دەنساۋلىق دەمەۋشىسى الماتى كوپ سالالى كلينيكالىق اۋرۋحاناسى تۋرالى ءسوز
بەيسەنبى, 11 قازان 2012 7:11
الماتى وبلىسىنىڭ وڭتۇستىك ءوڭىرىنىڭ تۇرعىندارىنا 60 جىلدان استام ۋاقىت ساپالى مەديتسينالىق قىزمەت كورسەتىپ كەلە جاتقان الماتى كوپ سالالى كلينيكالىق اۋرۋحاناسى «باسى اۋىرىپ, بالتىرى سىزداپ», جانىنا داۋا ىزدەپ كەلگەن جانداردىڭ ماڭداي تىرەيتىن بىردەن-ءبىر ەمدەۋ ورنى, قازاقى ۇعىممەن ايتساق, قاراشاڭىراعى…
بەيسەنبى, 11 قازان 2012 7:11
الماتى وبلىسىنىڭ وڭتۇستىك ءوڭىرىنىڭ تۇرعىندارىنا 60 جىلدان استام ۋاقىت ساپالى مەديتسينالىق قىزمەت كورسەتىپ كەلە جاتقان الماتى كوپ سالالى كلينيكالىق اۋرۋحاناسى «باسى اۋىرىپ, بالتىرى سىزداپ», جانىنا داۋا ىزدەپ كەلگەن جانداردىڭ ماڭداي تىرەيتىن بىردەن-ءبىر ەمدەۋ ورنى, قازاقى ۇعىممەن ايتساق, قاراشاڭىراعى…
الماتى كوپ سالالى كلينيكالىق اۋرۋحاناسى 1952 جىلدىڭ 10 قاڭتارىندا الماتى وبلىستىق حالىق دەپۋتاتتارى كەڭەسىنىڭ شەشىمىمەن الماتى قالاسىنداعى مالايا ستانيتسا اۋرۋحاناسى بازاسىندا 75 ورىندىق مەكەمە رەتىندە قۇرىلادى. جىل سوڭىنا دەيىن ەمدەۋ مەكەمەسى 200 ورىندىق تەراپيا, حيرۋرگيا, بالالار جانە پەرزەنتحانا بولىمدەرىمەن تولىعادى. 1958 جىلى №2 وبلىستىق اۋرۋحانا تالدىقورعان قالاسىندا اشىلىپ, اتالمىش ەمدەۋ ورنى №1 الماتى وبلىستىق اۋرۋحاناسى اتانادى. ون جىلدان كەيىن 250 ورىندىق ەمدەۋ جانە كۇنىنە 500 كىسى قابىلدايتىن ەمحاناسى بار 3 بوكستان تۇراتىن, جەرگىلىكتى راديوتەلەفون قىزمەتىمەن قامتىلعان 3 قاباتتى عيمارات پايدالانۋعا بەرىلەدى. ودان كەيىنگى جىلدارى ۋرولوگيا (30), نەۆرولوگيا (30), ونكولوگيا (30), تراۆماتولوگيا (40) بولىمدەرىمەن تولىعىپ, اۋرۋحانا 355 ورىنعا ۇلعايادى. اقىل-كەڭەستىك ەمحانا قۇرامىندا جوسپارلى شۇعىل كومەك كورسەتەتىن بولىمشە اشىلىپ, ساناۆياتسيا جاساقتالادى. بۇل ءبولىمدە 3 ۇشاق, 5 دارىگەر, 4 ديسپەتچەر, 10 جۇرگىزۋشى تاۋلىك بويى جۇمىس ىستەيدى. ال 1972 جىلى وبلىستىق اۋرۋحانادا 10 اۋداننىڭ 718 مىڭ حالقىنا قىزمەت كورسەتەتىن تەراپيا, گاستروەنتەرالوگيا بولىمدەرىمەن توسەك-ورىن سانى 450-گە ۇلعايادى.
