ەلباسى تاپسىرماسىنا سايكەس, جۋىردا قاراعاندى قالاسىنداعى ماڭىزدى ءبىلىم وشاقتارىنىڭ ءبىرى «بولاشاق» اكادەمياسى اتالعان زاڭ جوباسىن تالقىلاۋعا ارنالعان دوڭگەلەك ۇستەل وتكىزدى.
جيىندا ءبىلىم سالاسىنا بىرەگەي بەتبۇرىس اكەلەتىن زاڭ جوباسى جان-جاقتى سارالانىپ, قوردالانعان ماسەلەلەر قوعامنىڭ ءادىل تالقىسىنا ءتۇستى. باسقوسۋدا ايتىلعانداي, سوڭعى جىلدارى ءبىلىم بەرۋ سالاسىندا بىرقاتار رەفورما جاسالسا دا, ءبىلىم بەرۋ ۇدەرىسىن ۇيىمداستىرۋدا تەك قۇرىلىمدىق وزگەرىستەردىڭ عانا ەنگىزىلۋىنە بايلانىستى, ءبىلىم سالاسىنىڭ تىنىسى تولىق اشىلماي كەلەدى. وسى رەتتە جاڭا زاڭ جوباسى ءبىلىم بەرۋ تاجىريبەسىنە ەنگىزىلمەگەن ماسەلەلەردى تىزبەلەپ, جەتىلمەگەن تەتىكتەرگە جان ءبىتىرۋدى كوزدەيدى. ەلباسىنىڭ ارنايى تاپسىرماسىمەن مۇعالىم مارتەبەسى جەكە زاڭ رەتىندە ءوز الدىنا بولەك بوي كوتەرۋى ۋاقىت تالابىنان تۋىنداپ وتىر.
«قازاقستان رەسپۋبليكاسىنداعى پەداگوگ مارتەبەسىنىڭ ماسەلەلەرى مەن ونىڭ بولاشاقتاعى دامۋى» تاقىرىبىندا وتكىزىلگەن دوڭگەلەك ۇستەلدى اكادەميا رەكتورى قۇرالباي مەڭلىباەۆ جۇرگىزىپ وتىردى. جيىنعا سونىمەن قاتار «بولاشاق» اكادەمياسىنىڭ وقىتۋشى-پروفەسسورلىق قۇرامى, «قازاقستاندىق سالالىق ءبىلىم جانە عىلىم قىزمەتكەرلەرىنىڭ كاسىپتىك وداعىنىڭ وكىلدەرى قاتىستى.
– جوبانىڭ كوپتەگەن باپتارى بۇگىندە وي-تالقىعا ءتۇسىپ جاتىر. ءبىلىم سالاسىندا جىل سايىن جۇرگىزىلىپ جاتقان رەفورمالارمەن قاتار بىلىكتى مامانداردى دايارلاۋداعى پەداگوگتاردىڭ جاعدايىن تۇپكىلىكتى جاقسارتۋدى ماقسات تۇتاتىن پەداگوگ مارتەبەسىنىڭ قاجەتتىلىگى شىنىمەن ارتىپ وتىر. اتالعان زاڭ تۇجىرىمداماسى وسى تۇرعىدان وتە ۇلكەن ماڭىزعا يە, – دەدى رەكتور ق.مەڭلىباەۆ. دوڭگەلەك ۇستەلگە كوتەرىلگەن ەڭ وزەكتى ماسەلە – وبلىس كولەمىندە بارلىق مەكتەپتى, ءبىلىم بەرۋ وشاقتارىن بىلىكتى مۇعالىم ماماندارمەن قامتاماسىز ەتەتىن ءوز الدىنا جەكە-دارا پەداگوگيكالىق جوعارى وقۋ ورنى اشىلۋ كەرەك دەگەن ورىندى وي بولدى. شىنىمەن دە وبلىس ورتالىعىنىڭ جوعارى وقۋ ورىندارىندا دايارلاپ جاتقان زاڭگەرلەر, حيميكتەر مەن بيولوگتەر, فيزيكتەر مەن ماتەماتيكتەر استە پەداگوگ ماماندار ەمەس, ءوز سالاسىنىڭ عانا ماماندارى بولىپ تابىلادى. قاتىسۋشىلار اتاپ وتكەندەي, بۇل ماسەلە الماتى, شىمكەنت, پاۆلودار قالالارىندا باياعىدا شەشىمىن تاپقان.
جيىننىڭ باسقا باسقوسۋلاردان تاعى ءبىر ەرەكشەلىگى – ماڭىزدى ءماسليحاتتا ايتىلعان سالماقتى ويلار مەن ۇتىمدى ۇسىنىستار تولىمدى جيناق بولىپ جۇرتقا تاراتىلۋىندا. اتالعان وقۋ ورداسىنىڭ باسپاسىندا قاتتالعان جۇيەلى جيناققا 40 شاقتى عالىمنىڭ ەكى تىلدە ەڭبەكتەرى ەنگەن. كەيدە وسىنداي قۇرىلتايلاردىڭ قۇرعاق اڭگىمەمەن اياقتالماي, ءىس-شارا سوڭىندا يگىلىكتى ءىز قالعانى دۇرىس.
ايتا كەتۋىمىز كەرەك, ءىس-شارانىڭ ۇيىمداستىرىلىپ وتىلۋىنە پارلامەنت ءماجىلىسىنىڭ دەپۋتاتى, قازاقستان رەسپۋبليكاسىنىڭ ۇلتتىق عىلىم اكادەمياسىنىڭ كوررەسپوندەنت-مۇشەسى, زاڭ عىلىمدارىنىڭ دوكتورى, پروفەسسور نۇرلان دۋلاتبەكوۆ باستاماشى بولعان.
ميراس اسان,
«Egemen Qazaqstan»
