قازاقستان • 01 اقپان، 2019

مەملەكەت قارجىسىنا مۇقيات قارايتىن ورگان 25 جىلدىعىن اتاپ ءوتتى

437 رەت كورسەتىلدى

قارجى مينيسترلىگىندە قازاقستان قازىناشىلىعىنىڭ 25 جىلدىق مەرەيتويى تويلاندى. شاراعا قارجى ۆيتسە-ءمينيسترى بەرىك شولپانقۇلوۆ، پارلامەنت سەناتىنىڭ دەپۋتاتى ولگا پەرەپەچينا، دۇنيەجۇزىلىك بانكتىڭ قازاقستانداعى تۇراقتى وكىلى انيمەش شريۆاستاۆا، قازىناشىلىق كوميتەتىنىڭ توراعاسى ەربول قاراشۋكەەۆ قاتىستى.

شيرەك عاسىر بويى قازاقستان قازىناشىلىعى ەلىمىزدىڭ بيۋدجەت جۇيەسىنىڭ ءبىر بولشەگى رەتىندە قۇرىلۋ مەن دامۋدىڭ ۇلكەن جولىن ارتقا تاستادى.

«1994 جىلدىڭ 27 قاڭتارىندا حالىقتىڭ ءال-اۋقاتىن كوتەرۋگە باعىتتالعان مەملەكەتتىك قىزمەتتەردى ساپالى اتقارۋدى قامتاماسىز ەتەتىن، تۇراقتى بيۋدجەتكە قول جەتكىزۋدە مەملەكەتتىك قارجىنى ءتيىمدى باسقارۋ قۇرالى رەتىندە قازاقستان پرەزيدەنتىنىڭ جارلىعىمەن ەلىمىزدىڭ قازىناشىلىق باس باسقارماسى قۇرىلدى. 25 جىل ىشىندە قازىناشىلىق ورگاندارى بيۋدجەتتىك ساياساتتى ىسكە اسىرىپ، مەملەكەت قاراجاتىن ءتيىمدى ءارى ماقساتتى باسقارۋعا زور ۇلەس قوسىپ كەلەدى» دەدى قارجى ۆيتسە-ءمينيسترى بەرىك شولپانقۇلوۆ.

ۆيتسە-ءمينيستردىڭ ايتۋىنشا، بۇگىندە قازىناشىلىقتىڭ قازاقستاندىق وزىندىك ۇلگىسى قالىپتاستى. قازىناشىلىقتىڭ اقپاراتتىق جۇيەسى حالىقارالىق ساراپشىلاردىڭ جوعارى باعاسىنا يە. ساراپشىلاردىڭ پىكىرىنشە، قازاقستاندا تمد بويىنشا ۇزدىك زاماناۋي ينتەگراتسيالانعان اقپاراتتىق جۇيە قالىپتاسقان. قازىناشىلىقتىڭ اقپاراتتىق جۇيەلەرى 13 مىڭ مەملەكەتتىك مەكەمەگە، 5 مىڭنان استام شوتقا، 3،5 مىڭداي پايدالانۋشىعا ونلاين رەجيمدە قىزمەت كورسەتۋگە مۇمكىندىك بەرەدى.

جيىن سوڭىندا بيۋدجەتتىك ساياساتتى ىسكە اسىرىپ، مەملەكەت قارجىسىن ماقساتتى باسقارۋعا ۇلەس قوسىپ جۇرگەن قىزمەتكەرلەر ماراپاتتالدى.

قازىناشىلىق ورگاندارىنىڭ جەدەل قىزمەت كورسەتۋىنە، مەملەكەتتىك باعدارلامالاردى ورىنداۋىنا سول ايماقتىڭ بۇكىل تىنىس-تىرشىلىگى بايلانىستى. قازىناشىلىق ورگاندارى 205 بولىمشەدەن تۇراتىن بارلىق باسقارمادا 3080 مەملەكەتتىك قىزمەتشى ەڭبەك ەتەدى. قازىناشىلىق ورگاندارى بۇرىن ءبىر قارجىلىق قۇجاتتى 2-3 كۇندە وڭدەيتىن بولسا، قازىر بارلىعى ديستانتسيالىق تۇردە 6 ساعاتتان اسپايتىن ۋاقىتتا وڭدەلەدى.2018 جىلدان باستاپ قازىناشىلىق جۇيەسى بيۋدجەتتىڭ ءتورتىنشى دەڭگەيىنە قىزمەت كورسەتە باستادى. بۇل تۇستا دا قازىناشىلار قارجى مينيسترلىگىنىڭ ستراتەگيالىق جوسپارىن تولىقتاي ورىنداپ، 1062 جەرگىلىكتى بيۋدجەتتى ەنگىزدى. 

ايتا كەتۋ كەرەك، قازىناشىلىق كوميتەتى حالىقارالىق ارەنادا دا تىعىز جۇمىس جاسايدى: حالىقارالىق قازىناشىلىقتار قاۋىمداستىعى – Pempal اياسىندا وسى قاۋىمداستىققا مۇشە 23 ەلمەن قازىناشىلىق سالاسىن جەتىلدىرۋ، دامىتۋ ماسەلەلەرى بويىنشا قارىم-قاتىناس ورناتقان.

اقمارال اعزامقىزى،

«Egemen Qazaqstan»

سوڭعى جاڭالىقتار

پەتر يان ۇزدىكتەر قاتارىنا ەندى

جەكپە-جەك • بۇگىن، 16:05

ۇقساس جاڭالىقتار