قۇرىلىسى قىرىق قۇراۋ كارديوحيرۋرگيا ورتالىعى
بەيسەنبى, 19 ءساۋىر 2012 7:39
پاۆلوداردا كارديوحيرۋرگيا ورتالىعىنىڭ قۇرىلىسى باستالعاندا جەرگىلىكتى تۇرعىندار ءبىر سەرپىلىپ قالعان ەدى. «100 مەكتەپ, 100 اۋرۋحانا» باعدارلاماسىنا سايكەس ەلىمىزدىڭ دەنساۋلىق ساقتاۋ مينيسترلىگىنىڭ تاپسىرىسى بويىنشا قولعا الىنعان. جوبالىق-سمەتالىق قۇنى 7,6 ملرد.تەڭگە تۇراتىن ورتالىق 50 توسەكتىك. مۇندا جىلىنا 700-دەي كۇردەلى وپەراتسيا جاسالۋى ءتيىس. 2010 جىلدىڭ مامىر ايىندا ىسكە قوسىلۋعا ءتيىس ورتالىقتىڭ قۇرىلىسى ءالى اياقتالعان جوق.
بەيسەنبى, 19 ءساۋىر 2012 7:39
پاۆلوداردا كارديوحيرۋرگيا ورتالىعىنىڭ قۇرىلىسى باستالعاندا جەرگىلىكتى تۇرعىندار ءبىر سەرپىلىپ قالعان ەدى. «100 مەكتەپ, 100 اۋرۋحانا» باعدارلاماسىنا سايكەس ەلىمىزدىڭ دەنساۋلىق ساقتاۋ مينيسترلىگىنىڭ تاپسىرىسى بويىنشا قولعا الىنعان. جوبالىق-سمەتالىق قۇنى 7,6 ملرد.تەڭگە تۇراتىن ورتالىق 50 توسەكتىك. مۇندا جىلىنا 700-دەي كۇردەلى وپەراتسيا جاسالۋى ءتيىس. 2010 جىلدىڭ مامىر ايىندا ىسكە قوسىلۋعا ءتيىس ورتالىقتىڭ قۇرىلىسى ءالى اياقتالعان جوق.
ۇستىمىزدەگى جىلدىڭ قاڭتار ايىندا مەملەكەت باسشىسى نۇرسۇلتان نازارباەۆتىڭ ءتوراعالىعىمەن ۇكىمەتتىڭ كەڭەيتىلگەن وتىرىسى وتكەنى بەلگىلى. وسى جيىندا ەلىمىزدە قابىلدانعان «100 مەكتەپ, 100 اۋرۋحانا» باعدارلاماسى بويىنشا جوسپارلانعان 103 ەمدەۋ نىسانىنىڭ 57-ءسى عانا پايدالانۋعا بەرىلگەنى ءمالىم بولدى. سول پايدالانۋعا بەرىلمەي قالعان 46 ەمدەۋ ورنىنىڭ قاتارىندا پاۆلودارداعى كارديوحيرۋرگيالىق ورتالىق تا بار. ءبىز سىلاق, سىرلاۋ, اعارتۋ جۇمىستارى ءجۇرىپ جاتقان ورتالىقتى ارالاپ كوردىك. قاسىمىزدا وسى قۇرىلىستى جۇرگىزىپ جاتقان استانالىق «جاڭا قۇرىلىس سپك» سەرىكتەستىگىنىڭ جاۋاپتى وكىلى قانات يبراەۆ بار, جەرتولەگە دە تۇستىك.
