بىرلىك – باستى قۇندىلىق
جۇما, 7 جەلتوقسان 2012 7:03
بۇل – اتىراۋداعى ەتنوس وكىلدەرى ۇستاناتىن باستى قاعيدا
اتىراۋدا دا وزگە ۇلتتىڭ وكىلدەرى بار. ارينە, وبلىس حالقىنىڭ پايىزدىق ۇلەسىنە شاققاندا از بولعانىمەن, جەرگىلىكتى تۇرعىندارمەن توننىڭ ىشكى باۋىنداي ارالاسىپ جۇرەدى. ءتىپتى, قازاقتارمەن قۇداندالى بولىپ وتىرعاندارى دا جەتەدى. قازاق ءتىلىن جەتىك مەڭگەرىپ, حالقىمىزدىڭ تاريحىنا تەرەڭ ۇڭىلگەن, ۇلتتىق ونەرىمىزدىڭ قاينارىنان سۋسىنداپ جۇرگەن وزگە ۇلتتىڭ وكىلدەرى دە جوق ەمەس.
جۇما, 7 جەلتوقسان 2012 7:03
بۇل – اتىراۋداعى ەتنوس وكىلدەرى ۇستاناتىن باستى قاعيدا
اتىراۋدا دا وزگە ۇلتتىڭ وكىلدەرى بار. ارينە, وبلىس حالقىنىڭ پايىزدىق ۇلەسىنە شاققاندا از بولعانىمەن, جەرگىلىكتى تۇرعىندارمەن توننىڭ ىشكى باۋىنداي ارالاسىپ جۇرەدى. ءتىپتى, قازاقتارمەن قۇداندالى بولىپ وتىرعاندارى دا جەتەدى. قازاق ءتىلىن جەتىك مەڭگەرىپ, حالقىمىزدىڭ تاريحىنا تەرەڭ ۇڭىلگەن, ۇلتتىق ونەرىمىزدىڭ قاينارىنان سۋسىنداپ جۇرگەن وزگە ۇلتتىڭ وكىلدەرى دە جوق ەمەس.
اتىراۋداعى سان الۋان ەتنوس وكىلدەرى وبلىس اكىمى باقتىقوجا ىزمۇحامبەتوۆتىڭ توراعالىعىمەن وتكەن وبلىستىق قازاقستان حالقى اسسامبلەياسىنىڭ XVI سەسسياسىندا «تۇڭعىش پرەزيدەنت كۇنى. تاۋەلسىزدىك. ەلباسى. بىرلىك» تاقىرىبىندا ءوز ويلارىن ورتاعا سالدى.
– قازاقستاننىڭ جەتكەن جەتىستىگى دە, تاۋەلسىز مەملەكەت ىرگەسىنىڭ نىعايۋى دا – ەلباسىنىڭ جەڭىسى. كوپ ۇلتتى قازاقستان حالقىن تاتۋلىققا ۇندەپ, ساياسي تۇراقتىلىقتىڭ ساقتالۋىنا ىقپال ەتكەن نۇرسۇلتان نازارباەۆتىڭ مەملەكەت قالىپتاستىرۋداعى ءتاجىريبەسى وزگە ەلدەرگە دە ونەگە بولادى, – دەدى اتىراۋ وبلىسىنداعى وزگە ۇلت وكىلدەرىنىڭ كەزەكتى باسقوسۋىنا ارنايى قاتىسقان قازاقستان حالقى اسسامبلەياسى ءتوراعاسىنىڭ ورىنباسارى-حاتشىلىق مەڭگەرۋشىسى ەرالى توعجانوۆ.
