توپ الدىنا تۇسكەن بويى جەر اپشىسىن قۋىرىپ, العا سۋىرىلىپ سالا بەرگەن. سول زىرلاعان كۇيى سورەگە جەتىپ, دامىلداعان. قارسىلاستارىنان اجەپتاۋىر قارا ءۇزىپ كەتكەنىن اڭعارعان. جاقىن-الىس قاشىقتىقتارعا جۇگىرىپ, ازدى-كوپتى تاجىريبە جيناقتاعان ونىڭ سپرينتەرلىك ۇشقىرلىعىنا توتەپ بەرۋ وڭاي بولمايتىن. 15 جاسىندا جاسىنداي جارقىراپ, وزگە مەملەكەتتەردىڭ ءوزى قۇرالىپتاس جۇيرىكتەرىن شاڭ قاپتىرعان بەيمالىم ورەننەن مۇنداي بيىك ناتيجەنى باسقالار كۇتپەگەنىمەن, جاتتىقتىرۋشىسى شاپپاي الاتىن جەڭىسىنە ەش ءشۇبا كەلتىرمەگەن ەدى.
سپورتتىڭ «پاديشاسى» سانالاتىن جەڭىل اتلەتيكامەن اينالىسۋ الماس بەيسەنوۆتىڭ ويىنا دا كىرمەگەن. اتاقتى فۋتبولشىلارعا ەلىكتەپ, اياقدوپتىڭ قىر-سىرىن مەڭگەرۋ سيقىرى باۋراپ العان. بەسىنشى سىنىپتا وقىپ جۇرگەندە عوي, قۇيىنداي زىمىرايتىن جىلدامدىعىن, ۇرشىقشا ۇيىرىلەتىن شاپشاڭدىعىن, جۇيتكي جونەلگەندە قاڭباقتاي جەڭىلدىگىن بايقاپ قالعان دەنە تاربيەسى ءپانىنىڭ مۇعالىمى ۆيكتور ۆينوكۋروۆ فۋتبول سەكتسياسىنا جەتەكشىلىك ەتەتىن اناتولي گوربۋنوۆتان اتتاي قالاپ الىپ, بالعىننىڭ بارعىسى كەلمەي بۇلتالاقتاعانىنا قاراماستان جەڭىل اتلەتشىلەر ۇيىرمەسىنە ەرىكسىز جازدىرتقان. دەگەنىنە كوندىرگەن. جەكە قامقورلىعىنا الاتىنىنا ۋادە ەتكەن. «بۇلاق كورسەڭ كوزىن اش» دەمەكشى, جاقسىلاپ تاربيەلەسە, تۇبىندە مىقتى سپورتشى شىعاتىنىن تۇيسىگى الداماپتى. جاسوسپىرىمدەر, جاستار, ەرەسەكتەر اراسىندا 1500 جانە 3000 مەترلىك قاشىقتىقتارعا جۇگىرۋدەن 18 مارتە قازاقستاننىڭ چەمپيونى اتانۋ كەز كەلگەن سپورتشىنىڭ پەشەنەسىنە بۇيىرا بەرمەسە كەرەك. جەڭىل اتلەتتەردىڭ قۇراما كومانداسىنا قابىلدانىپ, قىرعىزستان, رەسەي, تۇرىكمەنستان, وزبەكستان, بالتىق جاعالاۋى ەلدەرىندە وتكەن حالىقارالىق بايراقتى باسەكەلەردە ولجا سالعان.
ونىڭ «سپورت – مەن ءۇشىن حوببي عانا» دەۋى نەگىزسىز ەمەس. بالكىم, وتتاي جالىنداعان جاستىق شاعىن, سانالى عۇمىرىن وسى سالاعا ارناپ, ومىرلىك مۇرات-ماقساتقا اينالدىرعاندا التى الاشقا تانىمال كاسىبي سپورتشى بولاتىنى ءسوزسىز ەدى. بىراق ا.بەيسەنوۆ ءال-فارابي اتىنداعى قازاق ۇلتتىق ۋنيۆەرسيتەتىنەن دەنە تاربيەسى جانە سپورت مۇعالىمى ماماندىعىن الىپ شىققاننان كەيىن تۋعان جەرگە جەتكەنشە اسىعىپ, پەرزەنتتىك پارىزىن وتەۋدى حوش كوردى. تاڭداۋدان قاتەلەسپەگەنىنە ۋاقىت تورەشى. ايىرتاۋ اگروتەحنيكالىق كوللەدجىندە جۇمىس ىستەي ءجۇرىپ جۇزدەگەن تۇلەكتەردى وتانشىلدىق, سالاماتتى ءومىر ءسۇرۋ رۋحىندا تاربيەلەۋگە بەلسەنە اتسالىستى. بالالار جانە جاسوسپىرىمدەر سپورت مەكتەبىندە جەڭىل اتلەتشىلەر سەكتسياسىن اشۋى, جاتتىقتىرۋشىلىق قىزمەتى, جەرگىلىكتى جەردەگى سپورتشى بالعىنداردىڭ وبلىستا, رەسپۋبليكادا تانىلۋىنا ۇلكەن ەڭبەك ءسىڭىرۋى پرەزيدەنتىمىزدىڭ, قازاقستان حالقى اسسامبلەياسىنىڭ العىس حاتتارىمەن, باسقا دا ماراپاتتارمەن اتاپ ءوتىلدى. «سپورت سالاسىنىڭ وزىق قىزمەتكەرى» اتالىمىنىڭ يەگەرى بولدى. بۇگىندە اگروكوللەدج باسكەتبولدان, توعىزقۇمالاقتان ءوڭىردىڭ, «اق بيداي» سپارتاكياداسىنىڭ كوشباسشى كومانداسى سانالادى.
