اقمارال ءالنازاروۆا, قىزىلوردا وبلىسى دەنساۋلىق ساقتاۋ باسقارماسىنىڭ باسشىسى:
– بۇگىن ەلباسى – پارتيا توراعاسى ۇيىمنىڭ الداعى ون جىلدىق جوسپارىن باعدارلاپ, جولىن كورسەتىپ بەردى. بىزگە كەرەگى – تەك وسى باعىتقا ساي جۇمىس ىستەۋ. بۇگىنگى جيىندا قارالعان ەڭ ەلەۋلى ماسەلەلەردىڭ ءبىرى – الەۋمەتتىك از قامتىلعان وتباسىلارعا كورسەتىلەتىن كومەك, سونداي-اق مۇمكىندىگى شەكتەۋلى ازاماتتاردى قولداۋ بولدى. بۇل جاي عانا ءسوز ەمەس, ناقتى قاراجات بولىنگەن.
ءوزىم ەڭبەك ەتەتىن مەديتسينا سالاسىنا توقتالسام, قىزىلوردا وبلىسىنداعى العاشقى مەديتسينالىق كومەك كورسەتۋ كورسەتكىشى قازىردە 43 پايىزدى قۇرايدى. سونى 60 پايىزعا دەيىن جەتكىزۋ – العا قويعان ۇلكەن مىندەت. مىنە, وسىعان بايلانىستى ىستەر اتقارامىز.
بيىل «نۇر وتان» پارتياسىنىڭ 20 جىلدىعى. 20 جىلدا اتقارعان ناقتى ناتيجە – ەلىمىزدىڭ وركەندەۋىنە پارتيانىڭ, ونداعى مۇشەلەردىڭ قوسقان ەلەۋلى ۇلەسى. سونىمەن قاتار قازاقستاننىڭ دامۋىندا نۇروتاندىقتاردىڭ ەڭبەگى زور.
بۇگىنگى ايتىلعان, كۇن تارتىبىندە قارالعان ماسەلەلەردى شەشۋگە, الداعى 10 جىلدىققا, ونىڭ ىشىندە 2021 جىلعا دەيىنگى ورىندالاتىن تاپسىرمالارعا ۇلتتىق قوردان قوسىمشا قاراجات ءبولىنۋى – ۇلكەن قامقورلىق, ناقتى باستاما جانە ەلگە كومەك.
بەكزات التىنبەكوۆ, قاراعاندى وبلىستىق ءماسليحاتىنىڭ دەپۋتاتى, كاسىپكەر:
– سەزدەن كۇتكەن ءۇمىتىم اقتالدى. «نۇر وتان» ەجەلدەن ناقتى ىستەر پارتياسى دەپ تانىلعان. ەلباسىنىڭ وسىعان دەيىن بەرىلگەن تاپسىرمالارى دا ورىندالعان. ەندى 2030 جىلعا دەيىنگى مەرزىمدى باعدارعا العان باعدارلاماداعى ماسەلەلەر دە شەشىمىن تاباتىنىنا سەنىمدىمىن. بۇل ءبىزدىڭ حالقىمىزدى قۋانتادى. ويتكەنى باعدارلامانىڭ نەگىزگى ماقساتى – حالىقتىڭ ءال-اۋقاتىن ارتتىرۋ بولىپ تۇر.
وسى جۇمىستى اتقارۋ ءۇشىن ەلباسى ۇلتتىق قور مەن بيۋدجەتتەن 2 تريلليوننان ارتىق قاراجات بولگىزەتىن بولدى. مۇنشالىقتى قاراجاتتىڭ الەۋمەتتىك سالاعا بۇرىن-سوڭدى بولىنگەنىن بىلمەيمىن. بيۋدجەتتىڭ بارلىق شىعىستارىنىڭ 45 پايىزى وسى سالاعا باعىتتالادى دەلىندى. اسىرەسە كوپ بالالى انالار قۋاناتىن بولدى, ويتكەنى بالالارعا 21 مىڭ تەڭگەدەن اتاۋلى الەۋمەتتىك كومەك كورسەتىلەتىن بولدى. ءوز باسىم حالىققا جاسالاتىن وسىنداي قولداۋلارعا قۋانىپ وتىردىم. حالىق باي, قۋاتتى بولسا, كاسىپكەر بولىپ جۇرگەن ءبىز دە باقۋاتتى بولامىز. ويتكەنى ءبىزدىڭ كورسەتەتىن قىزمەتتەرىمىزگە, شىعاراتىن ونىمدەرىمىزگە الۋشى تابىلاتىن بولادى. ال حالىق كەدەي, تاپقانى تاماعىنا عانا جەتىپ وتىرسا, ول ەشتەڭە دە المايدى, ءوندىرىس توقتاپ, ءونىم ءوندىرۋ قۇلدىرايدى.
