بۇعان دەيىن دە وبلىس اكىمى قالانىڭ شەتكى ايماقتارىن بىرنەشە رەت ارالاپ, قالا باسشىلىعىنا بارلىق قۇرىلىس جۇمىستارىنىڭ ءتيىستى تالاپتارعا ساي بولۋىن قاداعالاۋدى تاپسىرعان بولاتىن. بۇل جولى ارالاۋ ىنتىماق اۋىلىنان باستالدى.
ىنتىماقتا 400 گەكتاردان استام جەردە 2232 ۋچاسكە بار دەسەك, بۇگىنگى كۇنگە سونىڭ 521 ۋچاسكەسىندە ءۇي سالىنعان. مۇندا ەكى اۆتوبۋس باعىتى بەلگىلەنىپ, ولار اۋىلدىڭ ورتاسىنان ءجۇرىپ وتەدى. دەگەنمەن, اۋقىمدى اۋىل ءۇشىن بۇل باعىتتىڭ جەتكىلىكسىز ەكەنىن ايتقان وبلىس اكىمى اۆتوبۋس مارشرۋتتارىن تۇرعىندارعا ىڭعايلاپ قايتا قاراستىرۋدى, سونداي-اق قوعامدىق كولىك جۇرەتىن نەگىزگى كوشەنى اسفالتتاۋدى تاپسىردى.
مۇنداعى ينجەنەرلىك-ينفراقۇرىلىم جۇرگىزۋ قۇرىلىسىن «سترويسەرۆيس-97» جشس مەردىگەر مەكەمەسى اتقارۋدا. ولار تارتقان ەلەكتر كابەلدەرى مەن باعانالاردىڭ ورناتىلۋى وبلىس باسشىسىنىڭ كوڭىلىنەن شىققان جوق, زامان تالابىنا ساي جاسالماعان. ءالسىز توك جۇرگىزۋ قاجەتتىگى, اتاپ ايتقاندا تەلەفون جەلىسىن, ينتەرنەت جەلىسىن تارتۋ سۇرانىسى زەردەلەنبەگەن. اكىم وزىنە ۇسىنىلعان ىنتىماق 1, 2 ,3 اۋىلدارىنىڭ دامۋ جوسپارىنداعى الەۋمەتتىك نىسانداردىڭ جوبالارى جايلى سۇرادى. مەكتەپ جوبادا بار, بالاباقشا بەلگىلەنبەگەن. بەرىلگەن جاۋاپقا كوڭىلى تولماعان ا. باتالوۆ: «بۇل ماسەلەلەردى وسىعان دەيىن دە بىرنەشە رەت تاپسىرعانمىن. ءالى ەشقانداي ناتيجە جوق. ەڭ الدىمەن وسى اۋىلدا قانشا بالا بار, ولارعا قانشا ورىندىق مەكتەپ, قانشا ورىنعا بالاباقشا كەرەك دەپ ەسەپتەپ, ويلاۋلارىڭ كەرەك قوي. سەندەرگە ەكى اپتا ۋاقىت بەرەمىن, وسى اۋىلداردىڭ ينجەنەرلىك-ينفراقۇرىلىمى - سۋى, جارىعى, جولى, جارىقتاندىرىلۋى, سول سياقتى مەكتەپ, بالاباقشا سياقتى الەۋمەتتىك نىساندارى بويىنشا جان-جاقتى تولىقتىرىلعان جوبالارىڭدى اكەلىپ كورسەتەتىن بولاسىڭدار», - دەدى.
