ماجىلىسكە كەلىپ تۇسكەن زاڭ جوبالارىنىڭ ىشىندە مىندەتتى الەۋمەتتىك ساقتاندىرۋ تۋرالى زاڭ جوباسى جانە وعان ىلەسپە زاڭ جوباسى بار.
اتالعان قۇجات مىندەتتى الەۋمەتتىك ساقتاندىرۋدىڭ قۇقىقتىق, ەكونوميكالىق جانە ۇيىمداستىرۋشىلىق نەگىزدەرىن نىعايتۋعا باعىتتالعان. اتاپ ايتقاندا, مىندەتتى الەۋمەتتىك ساقتاندىرۋ جۇيەسىنە قاتىسۋ ءوتىلى مەن مىندەتتى الەۋمەتتىك ساقتاندىرۋ قورىنان تولەنەتىن الەۋمەتتىك تولەمدەردىڭ مولشەرى اراسىنداعى ءوزارا بايلانىستى كۇشەيتۋ قاراستىرىلعان.
سونداي-اق جالپى وتىرىستا ءماجىلىس دەپۋتاتتارى «قازاقستان رەسپۋبليكاسى مەن ۆەتنام سوتسياليستىك رەسپۋبليكاسى اراسىنداعى قىلمىستىق ىستەر بويىنشا ءوزارا قۇقىقتىق كومەك تۋرالى شارتتى راتيفيكاتسيالاۋ تۋرالى» زاڭ جوباسىن ماقۇلدادى. بۇل شارتتى راتيفيكاتسيالاۋ قىلمىسپەن كۇرەستە ەكى ەل اراسىنداعى ىنتىماقتاستىقتىڭ تيىمدىلىگىن ارتتىرۋعا باعىتتالعان.
اتالعان قۇجاتقا 2017 جىلدىڭ ماۋسىمىندا حانويدا قول قويىلعان.
– شارت قىلمىستىق ىستەر بويىنشا قۇقىقتىق كومەكتى كورسەتۋ ماسەلەلەرىن رەتتەيدى, سونداي-اق جاسالعان قىلمىس تۇرعىسىندا كۇدىكتىنىڭ كىناسىن دالەلدەۋگە قاجەتتى تەرگەۋ امالدارىن جۇرگىزۋ ەسكەرىلگەن. جالپى, بۇل شارت ستاندارتتى قۇجات بولىپ سانالادى, – دەدى زاڭ جوباسى بويىنشا بايانداما جاساعان باس پروكۋروردىڭ ورىنباسارى اندرەي لۋكين.
بايانداماشىنىڭ ايتۋىنا قاراعاندا, شارتتى راتيفيكاتسيالاۋ ەكى ەلدىڭ قىلمىسكەرلىكپەن كۇرەستەگى ىنتىماقتاستىعىنىڭ تيىمدىلىگىن ارتتىرۋى ءتيىس. قازىرگى ۋاقىتتا وسىنداي شارتتار 27 ەلمەن بەكىتىلگەن. سونىمەن قاتار قازىر كۋبامەن, گرەكيامەن جانە ماكەدونيامەن ارادا وسى تەكتەس قۇجاتقا قول قويۋ ماسەلەسى پىسىقتالۋدا.
– ۆەتناممەن ىنتىماقتاستىق ايتارلىقتاي بەلسەندى تۇردە دامىپ كەلەدى. بۇل مەملەكەت وڭتۇستىك-شىعىس ازيادا ءبىز ءۇشىن تارتىمدى ەلدەردىڭ ءبىرى بولىپ وتىر, ياعني ەكونوميكالىق تۇرعىدا بايلانىستار نىعايتىلۋدا, – دەدى ا.لۋكين.
جالپى, قازاقستان مەن ۆەتنام اراسىندا وتكەن جىلى ساۋدا اينالىمى 500 ملن اقش دوللارىنان اسقان. سونداي-اق مەملەكەتتەر اراسىندا تىكەلەي اۋە رەيستەرى اشىلعان.
جالپى وتىرىستا قازاقستان پرەزيدەنتىنىڭ جارلىعىمەن پارلامەنت ءماجىلىسىنىڭ دەپۋتاتى ساپارحان وماروۆتىڭ اۋىل شارۋاشىلىعى ءمينيسترى بولىپ تاعايىندالۋىنا بايلانىستى دەپۋتاتتىق وكىلەتتىگى مەرزىمىنەن بۇرىن توقتاتىلدى.
سونىمەن قاتار پالاتا ءماجىلىستىڭ اگرارلىق ماسەلەلەر كوميتەتىنىڭ توراعاسى لاۋازىمىنا بەرىك وسپانوۆتى سايلادى.
سەرىك ابدىبەك,
«Egemen Qazaqstan»