سەمبەك سەيدازىموۆ, جامبىل وبلىسى قوعامدىق كەڭەسىنىڭ توراعاسى:
– بۇگىنگى كۇنى الەۋمەتتىك ماسەلەلەر كۇردەلەنىپ تۇر. ءومىر ساپاسىن جاقسارتۋ كەرەك دەگەن اڭگىمەلەر كوپتەن بەرۋى ايتىلۋدا. «نۇر وتان» پارتياسى وسى ماسەلەلەردى زەردەلەپ, حالىقتىڭ جاعدايىن ويلايتىن شەشىمدەر قابىلدار دەپ كۇتكەن ەدىك. ويتكەنى جوعارى دامىپ كەلە جاتقان ەلدە حالقىنىڭ تۇرمىسى دا جوعارى بولۋى كەرەك قوي. ايتپەسە جوعارى دامىعانىمىز, 30 دامىعان ەلدىڭ قاتارىنا ەنەتىنىمىز تەك ءسوز عانا بولادى ەمەس پە؟
مىنە, ەلباسىنىڭ بۇگىنگى سوزىنەن سولارعا جاۋاپ الىپ, قاناعاتتانىپ تۇرمىز. اتاپ ايتقاندا, حالىقتىڭ ءال-اۋقاتىن كوتەرۋگە, كوپ بالالى انالاردى قولداۋعا, اۋىلدار اراسىنداعى جولداردى جوندەۋگە وراسان زور كولەمدە قاراجات ءبولىنىپ وتىر. ەندى سونى ۇكىمەت ءتيىمدى جۇمساپ, كوتەرىلگەن ماسەلەلەرگە ورىندى پايدالانسا ەكەن دەگەن تىلەگىمىز بار.
ەلباسىنىڭ جۋىردا ۇكىمەتتى جاڭالاعانى دا سول ماقساتتا ەكەندىگى ايتىلدى. حالىقتىڭ ءۇمىتى ەندى ۇكىمەتكە قاراپ تۇر. ءبىزدىڭ حالقىمىز جاقسى ءومىر سۇرۋگە لايىقتى دەپ ويلايمىن. ونىڭ ۇستىنە قازىر ەڭبەك ەتسەڭ جاقسى تۇرمىسقا قول جەتكىزۋگە بولادى.
الينا سولوۆەۆا, قازاقستاننىڭ ەڭبەك ەرى, شىمكەنتتەگى №1 مەكتەپ-گيمنازيانىڭ بيولوگيا ءپانىنىڭ مۇعالىمى:
– جالپى ايتقاندا, مەن ەلىمىزگە جاڭا يدەولوگيا قابىلداۋ كەرەك دەپ ويلايمىن جانە بۇل سوزدەن قاشۋدىڭ قاجەتى جوق. ول – تابىستى دامۋدىڭ يدەولوگياسى بولۋ كەرەك. مەن پارتيانىڭ باستى ماقساتى – ادامدارعا كومەكتەسۋ جانە ۇكىمەتتىڭ جۇمىسىنا باقىلاۋ جاساۋ دەپ ويلامايمىن. پارتيانىڭ نەگىزگى جۇمىسى يدەولوگيا, ۇلتتىق بىرلىك, وتانسۇيگىشتىك تاربيە, جاستاردىڭ دۇرىس جولمەن دامۋىنا ىقپال ەتۋ بولۋى كەرەك دەپ ەسەپتەيمىن. ەلباسىنىڭ بۇگىنگى سوزدەرىنەن مەن ءوزىمدى تولعاندىرعان وسىنداي بىرنەشە ماسەلەگە جاۋاپ تاپتىم.