مۇنان سوڭ جاستار – 2 تۇرعىن اۋدانىنىڭ جايىمەن تانىسۋ كەزەگى كەلدى. مۇندا سۋ قۇبىرلارىن تارتۋ جۇمىسى وتكەن جىلى اياقتالعان. ەندى ەلەكتر جەلىلەرىن تارتۋعا كىرىسپەك. بۇل اۋىلعا № 227 جانە № 27 اۆتوبۋستار باعىتتالعان. وبلىس اكىمى ا. باتالوۆ اۋىلدىڭ اۆتوبۋس جۇرەتىن نەگىزگى كوشەسىن اسفالتتاۋمەن قاتار, جاياۋ جۇرگىنشى جولىن, ارىق جۇيەلەرىن قوسا قاراستىرۋدى ەسكەرتتى. نەگىزگى كوشەدەن باسقا 13 كوشەگە دە قيىرشىق تاس توسەلمەك. قالا اكىمى د. شالتاباەۆ جاستار – 3 اتالاتىن اۋماقتىڭ جەر ۋچاسكەلەرى ازىرگە تاراتىلماعانىن ايتتى. وسى ورايدا وبلىس باسشىسى ا. باتالوۆ: «جاستار – 3 تۇرعىن اۋدانىن ۇلگىلى اۋىل رەتىندە جاسايمىز, ەڭ الدىمەن بارلىق قاجەتتى ينفراقۇرىلىمىن جوباعا سايكەس تولىق جۇرگىزىپ بارىپ, تۇرعىن ءۇي سالۋعا ۋچاسكەلەردى بولەتىن بولامىز», - دەدى ول.
كەلەسى كەزەكتە اتقارۋشى ورگان وكىلدەرى قىزىلتاس ساياجايىنىڭ اۋماعىنا كەلدى. بۇل اۋماقتا دا پروبلەمالار جەتەرلىك. ەڭ باستى ماسەلە – ساياجايدى قالامەن جالعاستىراتىن جالعىز كوپىردىڭ جايى. بۇل ماسەلەدەن حاباردار وبلىس اكىمى قالا اكىمدىگىنە بيىل جازدان قالدىرماي كوپىردىڭ قۇرىلىسىن باستاۋدى تاپسىردى. قىزىلتاسپەن قاتار شايقورعاننىڭ دا تۇرعىندارى كوكتەم كەزىندە قىزىل سۋدان قيىندىق كورەتىندەرىن دە ايتتى. وبلىس اكىمى وسىعان بايلانىستى ءتيىستى مەكەمەلەر باسشىلارىنا توتەنشە جاعدايلار جۇيەسى بويىنشا مۇندا دامبا سالۋدى, بىراق دامبانى سۋ شايىپ كەتەتىندەي ەمەس, بەرىك تە ساپالى ەتىپ جاساۋدى ەسكەرتتى. ساياجاي تۇرعىندارى كوعامدىق كولىكتىڭ باعىتىن ۇزارتۋ, جىلى ايالداما قويۋ, قىلمىستىڭ, سونىڭ ىشىندە ۇرلىقتىڭ ءجيى ورىن الۋى, ۇرلىق-قارلىقتى بولدىرماۋ ءۇشىن بەينەباقىلاۋ كامەرالارىن ورناتۋ سياقتى بىرقاتار ۇسىنىستارىن جەتكىزدى. وسى ماسەلەلەرگە قاتىستى قالالىق پوليتسيا قىزمەتىنە, قالالىق اكىمدىككە ءتيىستى تاپسىرمالار بەرىلدى. «پوليتسيا بولىمشەلەرىنە بارلىق جاعدايدى جاسادىق, ماتەريالدىق-تەحنيكالىق بازاسىن نىعايتتىق, بىراق جۇمىستارىڭدا ناتيجە جوق. قىلمىستىڭ اشىلۋى بويىنشا ەڭ تومەنگى كورسەتكىشتەمىز. ەستەرىڭدە بولسىن, پوليتسيانىڭ رەاكتسياسى قالانىڭ ورتاسىندا بولعان ۇرلىق پەن ساياجايدا بولعان ۇرلىقتىڭ ەكەۋىنە دە بىردەي بولۋى كەرەك», - دەدى وبلىس باسشىسى پوليتسيا قىزمەتى باسشىلارىنا قاراتا.
