جۇرەكتىڭ سول جاق قارىنشاسىنىڭ كومەكشى قۇرىلعىسى 24 جاستاعى الماتىلىق يسمايل تۇرسىنوۆتىڭ جۇرەگىنە 2018 جىلدىڭ 15 جەلتوقسانىندا ورناتىلعان. FIVAD-تىڭ ەرەكشەلىگى, سىرتقا ەشقانداي سىمداردىڭ شىعىپ تۇرمايتىندىعىندا. بۇل پاتسيەنت اعزاسىندا اسقىنۋلاردى بولدىرمايدى, ناۋقاس ەمىن-ەركىن ساۋ ادامدارداي قيمىلداي الادى. اپپاراتتىڭ باتارەياسى كەۋدەنىڭ ىشىندە ورناتىلعان. ونى ارنايى بەلبەۋ ارقىلى ماگنيتتىك تولقىنمەن زاريادتايدى. ال ارنايى قولساعات جۇرەكتىڭ سوعۋىن, قاننىڭ قىسىمىن جانە تاعى باسقا مالىمەتتەردى كورسەتىپ تۇرادى. «بۇرىن دەنەدەن سىم شىعاتىن جەردە باكتەريالار جينالاتىن, ونى ۇنەمى ەمدەپ وتىرۋ قاجەت ەدى. ال جاڭا قۇرىلعىدا ونداي سىمدار جوق. ۇلكەن سومكەنى بىرگە الىپ ءجۇرۋدىڭ قاجەتى دە شامالى», دەدى لوندوننان كەلگەن دوكتور مەنديپ مەxرا.
سۋرەتتە يسمايل تۇرسىنوۆ
حالىقارالىق ستاتيستيكالىق مالىمەتتەرگە سايكەس, الەمدە 26 ميلليون ادام سوزىلمالى جۇرەك جەتكىلىكسىزدىگى سىرقاتىنان زارداپ شەگەدى ەكەن. بۇل ساناتقا جىل سايىن 900 مىڭعا جۋىق جاڭا ناۋقاس قوسىلىپ وتىراتىن كورىنەدى. ال ولاردىڭ 800 مىڭعا جۋىعى جۇرەك ترانسپلانتاتسياسىن قاجەت ەتەدى. بىراق بەس جىلدا دونورىن كۇتپەستەن قايتىس بولاتىنداردىڭ سانى 7% -دان 50%-عا دەيىن جەتەدى ەكەن. «مەحانيكالىق جۇرەكتى قولداۋدى دامىتۋ بەلسەندى تۇردە دامىپ كەلەدى. يننوۆاتسيالىق قۇرىلعىنى ورناتۋ وپەراتسياسى الەمدىك كارديوحيرۋرگيا تاجىريبەسىندە تۇڭعىش رەت جۇزەگە اسىپ وتىر. بۇل قازاقستاننىڭ الەۋەتى جەتكىلىكتى, عىلىم مەن تەحنيكاسى دامىعان ەل ەكەنىن كورسەتەدى. مەن يسمايل تۇرسىنوۆتى تۇڭعىش عارىشكەرگە تەڭەيمىن. ول اۋرۋحاناعا تۇسكەندە ءوز بولمەسىنەن شىعا المايتىن, قاتتى دەمىكپەسى بار ەدى. ۇنەمى دارىگەرلەردىڭ باقىلاۋىندا بولدى. قازىر جاعدايى جاقسى, دالادا سەرۋەندەيدى, سپورت زالدا جاتتىعادى, ءتىپتى, باسسەينگە دە تۇسە الادى», دەدى «ۇلتتىق عىلىمي كارديوحيرۋرگيا ورتالىعى» اق باسقارما توراعاسى يۋري پيا.
باس كارديوحيرۋرگتىڭ ايتۋىنشا, جىلىنا 150-گە جۋىق ناۋقاس وسىنداي وپەراتسيانى قاجەت ەتەدى. يننوۆاتسيالىق قۇرىلعى يزرايلدە جاسالعان. الداعى ۋاقىتتا FIVAD-قا ەۋروپالىق سەرتيفيكات الىپ, ەۋروپادا جانە امەريكادا ەكسپەريمەنت جۇرگىزىلمەك. سودان كەيىن ونى تەگىن مەديتسينالىق كومەكتىڭ ساناتىنا قوسىپ, قازاقستاندىقتارعا تەگىن ورناتۋعا مۇمكىندىك تۋاتىن بولادى.
ءباسپاسوز ءماسليحاتىنا يسمايل تۇرسىنوۆتىڭ ءوزى دە قاتىستى. بۇگىندە ەمىن-ەركىن قوزعالاتىن ەمدەلۋشىنىڭ توسەككە تاڭىلعان قيىن كۇندەرى ارتتا قالدى. جۋرناليستەرگە بەرگەن سۇحباتىندا ول ءوزىن جاقسى سەزىنەتىنىن, سالماعىنىڭ 94 كەلىدەن 67 كەلىگە تۇسكەنىن ايتتى. سوعان قاراماستان يسمايل دارىگەرلەردىڭ باقىلاۋىندا بولادى.
«پرەزيدەنت نۇرسۇلتان نازارباەۆتىڭ باستى ماقساتى – قازاقستان حالقىنىڭ ءومىر ءسۇرۋ ساپاسىن جاقسارتۋ جانە باسەكەگە قابىلەتتى 30 ەلدىڭ قاتارىنا كىرۋ. وسى ماقساتقا جەتۋدىڭ ءبىر جولى – دەنساۋلىق ساقتاۋ سالاسىنا ينۆەستيتسيا سالۋ. 2009 جىلى قۇرىلعان ۇلتتىق كارديوحيرۋرگيا ورتالىعى بۇگىندە الەمدەگى ەڭ مىقتى كارديوحيرۋرگيالىق ورتالىقتاردىڭ بىرىنە اينالدى. الداعى ۋاقىتتا دا بۇل ورتالىق عىلىمي-ساياسي سەرىكتەستەرىمەن بىرلەسىپ قازاقستاندىقتاردىڭ يگىلىگى ءۇشىن ساپالى قىزمەت ەتەدى دەپ سەنەمىن», دەدى بريفينگتە دەنساۋلىق ساقتاۋ ءمينيسترى ەلجان ءبىرتانوۆ.
مايگۇل سۇلتان,
«Egemen Qazaqstan»
فوتو: ortcom.kz