ناق ءوز جۇمىسىما قاتىستى ايتاتىن بولسام, جاڭا ءبىلىم بەرۋ سالاسىنداعى ەكسپەريمەنتتەردى توقتاتىپ, ساپالى ءبىلىم مەن سانالى تاربيەنى الداعى ۋاقىتتا باستى باعدار ەتۋ كەرەكتىگى اتالدى. مەن ونى وتە دۇرىس دەپ سانايمىن. ۇستازدار تۋرالى زاڭ دا ەندى قابىلدانىپ, ءبىزدىڭ تۇيتكىلدى ماسەلەمىز شەشىلەر دەگەن ۇمىتتەمىن. ايتا كەتەتىن جايت, بۇل زاڭ جوباسىندا مەن بولۋى مۇمكىن ەمەس دەپ ويلايتىن ماسەلەلەر دە قاراستىرىلعان. سونىڭ ىشىندە مۇعالىمنىڭ شىعارماشىلىعىنا قولداۋ بىلدىرىلەتىنى ءبىزدى قۋانتتى, ارينە.
يبراگيم سارسەنباەۆ, اقتوبە وبلىسىنداعى «ناۋرىز سيم» جاۋاپكەرشىلىگى شەكتەۋلى سەرىكتەستىگىنىڭ ديرەكتورى:
– اقتوبە وبلىسىنىڭ ىرعىز اۋدانىنان كەلدىم. وزدەرىڭىز بىلەتىندەي, بيىل «نۇر وتان» پارتياسىنىڭ قۇرىلعانىنا جيىرما جىل تولدى. وسى ءبىر مەرەيلى جىلدى اسىعا كۇتتىك. باستاۋىش پارتيانىڭ XVIII سەزىنە دەلەگات بولىپ كەلۋ – بىزگە ۇلكەن قۇرمەت ءارى جاۋاپكەرشىلىك. وسىعان دەيىنگى سەزدەرگە كۋا بولىپ كەلەمىز, بۇل سەزدىڭ بۇرىنعىلاردان وزگەشەلىگى – جيىندى, ونداعى تالقىلاناتىن ماسەلەلەر مەن العا قويىلاتىن مىندەتتەردى بىلۋگە بارشا قازاقستاندىقتاردىڭ بارىنشا ىقىلاس بىلدىرگەنى. بۇگىنگى جيىندا ەلدەگى تۇيتكىلدى ماسەلەلەرگە قاتىستى ماڭىزدى شەشىمدەر قابىلداندى.
پارتيانىڭ جاريالاعان 2030 جىلدارعا ارنالعان باعدارلاماسى ومىرشەڭ بولاتىنى بەلگىلى, ويتكەنى وندا الداعى ون جىلعا ارنالعان جوسپار, ۇلكەن قادامدار مەن ماقساتتارعا نەگىزدەلگەن ناقتى ارەكەتتەر قامتىلعان. دەگەنمەن, مەنىڭشە, زاماننىڭ ءاردايىم وزگەرىپ وتىراتىنىن ەسكەرسەك, زامانعا, ونداعى پروبلەمالارعا قاراي, بۇل باعدارلامانىڭ مازمۇنى مەن باعىتى دا جاقسى جاعىنا وزگەرەدى.
كاميلا كوۆيازينا, الەمدىك ەكونوميكا جانە ساياسات ينستيتۋتىنىڭ ساراپشىسى:
– «نۇر وتان» پارتياسى XVIII سەزىنىڭ ەڭ باستى وقيعاسىنا كەلسەك, پرەزيدەنت ن.نازارباەۆ, بىرىنشىدەن, 2018 جىلعى 5 قازانداعى جولداۋىندا جاريالاعان باستامالارىن مازمۇندىق تۇرعىدا جالعاستىردى, ەكىنشى جاعىنان, سوڭعى كەزدە كوتەرىلگەن وزەكتى ماسەلەلەرگە جاۋاپ بەردى.