اۋرۋحانانىڭ قالىپتاسۋ كەزەڭدەرى مەن ءوسۋ جولدارى رەسپۋبليكا دەنساۋلىق ساقتاۋ سالاسىنىڭ كۇللى دامۋ جۇيەسىمەن تىعىز بايلانىستى. وعان دالەل, 1978 جىلى الماتىدا تاريحي وقيعا بولىپ تىركەلگەن دۇنيەجۇزىلىك دەنساۋلىق ساقتاۋ ۇيىمىنىڭ ۇيىمداستىرۋىمەن الەمنىڭ 134 مەملەكەتىنەن مىڭنان اسا دەلەگات قاتىسقان حح عاسىردىڭ ۇلى حارتياسى – «الماتى دەكلاراتسياسى» قابىلدانعان حالىقارالىق كونفەرەنتسيادا مەديتسينا ماماندارى مەن عالىمدارىنا كورسەتىلگەن 50 نىساننىڭ 38-ءى وسى الماتى وبلىستىق اۋرۋحاناسىنا قارايتىن ەمدەۋ مەكەمەلەرى ەدى. سول جولى كونفەرەنتسيا دەلەگاتتارى ەلىمىزدىڭ مەديتسينا ماماندارىنىڭ ءبىلىمى مەن بىلىكتىلىگىنە جوعارى باعا بەرىپ, ءبىزدىڭ العاشقى مەديكو-سانيتارلىق كومەك كورسەتۋ جۇيەسىن وزدەرىنە قولدانۋعا ۇيعارىم جاسايدى.
1986 جىلى 2 قاباتتى جاڭا اكۋشەرلىك-گينەكولوگيا كورپۋسى ىسكە قوسىلادى. ءسويتىپ, پەريناتالدى ورتالىق (150), پۋلمانولوگيا (30), نەيروحيرۋرگيا (30), جانساقتاۋ (6) بولىمدەرى اشىلىپ, اۋرۋحاناداعى كەرەۋەت سانى 610-عا جەتەدى. اسىرەسە, پەريناتالدى ورتالىقتىڭ اشىلۋى وبلىستىڭ اكۋشەرلىك-گينەكولوگيا قىزمەتىنە سەرپىن بەرەدى. ۇكىمەت تاراپىنان مول قاراجات ءبولىنىپ, انەستەزيولوگ, رەانيماتولوگ, اكۋشەر-گينەكولوگتان قۇرالعان دارىگەرلەر توبى تاۋلىك بويى قىزمەت كورسەتەدى. سول كەزەڭدە وبلىس كولەمىندە انا ءولىمىنىڭ جىلىنا 25-29 وقيعاسى تىركەلسە, جاڭا ورتالىق قىزمەتىنەن كەيىن بۇل كورسەتكىش 2 ەسەگە ازايادى.
ءيا, وتكەنسىز بۇگىن جوق دەگەن. كەزىندە ۇيىمداستىرۋ, قالىپتاسۋ, ءوسۋ, كوركەيۋ جولدارىن باسىنان وتكىزگەن اۋرۋحانا وبلىس جۇرتشىلىعىنا مەديتسينالىق قىزمەت كورسەتەتىن ءىرى ورتالىق بولىپ قالىپتاسۋىمەن قاتار, ەلىمىزدە كاسىبي دارىگەر مامانداردى دايارلاۋدا وزىندىك ءداستۇرى بار مەكتەپ تە بولا ءبىلدى. بۇگىندە الپىس بەلەستى باعىندىرعان وبلىستىق ەمدەۋ مەكەمەسىنىڭ ىرگەتاسىن قالاپ, اۋرۋحانانىڭ العاشقى باس دارىگەرى قىزمەتىن اتقارعان قازاق كسر-ءىنىڭ ەڭبەك سىڭىرگەن دارىگەرى, وتان سوعىسىنىڭ ارداگەرى ءابدىعالي تۇرجانوۆتىڭ ەڭبەگى ۇرپاقتار جادىندا