مينيستر ە.تۇرعىمباەۆ پوليتسيا قىزمەتكەرلەرىنىڭ قۇقىقتىق-الەۋمەتتىك جاعدايىن جاقسارتۋ ماسەلەسى ەلباسى مەن ۇكىمەت قولداۋىنىڭ ارقاسىندا شەشىلىپ جاتقانىن جەتكىزدى. الايدا, جاڭا فورماتتاعى پوليتسيانى قۇرۋ بىرقاتار ماسەلەلەردى شەشۋدى قاجەت ەتەدى. «ەڭ الدىمەن, پوليتسيا قىزمەتكەرلەرىنىڭ جالاقىسى تومەن. مىسالى, پوليتسيا سەرجانتىنىڭ ورتاشا جالاقىسى بۇگىندە 87 مىڭ تەڭگە, ال لەيتەنانتتان مايورعا دەيىنگىلەر 110 مىڭنان 147 مىڭ تەڭگەگە دەيىن ايلىق الادى», دەدى ول. ونىڭ سوزىنە سەنسەك, بۇل سوما وزگە ورگاندارداعى ءدال وسىنداي شەندى قىزمەتكەرلەردىڭ جالاقىسىنان 10-50 پايىزعا تومەن.
مينيستر كادرلىق جاعدايعا دا توقتالدى, مامانداردىڭ تۇراقسىزدىعى جۇمىس ساپاسىنىڭ ارتۋىنا كەدەرگى كەلتىرۋدە. «بىلتىر 8800-دەن استام مامان قىزمەتتەن كەتتى. سونىڭ 42 پايىزى ءوز ەركىمەن شىققان. بۇگىندە 11200 پوليتسيا قىزمەتكەرى جەتكىلىكسىز. بۇل 14 پايىزدى قۇرايدى. ىشكى ىستەر مينيسترلىگىندە جۇمىس وسى سەبەپتى تولىققاندى اتقارىلماي وتىر», دەدى ە.تۇرعىمباەۆ.
مەملەكەت باسشىسى وتكەن جىلى: «پوليتسيا مەن تۇرعىنداردىڭ اراسىنداعى بايلانىس ەسكىردى. وكىنىشكە قاراي, ءبىزدىڭ ەلدە رەفورما جاساۋدا كەنجەلەپ قالعان وسى ىشكى ىستەر ورگانى بولىپ وتىر», دەي كەلە, جەدەل تۇردە رەفورما جۇرگىزۋدى جانە شتاتتىق بىرلىكتى قىسقارتىپ, ۇنەمدەلگەن قارجى ەسەبىنەن پوليتسيا قىزمەتكەرلەرىنىڭ جالاقىسىن كوتەرۋدى تاپسىرعان ەدى. وسىعان وراي, مينيستر ە.تۇرعىمباەۆ وتىرىستاعى بايانداماسىندا: «قازىرگى تاڭدا مينيسترلىك ۇكىمەت بەكىتكەن ىشكى ىستەر ورگاندارىن جاڭعىرتۋ جونىندە جول كارتاسىن ىسكە اسىرۋدا. ونىڭ شەڭبەرىندە ىشكى ىستەر ورگاندارىنىڭ شتات سانى 10 پايىزعا, ياعني 10 مىڭ 860 بىرلىككە, وسىنىڭ ىشىندە باسشى قۇرامىنىڭ سانى 1 مىڭعا قىسقارتىلدى», دەدى. ءمينيستردىڭ مالىمەتىنشە, وسى قىسقارتۋدان ۇنەمدەلگەن 16 ملرد تەڭگە قىزمەتكەرلەردىڭ جالاقىسىن وسىرۋگە جۇمسالادى.
بۇدان بولەك, كوميسسيا توراعاسى ق.سۇلتانوۆ ىشكى ىستەر مينيسترلىگىندەگى رەفورماعا تالداۋ جاساۋ ءۇشىن بىرىككەن ۇلتتار ۇيىمىنان ارنايى ساراپشى كەلەتىنىن ايتتى. «بۇل مامان قۇقىق قورعاۋ, سوت ورگاندارىنداعى ادام قۇقىعىنىڭ ساقتالۋىنا ساراپتايتىن بولادى. ول ءبىزدىڭ رەفورمامىزدى زەردەلەپ, ودان كەيىن سونىڭ نەگىزىندە ساراپتاما جاسايدى», دەدى ول. ايتا كەتەيىك, بۇۇ ساراپشىسى ەلىمىزگە مامىر-ماۋسىم ايلارىندا كەلمەك.
ايدانا شوتبايقىزى,
«Egemen Qazaqstan»