ۋادە ەتىلگەندەي, پارتيا مۇشەلەرى, اكىمدەر مەن مەملەكەتتىك ورگاندار جەتەكشىلەرى ۇسىنعان شارالاردىڭ باسىم بولىگى حالىقتىڭ ءال-اۋقاتىن جاقسارتۋعا باعىتتالدى. باستى نازار كوپ بالالى وتباسىلار مەن از قامتىلعان تۇرعىنداردى, سونىمەن بىرگە بيۋدجەتتىك ۇيىمداردىڭ قىزمەتكەرلەرىن قارجىلاي قولداۋعا اۋدارىلىپ وتىر.
مەملەكەت باسشىسى كۇنكورىس مينيمۋمىنان جوعارى تابىس تاباتىن كوپبالالى وتباسىلاردى كەزىندە كومەكتەن ايىرۋ دۇرىس بولماعانىن اتاپ ءوتتى جانە مۇقتاج قازاقستاندىقتاردى بەلگىلى ءبىر الەۋمەتتىك ءالسىز توپتارعا قوسۋ تالاپتارىن قايتا قاراۋدى تاپسىردى. سونىمەن قاتار كوپشىلىكتىڭ ءوتىنىشى بويىنشا, ونداي وتباسىنداعى جاردەماقى كولەمىن ءار بالاعا 21 مىڭ تەڭگەگە ارتتىرۋدى جۇكتەدى. وسى ماقساتقا بيۋدجەتتەن قوماقتى قارجى بولىنەتىن بولادى.
قايرات ايدارحان ۇلى, استاناداعى «شيپالى» ەمدەۋ ورتالىعىنىڭ ديرەكتورى, دەنساۋلىق ساقتاۋ سالاسىنىڭ ۇزدىگى:
– «نۇر وتان» پارتياسى بۇگىندە ەلىمىزدەگى جەتەكشى پارتياعا اينالىپ, ناقتى ناتيجەنىڭ پارتياسى اتاندى. پارتيا كوتەرگەن بارلىق ماسەلەلەر وڭ شەشىمىن تابۋدا. مەن ءوز سالام بويىنشا ايتار بولسام, بۇگىندە ەلىمىزدە مەديتسينا سالاسى قارقىندى دامىپ كەلەدى. وتاندىق مەديتسينانىڭ وزگە ەلدەرمەن باسەكەگە ءتۇسۋ قابىلەتتىلىگى جىل وتكەن سايىن ارتىپ كەلەدى. سونداي-اق ەل دامۋىنىڭ نەگىزگى كورسەتكىشى – حالىقتىڭ ءال-اۋقاتى ءوسىپ, ءومىر ءسۇرۋ جاسى ۇزاردى.
سونىمەن قاتار, پارتيانىڭ كەزەكتى سەزىندە قازاقستاندىقتاردىڭ ءومىر ساپاسىن ارتتىرۋ جۇمىسىنا ەرەكشە نازار اۋدارىلدى. مۇندا الەۋمەتتىك ماسەلەلەر جان-جاقتى كوتەرىلىپ, ونىڭ ءتيىمدى شەشىمىن تابۋ ءۇشىن كوپتەگەن شارالار قابىلداندى. سونىڭ ىشىندە ەلباسى نۇرسۇلتان نازارباەۆ كوپ بالالى, از قامتىلعان وتباسىلار جانە الەۋمەتتىك قورعاۋدى قاجەت ەتەتىن توپتارعا مەملەكەتتىك قولداۋ جاساۋدىڭ قارجىلاي تەتىكتەرىن جاقسارتۋ اسا ماڭىزدى ەكەنىن اتاپ كورسەتتى. مۇنىڭ بارلىعى ەلىمىزدەگى ادامنىڭ دامۋ يندەكسىن كوتەرۋ, دەنساۋلىعىن جاقسارتۋ ماسەلەسىن شەشۋگە تىكەلەي اسەر ەتەدى.