ەش ۇمىتىلماق ەمەس. ابدىعالي تۇرجان ۇلىنىڭ باستاعان ءىسىن ودان ءارى جالعاستىرىپ, اۋرۋحانانى باسقارىپ, ونىڭ كوركەيىپ, دامۋىنا ۇلەس قوسقان ازاماتتار قازىر وتاندىق مەديتسينانى ۇيىمداستىرۋدا بىلىكتى باسشى, كاسىبي مامان رەتىندە ەلىمىزدىڭ ءىرى قالالارى مەن وبلىستارىندا باسشىلىق قىزمەتتى لايىقتى اتقارۋدا. ولاردىڭ قاتارىندا ءالمۇرات ءشارىپوۆ (1968-75), اباي باسپاقوۆ (1975-79), ورىنباي دايىربەكوۆ (1979-81), سايلاۋبەك تاۋكەي ۇلى (1981-88), بولات جۇباشەۆ (1989-95), قانات ابىقۇلوۆ (1995-2002), ۇلتاي كىلتباەۆا (2002-2010), ت.سانسىزباەۆ (2010), ب.قويلىباەۆ (2011) بار. اسىرەسە, ەمدەۋ ورنىن ۇزاق جىلدار باسقارعان ۇلتاي كىلتباەۆا ەڭبەك جولىن وسى اۋرۋحانادان باستاپ, ونىڭ بارلىق باسپالداعىنان وتەدى. ول كىسى باسقارعان كەزدە 2 ملرد. تەڭگە كولەمىندە ارناۋلى مەديتسينالىق جابدىقتار ساتىپ الىنىپ, وبلىستا تۇڭعىش رەت 30 ورىندىق كوز اۋرۋلارى ءبولىمى اشىلادى. اكۋشەرلىك-گينەكولوگيا قىزمەتىن كورسەتۋ ىسىندە دە تۇبەگەيلى وزگەرىستەر ورىن الىپ, انا مەن بالا ءولىمى كۇرت ازايادى. قالاي دەگەندە دە, وبلىستىق كلينيكالىق اۋرۋحانا ۇستاحاناسىنان شىققان دارىگەرلەردىڭ اراسىندا الماتى وبلىسىنا عانا ەمەس, رەسپۋبليكانىڭ ماقتانىشىنا اينالعان كسرو حالىق ءدارىگەرى ز.م.ماديەۆانى, ەڭبەك قىزىل تۋ وردەندى دارىگەر م.گ. كرىلوۆانى, ت.ب. ۇلكەن قۇرمەتپەن اتاۋعا بولادى.
شىنىن ايتۋ كەرەك, بۇدان ءبىر جىل بۇرىن اۋرۋحانانىڭ باس ءدارىگەرى قىزمەتىنە مەديتسينا عىلىمدارىنىڭ كانديداتى, جوعارى دارەجەلى ۋرولوگ قۋاتجان تۇرىسبەكوۆ كەلگەلى ەمدەۋ ورنىندا ءۇلكەن سەرپىلىس سەزىلەدى. وڭتۇستىك استاناداعى جەدەل جاردەم اۋرۋحاناسىندا قىزمەت جولىن باستاعان قۋاتجان بۇعان دەيىن قازاقستان پرەزيدەنتى ءىس باسقارماسىنىڭ الماتى قالاسىنداعى ورتالىق كلينيكالىق اۋرۋحاناسىندا ۋرولوگيا ءبولىمىنە جەتەكشىلىك جاسايدى. قاعىلەز جاس مامان قاي جەردە قىزمەت اتقارماسىن ءىستىڭ كوزىن ءبىلىپ, ءوز ماماندىعىن مەڭگەرۋدە ۇنەمى ىزدەنىستە جۇرەدى. مىنە, سول قاسيەتتەرى وعان ۇلكەن مەكەمەنى سەنىپ تاپسىرعاندا كۇش-جىگەر قوستى.