ءسوز رەتى كەلگەندە ايتا كەتەيىك, دەنساۋلىق ساقتاۋ مينيسترلىگىنىڭ وكىلى سەرىك مۋسين استاناعا كەتىپ بارامىن دەپ بىزبەن سۇحباتتاسۋدان ات-تونىن الا قاشتى. مەردىگەرلەر 80-90 پايىزعا دايىن دەسە دە, 6 بىردەي بولىمشە-بلوك كورپۋستارىن ارالاپ شىققاندا بايقاعانىمىز – ءالى كەزەگىن كۇتىپ تۇرعان جۇمىس باستان اسادى. جوعارى جاقتاعىلار «الداعى مامىر ايىندا قايتسەڭدەر دە تاپسىرۋلارىڭ كەرەك» – دەگەنمەن ءتورت-بەس جىل ىشىندە بىتپەگەن قىرىق قۇراۋ, مىڭ بۇراۋ قۇرىلىس جۇمىستارىنىڭ باسىن قوسىپ رەتتەپ, ەندى قالعان ەكى ايدىڭ ىشىندە ءبىتىرىپ, ساقاداي-ساي ەتىپ شىعارۋ مۇمكىن ەمەس سياقتى. مۇنىڭ سەبەبى, قانات يبراەۆتىڭ ايتۋىنشا, ماسەلە تاعى دا قارجىعا كەپ تىرەلىپ تۇر. بۇل نە دەگەن سوندا بىتپەيتىن, تۇبىنە جەتىپ بولمايتىن قاراجات, 7 ملرد. تەڭگە! جەتپەدى مە دەپ تاڭعالاسىڭ. ءبولىنگەن قاراجاتقا قۇرىلىس تا جۇرگىزىلدى, شەتەلدىك جابدىقتار, قوندىرعىلار دا الىندى دەيدى. قۇرىلىسى ءالى بىتپەگەن ورتالىق بولىمشەلەرىنىڭ ىشىندە ءۇستىنىڭ شاڭى بەس ەلى قىمبات شەتەلدىك مەديتسينالىق قۇرال-جابدىقتاردى كورگەندە جاعامىزدى ۇستاعانداي بولدىق. ءتىپتى, وسىدان ەكى جىل بۇرىن اكەلىنگەن باعاسى اسا قىمبات شەتەلدىك ماگنيتتى رەزونانستىق كومپيۋتەرلىك تاموگراف قۇرىلعىسى ەلەكتر قۋاتىنا قوسىلىپ قويىلىپتى. ونىڭ ءمانىن سۇراعانىمىزدا, ماماندار بۇل قۇرىلعىلار ءسال ۋاقىت ەلەكتر قۋاتىنان اجىراتىلعان جاعدايدا قولدانىسقا مۇلدەم جارامسىز بولىپ قالاتىنىن ايتتى. اينالا قۇرىلىس جۇمىستارى ءجۇرىپ جاتىر. سوندا ەرتەڭگى كۇنى بۇل قۇرىلعىلاردىڭ دۇرىس جۇمىس جاسايتىنىنا كىم كەپىل.
ايتا بەرسەك, وسىنداي سوراقىلىقتار تولىپ جاتىر. سونىمەن, ورتالىق ۋاقىتىندا قۇرىلىسى ءبىتىپ, نەگە اشىلمادى؟ بۇل سۇراققا جاڭا ورتالىققا قىزمەتكە كەلمەكشى دارىگەرلەردىڭ دە, وبلىستىق دەنساۋلىق ساقتاۋ باسقارماسىنىڭ دا جاۋابى ءبىر, قارجىعا بايلانىستى بولار, جوبا قۇرىلىسىندا كۇتپەگەن ماسەلەلەر تۋىنداعان با, ول جاعى بىزگە بەلگىسىز,– دەيدى. ول قانداي ماسەلەلەر؟ جالپى, بۇل جوبانى اۋەلدە 2007 جىلى ورتالىقتىڭ قۇرىلىسىن سالۋ جونىندە جاريالانعان كونكۋرستا نەمىستىڭ ءبىر كومپانياسى جەڭىپ العان كورىنەدى. ەۋروپادا سالىناتىن ءتۇرلى مەديتسينالىق مەكەمەلەردىڭ قۇرىلىسىن جوبالايتىن بۇل كومپانيا ءۇش قاباتتى ورتالىق سالماقشى بولادى. كەيىن دەنساۋلىق ساقتاۋ مينيسترلىگى جوباعا وزگەرىستەر ەنگىزىپ, ورتالىقتى 2 قاباتتى ەتىپ تۇرعىزۋ جونىندە شەشىم شىعارعان كورىنەدى. ال, 3-ءشى قابات الىنسىن دەگەن شەشىم شىققان سوڭ, جەكە-جەكە سالىنعان ورتالىقتىڭ بلوك-كورپۋس-بولىمشەلەرىنىڭ ءۇشىنشى قاباتتارى جانە ولاردىڭ ورتاسىن اينەكتى جابىندىمەن قوسىپ تۇراتىن گالەرەياارالىق بولىگى الىنىپ تاستالىپتى. ءوزىڭىز ويلاپ قاراڭىز, قانشاما شىعىن جاسالدى, قانشاما تەر تەككە توگىلدى.