وسى رەتتە ءۇيتاس ساياجايىنىڭ تۇرعىندارى دا اۋىز سۋدان تارىعىپ وتىرعاندارىن ايتىپ شاعىمداندى. «بۇل ماسەلەگە رەسپۋبليكالىق بيۋدجەتتەن قارجى بولىنەدى. بىراق ءبىز ونى كۇتىپ قاراپ وتىرماي, وبلىستاعى رەزەرۆتىك قوردان 200 ملن. تەڭگە ءبولىپ, قۇرىلىس جۇمىستارىن باستاي بەرەمىز», - دەدى ا. باتالوۆ. سول سياقتى ءۇيتاس ساياجايىندا بەس جىل بۇرىن سالىنعان, قازىر جۇمىس ىستەپ تۇرعان مەشىتتىڭ قۇجاتتارىنىڭ ءالى كۇنگە راسىمدەلمەۋ قيىندىقتارىنا قاتىستى دا ماسەلە كوتەرىلدى. وبلىس اكىمى بۇل پروبلەمانى شەشۋگە قالالىق اكىمدىككە ءۇش كۇن ۋاقىت بەردى.
كوكتال شاعىن اۋدانى – قالانىڭ حالىق ءجيى قونىستانعان اۋداندارىنىڭ ءبىرى. بۇل جەردە دە نەگىزگى اسفالت جولعا ورتاشا جوندەۋ جۇرگىزۋ, ەلەكتر جەلىلەرىن تارتۋ جۇمىستارى اياقتالماعان ەكى كوشەدەگى جۇمىستارى ءبىتىرۋ, جىلى ايالدامالار قويۋ, تۇنگى جارىقتاندىرۋ ماسەلەلەرى ايتىلدى. سول سياقتى وبلىس باسشىسىنا جوبالىق قۇنى 116 ملن. تەڭگە بولاتىن ورتالىق ساياباقتىڭ جوباسى تانىستىرىلدى. قارجىنىڭ بولىنۋىنە قاراي اۋىل ءىشىن گازداندىرۋعا كىرىسۋ كەرەكتىگى دە ايتىلىپ, اۋىلدىق دارىگەرلىك امبۋلاتوريا سالۋ, مادەنيەت ءۇيىن قايتا جاڭعىرتۋعا قاتىستى ۇسىنىستار قولداۋ تاپتى.
ارالاۋ سوڭىندا كورگەن-تۇيگەن نارسەلەرى مەن بەرگەن تاپسىرمالارىن قورىتىندىلاعان وبلىس اكىمى ا. باتالوۆ:
- قالانىڭ شەتكى اۋماقتارىن ەڭ الدىمەن سۋمەن, ەلەكتر جارىعىمەن قامتۋعا, نەگىزگى كوشەلەرىن اسفالتتاۋعا نازار اۋدارۋ كەرەك. ولارعا جۇرەتىن قوعامدىق كولىكتىڭ ءجۇرۋ باعىتتارىن تۇرعىنداردىڭ تالاپتارىن ەسكەرە وتىرىپ, قايتا قاراڭدار. جىلى ايالدامالار قويىپ, سول جەرگە بەينەباقىلاۋ كامەرالارىن ورناتىڭدار. ونى ەشكىم بۇزىپ-شاعىپ كەتپەۋى ءۇشىن باقىلاپ وتىرۋعا كامەرالار مىندەتتى تۇردە كەرەك. شەتكى اۋىلدارداعى الەۋمەتتىك نىساندار بويىنشا ناقتى جوبالارىڭدى اكەلىپ كورسەتەسىڭدەر. اتقارىلعان جۇمىس بويىنشا ماعان ەمەس, حالىقتىڭ الدىندا ەسەپ بەرەتىن بولاسىڭدار, - دەدى ا. باتالوۆ.