قاشاندا بىلىكتى باسشى ءبىر كۇنمەن ءومىر سۇرمەسە كەرەك. ءوزىنىڭ باستاماشىلدىعىمەن, جاڭاشىلدىعىمەن ۇجىمدى بىردەن باۋراپ العان جاڭا باسشى بۇگىندە ورىنتاققا جايعاسا قالسا سەنىمدى كومانداسىن جاساقتايتىندار قاتارىنان بولماي شىعادى. قايتا كەرىسىنشە, سول ۇجىمعا قالايدا كىرىگۋدىڭ جايىن ويلاستىرادى. ەڭ الدىمەن 310 توسەك-ورىندىق اۋرۋحانانىڭ, ونىڭ ىشىندە 12 كلينيكالىق, 13 پاراكلينيكالىق جانە كەڭەس بەرۋ-دياگنوستيكالىق ورتالىقتاردىڭ جۇمىسىمەن, ەمدەۋ ورنىنىڭ ماتەريالدىق-تەحنيكالىق جاعدايىمەن, ونداعى 700-دەن استام قىزمەتكەردىڭ اتقاراتىن قىزمەتىمەن ءجىتى تانىسىپ شىعادى. بۇگىندە اۋرۋحانادا قالتقىسىز قىزمەت جاساپ جاتقان 128 دارىگەردىڭ 9-ى عىلىم دوكتورى, 13-ءى عىلىم كانديداتى, 4-ءۋى دوتسەنت, 2-ءۋى ەڭبەك سىڭىرگەن ءدارىگەر, 45-ءى جوعارى ساناتتاعى ءدارىگەرلەر بولسا, 292 ورتا مەديتسينالىق قىزمەتكەردىڭ 124-ءىنىڭ جوعارى, 32-ءسىنىڭ ءبىرىنشى ساناتتى ەكەنىن ايتار بولساق, ونىڭ ۇلكەن كۇش ەكەنىن, سول ارقىلى الىنبايتىن قامالدىڭ بولمايتىنىن سەزىنە تۇسەسىز.
– ماسەلەن, ءبىر جارىم ملن.-نان استام حالقى بار الماتى قالاسىنىڭ تۇرعىندارىنا مەديتسينالىق قىزمەت كورسەتىپ وتىرعان ەمدەۋ ورىندارىن تاڭداۋعا ەرىكتەرى بار, – دەپ شەشىلە ءسوز باستادى باس دارىگەر قۋاتجان تۇرار ۇلى. – نەگە دەسەڭىز, شاھاردا ءىرى-ءىرى جەتى اۋرۋحانا, وعان ون رەسپۋبليكالىق دارەجەدەگى عىلىمي ورتالىقتى قوسىڭىز. قالا حالقى سونىڭ كەز كەلگەنىنە بارىپ ەمدەلە الادى. ياعني, ولارعا ءمۇمكىنشىلىك تە, تاڭداۋ دا بار. ەكىنشىدەن, ول ەمدەۋ ورىندارىنىڭ بۇگىنگى ماتەريالدىق جابدىقتالۋى وتە جوعارى دەڭگەيدە. ىشىنە كىرسەڭ شىققىسىز.
ال وبلىستىق اۋرۋحاناعا كەلسەك, بۇدان الپىس جىل بۇرىن تۇرعىزىلعان اۋرۋحانانىڭ باس عيماراتىنا 1998, 2003, 2007 جىلدارى كەزەڭ-كەزەڭمەن وبلىستىق بيۋدجەتتەن قوماقتى قاراجات ءبولىنىپ, كۇردەلى جوندەۋ جۇرگىزىلگەنىمەن, ساپاسى تومەن بولىپ, ولاردىڭ دا كەتەۋى كەتىپ تۇر ەدى.
مىنە, وسى ولقىلىقتار مەن شەگىنە جەتكەن كەمشىلىكتەردى جويۋدىڭ جولىن ىزدەگەن باسشى قاجەتتى قۇجاتتاردى دايىنداپ, جاڭادان كەلگەن وبلىس اكىمى اڭسار مۇساحانوۆقا كىرىپ, بار جاعدايدى باياندايدى.
