەك. ونى جۇزەگە اسىرۋ ءۇشىن 2019-2021 جىلدارى 90 ميلليارد تەڭگە كولەمىندە قارجى قاراستىرىلىپ وتىر.
120 ميلليارد تەڭگە
ەلباسى دەنساۋلىق ساقتاۋ سالاسىن دامىتۋعا قوسىمشا 120 ميلليارد تەڭگە ءبولۋدى تاپسىردى. مۇنىڭ ناتيجەسىندە 7 وڭىردە جىلىنا 100 مىڭ پاتسيەنتتى قامتيتىن ستاتسيونارلىق-مەديتسينالىق كومەك كورسەتۋدىڭ ساپاسى مەن قولجەتىمدىلىگى ارتا تۇسەدى.
50 ميلليارد تەڭگە
از قامتىلعان كوپ بالالى وتباسىلاردى باسپانامەن قامتاماسىز ەتۋ ءۇشىن جىل سايىن 50 ميلليارد تەڭگە بولىنەدى. ناتيجەسىندە «نۇرلى جەر» باعدارلاماسى اياسىندا 40 مىڭنان استام جالدامالى پاتەر سالىنادى.
«بۇل ماقساتقا تاياۋ جەتى جىلدا قوسىمشا 50 ميلليارد تەڭگە جىل سايىن ءبولۋ قاجەت. سونىمەن قاتار تابىسى تومەن كوپ بالالى جانە تولىق ەمەس وتباسىلار, مۇمكىندىگى شەكتەۋلى بالالارى بار وتباسىلار ءۇشىن باسپانا الۋدىڭ قولجەتىمدىلىگىن ارتتىرعان ءجون. ازاماتتاردىڭ وسى ساناتتارى ءۇشىن تۇرعىن ءۇي جيناق جۇيەسى ارقىلى جىلدىق 2-3 پايىزبەن تۇرعىن ءۇي قارىزدارىن ۇسىنۋدىڭ جەڭىلدىكتى تەتىكتەرىن ازىرلەۋدى تاپسىرامىن. تۇرعىن ءۇي جيناق بانكىنە وسى ماقساتقا جىل سايىن 50 ميلليارد تەڭگە بولىنەتىن بولادى, دەدى ەلباسى.