تاعدىردىڭ توعىستىرۋىمەن يانا ەسىمدى سۇلۋ بويجەتكەندى كەزدەستىرىپ, جان جارى ۇيەلمەلى-سۇيەلمەلى ءۇش ۇلدى دۇنيەگە اكەلدى. يانا – سپورتشىلار اۋلەتىنەن. يادرو, ديسك, نايزا لاقتىرۋدان, جەڭىل اتلەتيكادان ەل بىرىنشىلىگىنىڭ كۇمىس جۇلدەگەرى. «بىرگە ءومىر ءسۇرۋ» اتتى رەسپۋبليكالىق جاستار فەستيۆالى بارىسىندا «جىلدىڭ ەڭ ۇزدىك سپورتشى وتباسى» اتالىمى بويىنشا جەڭىمپاز اتانعاندا ۇلدارىمىزدىڭ قولقاناتقا جاراپ قالعانىنا قۋاندىق. اسلان مەن ديار ءبىزدىڭ جولىمىزدى جالعاستىرۋعا نيەتتى. وتباسىنىڭ تىرەگى دە, التىن دىڭگەگى دە – وتاعاسى. الماس مۇنداي قۇرمەتتەرگە ابدەن لايىق», دەيدى جان جارى. قيىن دا قىزىقتى كەزەڭگە تولى ءومىردىڭ ءبىر ۇزىگىن الماس بىلاي تەبىرەنە ەسكە الادى: «بيىل «رۋحاني جاڭعىرۋ باعدارلاماسى شەڭبەرىندە قاراعاندىدا 6,5 مىڭ ادامنىڭ باسىن قوسقان «ارمانعا جول» مارافونى ۇيىمداستىرىلدى. مەن ءوز شاكىرتتەرىمدى ۇكىلەپ قوستىم. ءبارى دە ءوز دەڭگەيىنەن كورىندى. ستەپان سپاسسكي ەكى شاقىرىمعا جۇگىرىپ, 8-14 جاس ارالىعىندا قاتىسۋشىلار اراسىندا جەڭىمپاز اتاندى. مۇمكىندىگى شەكتەۋلى جاندار لەگىنە قوسىلعان اناتولي گوربۋنوۆ مارەگە ءبىرىنشى بولىپ كەلدى. دانيل ناگوۆيتسىن جەتى شاقىرىمدىق جارىستى ءۇشىنشى بولىپ تۇيىندەدى. دميتري كوۆال دەگەن تاعى ءبىر تۇلەگىمىز الماتىدا وتكەن رەسپۋبليكالىق ەستافەتادا كۇمىس مەدالعا يە بولدى.تاربيەلەنۋشىلەرىم ۇستاز سەنىمىن اقتاپ جاتسا, بۇدان اسقان باقىت جوق».
بىلتىر «قازاقستاننىڭ 100 جاڭا ەسىمى» جوباسى قورىتىندىلانعاندا قوعامعا سىڭىرگەن ەڭبەگىمەن, ۇيىمداستىرۋشىلىق, ادامگەرشىلىك سەكىلدى قاسيەتتەرىمەن دارالانعان 102 جەڭىمپازدىڭ ءبىرى رەتىندە الماس بەيسەنوۆتىڭ دە ەسىمى اتالدى. ىرىكتەۋ كەزەڭىنەن مۇدىرمەي وتكەن وعان 10085 داۋىس جينالۋى ەل الدىنداعى بيىك بەدەلىن ايعاقتاسا كەرەك.
الماس اگروتەحنيكالىق كوللەدجدەگى سپورت زالدىڭ بيىل كۇردەلى جوندەۋدەن وتەتىنىنە قۋانسا, كەي ۇسىنىستارىنىڭ قولداۋ تاپپاعانىنا رەنىشتى. ونىڭ ايتۋىنشا, اۋدان ورتالىعىندا قۇرامىندا سپورت زالدارى مەن الاڭدارى, كەشەندى قۇرال-جابدىقتارى بار دەنەشىنىقتىرۋ-ساۋىقتىرۋ ورتالىعىن سالۋ مەرزىمى الدەقاشان ءپىسىپ-جەتىلسە دە شەشىمىن تاپپاي كەلەدى. ماسەلەنىڭ اششى ىشەكتەي سوزىلىپ كەتۋىنە بيلىك تۇتقاسىن ۇستاعان كەي شەنەۋنىكتەردىڭ سپورت زالى سالىنسا جەتكىلىكتى دەگەن ۇستانىمى بوگەسىن بولىپ وتىرعان كورىنەدى. بىراق بۇل ويدىڭ نەگىزسىزدىگىن دالەلدەپ بەرگەن قايسار جان وزىنە جۇكتەلگەن جاستاردىڭ اماناتىن ورىنداعانشا تىنىم تابار ەمەس.
ول ەگەر 19-شى مارتە جەڭىمپاز اتانىپ جاتسا, ەش تاڭىرقاۋعا بولماس.
ءومىر ەسقالي,
«Egemen Qazaqstan»
سولتۇستىك قازاقستان وبلىسى