وبلىس اكىمى بار جاعدايدى ناقتى ءبىلىپ, شەشىم شىعارۋ ءۇشىن ارنايى كوميسسيا قۇرادى. وبلىستان كەلگەن ەكونوميست, قارجىگەر, ىسكەر جىگىتتەر بار جاعدايدى كوزىمەن كورىپ, كوڭىلدەرىن سەندىرگەن سوڭ وبلىس اكىمىنىڭ الدىنا نە ىستەۋ كەرەكتىگى جونىندە باعدارلاما جاساپ اپارادى. سونىمەن كۇردەلى جوندەۋ كەزەڭ-كەزەڭمەن ءجۇرگىزىلەتىن بولىپ شەشىلەدى. بيىلعى جىلعا جانساقتاۋ, قابىلداۋ بولىمدەرى, بوساناتىن, كىر جۋاتىن, اس دايىندايتىن بلوكتاردى كۇردەلى جوندەۋدەن وتكىزۋگە 135 ملن., ال اۋرۋحانا اۋماعىن قورشاپ, اباتتاندىرۋ مەن كوگالداندىرۋعا 190 ملن. تەڭگە بولىنەدى.
اۋرۋحانانىڭ باسقا دا پروبلەمالارى دا از ەمەس. وبلىس تۇرعىندارىنا جەدەل جانە جوسپارلى مەديتسينالىق قىزمەت كورسەتەتىن جالعىز مەكەمە بولعاندىقتان ءبۇگىنگى تاڭداعى 310 توسەك-ورىن ازدىق ەتەتىندىكتەن, ناۋقاستاردىڭ كەزەك كۇتۋىنە تۋرا كەلۋدە. بەلگىلەنگەن 310 توسەكتىڭ ورنىنا 350-400 ناۋقاس جاتاتىندىقتان, ءدارى-دارمەك, تاماق, وتالىق ماتەريالدار جەتىسپەي قينالادى. ءويتكەنى, ۇكىمەت قاراجاتى تەك 310 توسەككە ەسەپتەلىنگەن. جانى قينالىپ, اۋرۋى دەندەپ شالعاي اۋىلدان كەلگەن ناۋقاستى قالاي قايتارسىن. بۇل ماسەلەگە دە كوڭىل بولگەن وبلىس اكىمى اماندىق بولسا, اۋرۋحانا اۋلاسىنان ءجۇز ەلۋ ورىندىق قوسىمشا بلوك, سونداي-اق قالانىڭ كۇنباتىس جاعىنان تاعى دا ءۇش ءجۇز توسەكتىك جاڭا اۋرۋحانا سالۋعا قاراجات, ينۆەستورلار قاراستىرامىز دەپ ۋادە ەتۋى ازىرگە داتكە قۋات بەرىپ تۇر.
اۋرۋحانا بۇگىندە مەديتسينالىق تەحنيكا, قۇرىلعى, اپپاراتتارمەن جابدىقتالعان. دەگەنمەن, ءالى كۇنگە وسىنداي ءىرى ەمدەۋ ورنىندا ءدال, ناقتى دياگنوز قويۋدا اۋاداي قاجەت مرت-نىڭ بولماۋىنان ناۋقاستار ءار جەرگە بارىپ, اۋرە-سارساڭعا تۇسۋدە. ەگەر, ەۋروپالىق ستاندارت بويىنشا وتىز مىڭ, دۇنيەجۇزىلىك ستاندارت بويىنشا ءجۇز مىڭ تۇرعىنعا وسىنداي ءبىر اپپارات كەرەكتىگىن ەسكەرسەك, ارينە, ەكى ملن. حالىققا تالدىقورعان قالاسىندا ءبىر قوندىرعى جەتكىلىكسىز.