– بولىمشەلەر ورتاسىن قوساتىن اينەكتەر سولتۇستىكتىڭ ايازىنا شىداماۋى مۇمكىن, جوبانىڭ وزگەرتىلۋىنە, قايتادان جاسالۋىنا وسى سەبەپ بولعان سياقتى, – دەيدى بىزبەن اڭگىمەسىندە قانات يبراەۆ. مۇمكىن, سولاي دا شىعار. ونى مينيسترلىك نەگە ەرتە ويلاستىرماعان. جوعارىدا جەرتولەگە دە تۇسكەنىمىزدى ايتتىق. ادەتتە, مۇندا سۋ-جىلۋ جۇيەلەرى, عيماراتتىڭ جۇمىسىن قامتاماسىز ەتەتىن قوندىرعىلار ورنالاساتىنى بەلگىلى. سولاي دەسەك تە, مۇندا جەرتولەدە دە حالىقتىڭ ساپىرىلىسىپ جۇرەتىن ءتۇرى بار. ويتكەنى, قويمالار, كيىم ىلگىش, كىر جۋاتىن جەر, زەرتحانا – ءبارى وسىندا. ءبىر تاڭعالارلىق جاعداي – بۇل نىساننىڭ قۇرىلىسى جوبالاۋ-سمەتالىق قۇجاتتارى مەملەكەتتىك ساراپتاۋدان وتپەي تۇرىپ-اق باستالىپ كەتكەن. بۇدان پاۆلودار قالاسىنداعى كارديوحيرۋرگيالىق ورتالىقتىڭ جالپى نەمىس جوباسىمەن سالىنۋىنا كەزىندە كەلىسىم بەرىلمەدى مە ەكەن دەگەن وي كەلەدى, بىراق, سول قارسىلىققا قاراماي, قۇرىلىس باستاۋعا قۇجاتى بولماسا دا, جوعارى قىزمەت بابىن پايدالانعان شەنەۋنىكتەر قول قويعان ماسەلەنىڭ بۇگىن مىناداي ميپالاۋ جاعدايعا تۇسكەنى وكىنىشتى. ال, قۇجاتتى 2011 جىلى جەلتوقسان ايىندا عانا الىپتى. سوندا, وعان دەيىن ءۇش جىل بويى بۇل قۇرىلىس زاڭسىز, قۇجاتسىز سالىنعان بولىپ شىققانى ما؟..
ال, جەرگىلىكتى بيلىك, دەنساۋلىق ساقتاۋ باسقارماسى مينيسترلىك وزدەرى تاپسىرىس بەردى, وزدەرى جاۋاپتى دەپ بويلارىن اۋلاق سالعانعا ۇقسايدى. ءايتپەگەندە, وسى ورىنداردىڭ وبلىس ورتالىعىندا قولعا الىنعان ماڭىزدى الەۋمەتتىك نىسانعا باقىلاۋ جاساپ, مينيسترلىكتى مۇنداعى كەلەڭسىزدىكتەردەن دەر كەزىندە حاباردار ەتۋلەرىنە, ءسويتىپ, قۇجاتسىز سالىنىپ جاتقان كۇماندى قۇرىلىستى توقتاتۋلارىنا بولاتىن ەدى عوي.
توقسان اۋىز ءسوزدىڭ توبىقتاي ءتۇيىنى – بۇل ىسكە جاۋاپتى لاۋازىمدى باسشىلاردىڭ ەلىمىزدە قابىلدانعان «100 مەكتەپ, 100 اۋرۋحانا» مەملەكەتتىك باعدارلاماسىن ورىنداۋدا تالاپ پەن ءتارتىپ, جاۋاپكەرشىلىك ۇدەسىنەن شىعا الماعاندارى ايدان انىق.
فاريدا بىقاي,
پاۆلودار.