بۇدان كەيىن ءسوز العان جىلىوي اۋدانىنىڭ اكىمى ماكسيم ءىزباسوۆ «تاۋەلسىز ەلدەگى بىرلىك پەن تاتۋلىق – ەرەن ىستەرگە باستار العىشارت. بۇل ورايدا تۇڭعىش پرەزيدەنتىمىز نۇرسۇلتان نازارباەۆ تاۋەلسىزدىگىمىزدى باياندى ەتتى. مەملەكەتتىلىكتىڭ ىرگەسىن نىعايتتى. حالقىمىزدا «ىرىس ىنتىماققا جولىعادى, داۋلەت بىرلىكپەن تولىعادى» دەيتىن دانالىق ناقىل بار. ەلدىڭ بىرلىگى مەن تاتۋلىعى ارتقان سايىن جەمىستى جەڭىستەرىمىز مولايا تۇسۋدە. سونىڭ مىسالىن جىلىوي اۋدانىنىڭ تىنىس-تىرشىلىگىنەن بايقاۋعا بولادى. ءبىزدىڭ اۋدانىمىزدا دا بۇرىننان وزگە ەتنوس وكىلدەرى مەكەندەسە, ەندى «تەڭىزشەۆرويلداي» بىرلەسكەن كاسىپورىندا الىس شەتەلدەردەن كەلگەن سان ۇلتتىڭ وكىلدەرى ەڭبەك ەتەدى. ولاردىڭ اراسىندا اعىلشىن مەن تۇرىك, ءۇندىس پەن فيليپپين سەكىلدى بۇرىن ءبىزدىڭ جەرىمىزگە تابانى تيمەگەن بىرنەشە حالىقتىڭ وكىلدەرى بار. تىلدەرى بولەك بولعانمەن, ءجۇرەكپەن ۇعىنىسقان ءبارىنىڭ كوزدەگەنى – تاتۋلىق پەن بىرلىك», دەدى.
تاتۋلىق پەن بىرلىكتىڭ قادىرىن باسقا ۇلتتىڭ وكىلدەرى دە بىلەدى. سونىڭ ىشىندە قازاق حالقىنىڭ كەڭپەيىلدىگى مەن قوناقجايلىعى ارقاسىندا تالاي قيىندىقتى ەڭسەرگەن كورەي ۇلتىنىڭ وكىلدەرى وزگەلەرىنەن بولەكشە سەزىنەدى. «تحونيل» كورەي ەتنومادەني بىرلەستىگى توراعاسىنىڭ ورىنباسارى اركادي كيمنىڭ ايتۋىنشا, قازاق حالقىنىڭ مەيىرباندىعىنىڭ ارقاسىندا كورەيلەر وزدەرىن ۇلت رەتىندە ساقتاپ قالدى. ەندى, مىنە, ەلباسى ساياساتىنىڭ ارقاسىندا ءار ۇلت ءوزىنىڭ ۇلتتىق تاريحى مەن ادەبيەتىن تەرەڭىرەك تانۋىنا, ءتىلى مەن ونەرىن كەڭىرەك دامىتۋىنا قولداۋ جاسالىپ وتىر.
ورىس, سلاۆيان جانە كازاكتار قاۋىمداستىعى وبلىستىق فيليالىنىڭ توراعاسى ۆلاديمير زاۆەرتكين مەن «كاسپيان ديۆەلوپمەنت كومپاني» جشس باسشىسى ارون ءميتيۋدىڭ دە پىكىرى «تاتۋلىق بار يگىلىكتىڭ باستاۋى بولا الادى. بىرلىگى جاراسقان ەلدە عانا تۇراقتىلىق ورنايدى» دەگەنگە توعىستى.
اسسامبلەيا سەسسياسىنىڭ قورىتىندىسىندا وبلىس حالقىنا ارنالعان ۇندەۋ قابىلداندى. «تۇڭعىش پرەزيدەنت – ۇلت كوشباسشىسى نۇرسۇلتان نازارباەۆتىڭ بىرىكتىرۋ يدەياسىنىڭ ارقاسىندا ۇلتتىق, تىلدىك, ءدىني, ءمادەني ورتانىڭ ءار الۋاندىعىن قۇرايتىن قازاقستان حالقى بىرلىك اتتى قۇندىلىق توڭىرەگىنە توپتاستى. سوندىقتان ەڭ قاستەرلى قازىنامىز – تاۋەلسىزدىگىمىزدى كوزدىڭ قاراشىعىنداي ساقتاپ, مەملەكەتتىلىگىمىزدى نىعايتا بەرۋ ءۇشىن ەڭ اۋەلى بىرلىك قاجەت!» دەلىنگەن ۇندەۋ ماتىنىندە.
جولداسبەك شوپەعۇل,
«ەگەمەن قازاقستان».
اتىراۋ وبلىسى.