باس دارىگەر وبلىس اكىمىنىڭ كەلىسىمىن العان سوڭ ۇجىمدى جيناپ, قۋانىشتى حاباردى جەتكىزە وتىرىپ, بيىلعى جىلدىڭ ەرەكشەلىگىن, الدا ۇلكەن جاۋاپكەرشىلىك, سىن تۇرعانىن ايتادى.
– اۋرۋحانانىڭ 60 جىلدىعىن اتاپ وتەتىن بولدىق. بۇل بارشامىزعا ورتاق قۋانىش, – دەپ ۇجىمدى اشىق اڭگىمەگە شاقىردى.
وسىلايشا, دايىندىق باستالىپ كەتەدى. الدىمەن ءومىرى قولعا الىنباعان اۋرۋحانا تاريحىن ءتۇگەندەپ, جيناق دايىنداۋعا كىرىسەدى. ال مەرەيتوي كۇنى وتكىزىلەتىن عىلىمي-تەوريالىق كونفەرەنتسيا اياسىندا وسى ۋاقىتقا دەيىن ءاركىمنىڭ اينالىسىپ جاتقان عىلىمي دەڭگەيدەگى ەڭبەكتەرىنىڭ باسىن قۇراپ, تاعى ءبىر كىتاپ شىعارۋدى ۇيعارادى. وسى ۋاقىت ارالىعىندا قۇرىلىس جۇمىستارى دا اياقتالۋعا جاقىن قالدى. كۇردەلى جوندەۋ بارىسىندا بۇكىل اۋرۋحانا عيماراتتارى سەيسميكالىق جاعىنان كۇشەيتىلىپ, مەتالكونسترۋكتسيامەن قاپتالدى. جانساقتاۋ ءبولىمىنىڭ ەۋروپالىق جوباسى جاسالىنىپ, دۇنيەجۇزىلىك ستاندارتقا لايىقتى جاساقتالدى. كىر جۋاتىن, اسحانا بلوگىنىڭ ءىشى-سىرتى قىرىپ تاستالىپ, تەرەزەلەرى اۋىستىرىلىپ, جىلۋ قازىرگى زامانعا لايىقتالىپ, جاڭا كەيىپكە ەنگەن.
ال اتشاپتىرىم اۋماقتى الىپ جاتقان اۋرۋحانا اۋلاسى دا ادام تانىماستاي وزگەردى.
بۇگىنگىدەي اي سايىن ەمەس, كۇن ساناپ قارىشتاپ دامىپ وتىرعان مەديتسينا كوشىنە ىلەسۋدە ءدارىگەرلەردىڭ ءبىلىمىن جەتىلدىرىپ, كاسىبي شەبەرلىگىن ارتتىرۋ – كۇن ءتارتىبىندەگى ماسەلەنىڭ ءبىرى. بۇل رەتتە اۋرۋحانا دارىگەرلەرى ۇكىمەتتىڭ تەگىن وقىتۋعا ارنالعان باعدارلاماسىنىڭ ناتيجەسىندە شەتەلگە, الماتى مەملەكەتتىك دارىگەرلەر ءبىلىمىن جەتىلدىرۋ ينستيتۋتىنا بارىپ ماماندىعىن شىڭداپ, جەتىلدىرۋدە. ال قوسىمشا ءبىلىم العىسى كەلگەن تالاپكەرلەردى ۇلكەن فارمكومپانيالار ارقىلى دا وقىتىپ الۋدا. ماسەلەن, جىل باسىنان بەرى ون دارىگەر وقىپ كەلسە, قىركۇيەك ايىنان ءبىر دارىگەر كورەيادا ءدارىس الۋدا.
