گۇلشارا ابدىقالىقوۆا ءوز سوزىندە پرەزيدەنت نۇرسۇلتان نازارباەۆ پەن شەيح زايد بەن سۇلتان ناحايان ورناتقان دوستىق بايلانىستار قازاقستان رەسپۋبليكاسى مەن بىرىككەن اراب امىرلىكتەرىنىڭ اراسىن جاقىنداتىپ وتىرعانىن اتاپ ءوتتى.
– ءبىز ەكونوميكادا تەڭ قۇقىقتار مەن مۇمكىندىكتەردى قامتاماسىز ەتۋ ىسىندە ايتارلىقتاي ىلگەرىلەدىك. 2018 جىلى قازاقستان دۇنيەجۇزىلىك ەكونوميكالىق فورۋمنىڭ باعالاۋى بويىنشا «ايەلدەردىڭ ەكونوميكاعا اتسالىسۋى جانە مۇمكىندىكتەرى» كورسەتكىشى جونىنەن 32-ورىندى يەلەندى. بىزگە تسيفرلاندىرۋ ىسىنە باسا نازار اۋدارا وتىرىپ, بيزنەس-قوعامداستىقتاردىڭ ەكونوميكا, ساۋدا, تەحنولوگيا جانە وزگە دە سالالارداعى ىنتىماقتاستىعىن تەرەڭدەتۋ قاجەت, – دەدى مەملەكەتتىك حاتشى.
گ.ابدىقالىقوۆا ەكونوميكالىق ىلگەرىلەۋدىڭ جاستار جىلىنىڭ باسىمدىقتارىنىڭ ءبىرى رەتىندە بەلگىلەنگەنىن ايتتى. بۇگىندە قىزدار بيزنەسپەن بەلسەنە اينالىسىپ, كرەاتيۆتى ستارتاپتار ازىرلەۋدە. جاستار جىلى اياسىندا 11 باعىت بويىنشا 100-دەن استام جوبا جۇزەگە اسىرىلاتىن بولادى.
فورۋم اياسىندا مەملەكەتتىك حاتشى گۇلشارا ابدىقالىقوۆا ءباا ىسكەر ايەلدەر كەڭەسىنىڭ پرەزيدەنتى فاريدا ءال-اۋاديمەن كەزدەستى. اڭگىمەلەسۋ بارىسىندا ايەلدەردىڭ مۇمكىندىكتەرىن ودان ءارى كەڭەيتۋ, سونىمەن قاتار ايەلدەر كاسىپكەرلىگى ينستيتۋتىن نىعايتۋ ماسەلەلەرى تالقىلاندى.
سونىمەن قاتار, مەملەكەتتىك حاتشى ءباا فەدەرالدى ۇلتتىق كەڭەسىنىڭ ءتورايىمى امال ءال-كۋبەيسيمەن كەزدەستى. كەزدەسۋ بارىسىندا الەۋمەتتىك-ەكونوميكالىق جانە مادەني-گۋمانيتارلىق ىقپالداستىق ماسەلەلەرى قارالدى. قازاقستاننىڭ دا امىرلىكتەر سياقتى تاياۋ شىعىستا بارىنە ورتاق ادىلەتتى ءارى بەرىك بەيبىتشىلىكتىڭ تەزىرەك ورناۋىنا مۇددەلى ەكەنى ايتىلدى. تاراپتار ەكىجاقتى ىنتىماقتاستىق اياسىندا استانا مەن ابۋ-دابي ءوزارا تىعىز قارىم-قاتىناستاردى جالعاستىرا بەرەتىنىن ريزاشىلىقپەن اتاپ ءوتتى.