مەديتسيناداعى ۇلكەن جەتىستىگىمىز دەسەك تە بولعانداي, بۇگىندە ساناۆياتسياعا ۇكىمەت قىرۋار قاراجات بولۋدە. ەگەر الىس شالعاي اۋىلدا نەمەسە كولىك جەتە المايتىن قيىن جەرلەردە, ماسەلەن, قويشىنىڭ ايەلى بوسانا الماي جاتسا, اۋدان ورتالىقتارىندا قان كەتۋ فاكتىسى ورىن السا, سانيتارلىق ۇشاقپەن جەدەل تۇردە اۋرۋحاناعا جەتكىزىلەدى. ءبىر جارىم جىلدىڭ ءىشىندە ساناۆياتسياعا ەلۋ, بيىل وتىز, ال رەوانيموبيلگە اي سايىن ءجۇزگە دەيىن شاقىرتۋ ءتۇسىپ جاتادى.
اۋرۋحانادان جيىرما توسەكتىك اقىلى ءبولىم اشىلۋى دا قۇپتارلىق ءىس. بۇعان دەيىن اقىلى ءبولىم بولماعاندىقتان جاقسى جاعداي ىزدەگەن قالتالى ناۋقاستار الماتىنىڭ ەمدەۋ ورىندارىنا نەمەسە جەكە مەنشىك ورىندارىنا كەتىپ جاتتى. سوندىقتان, اقىلى ءبولىم وبلىس كولەمىندە اشىلعان العاشقى قارلىعاش بولىپ سانالادى.
اۋرۋحانا س.د.اسفەندياروۆ اتىنداعى قازاق ۇلتتىق مەديتسينا مەن قازاقستان-رەسەي مەديتسينا ۋنيۆەرسيتەتتەرىنىڭ پروفەسسور-تالىمگەرلەرىمەن كوپ ۋاقىتتان بەرى تىعىز عىلىمي-ءوندىرىستىك بايلانىستا, بۇل ءوز كەزەگىندە ناۋقاستارعا ساپالى مەديتسينالىق قىزمەت كورسەتۋدە وڭ ناتيجە بەرىپ, زور ىقپالىن تيگىزىپ وتىر.
وبلىستىڭ كورسەتكىشى – مەملەكەتتىڭ دە كورسەتكىشى. سوڭعى جىلدارى ەلباسى ن.ءا. نازارباەۆتىڭ 2011-2015 جىلدارعا ارنالعان «سالاماتتى قازاقستان» باعدارلاماسى اياسىندا اۋرۋحانا بولىمشەلەرى زامان تالابىنا ساي حالىققا ساپالى مەديتسينالىق قىزمەت كورسەتۋدە مەديتسينالىق قۇرال-جابدىقتارمەن تولىقتىرىلا تۇسۋدە. سونىڭ ناتيجەسىندە اۋرۋحانادا جوعارى ارناۋلى مەديتسينالىق كومەك كورسەتىلىپ, ميعا, ج ۇلىنعا, كوزگە كۇردەلى وتالار جاسالۋدا. قازىرگى زامان تالابىنا ساي دەنەنى كەسپەيتىن ەندوسكوپەيالىق ادىستەر قولدانىلادى. قان توقتاتاتىن اپپاراتتار الىنعان. بۇگىندە ەلىمىزدە ءولىم مەن سىرقاتتانۋشىلىق جاعىنان ءجۇرەك-قان تامىرلارى اۋرۋلارى ءبىرىنشى ورىندا ەكەنىن ەسكەرسەك, اۋرۋدىڭ العاشقى «التىن ساعاتىندا» كومەك كورسەتىلسە, ناۋقاستى امان الىپ قالۋعا بولاتىندىقتان, مۇندا وعان قاجەتتى اپپاراتتار الۋ جاعى دا قاراستىرىلىپ وتىر. ماسەلەن, وبلىس اكىمدىگىنىڭ قولداۋىمەن 230 مىڭ دوللارعا انگيوگراف الىندى. الداعى ۋاقىتتا جۇرەككە كوروناوگرافيا, انگيوگرافيا, قان تامىرلارىن ستەنتتەۋ, اورتاكورونارلى شۋنتتاۋ وتالارىن جاساۋدى قولعا الماق.
گۇلزەينەپ سادىرقىزى,
«ەگەمەن قازاقستان».
الماتى.
