ەلىمىزدىڭ بىرقاتار سپورت فەدەراتسياسى 2020 جىلعى وليمپيا ويىندارىنا دايىندىقتارىن وتكەن جىلى-اق باستاپ كەتتى. ماسەلەن, بوكس فەدەراتسياسى 9 جىل بويى ەرلەر اراسىنداعى ۇلتتىق قۇرامانى باپتاعان مىرزاعالي ايتجانوۆتىڭ ورنىنا جاستار قۇراماسىنىڭ باپكەرى عالىمبەك كەنجەباەۆتى ۇلتتىق قۇرامانىڭ جاڭا باس جاتتىقتىرۋشىسى رەتىندە تانىستىردى. كەنجەباەۆ 8 قاڭتاردان باستاپ ءوز جۇمىسىنا كىرىستى. بيىل بوكسشىلارىمىزدى ەكى بىردەي ءىرى دودا كۇتىپ تۇر. ەڭ العاشقىسى ازيا چەمپيوناتى بولسا, ەكىنشى وليمپياداعا جولداما بەرەتىن الەم چەمپيوناتى بولماق. قازىرشە ازيا چەمپيوناتى قاي ەلدە وتەتىنى بەلگىسىز, ال الەم چەمپيوناتى رەسەيدىڭ سوچي قالاسىندا 7-15 قىركۇيەك كۇندەرى وتەدى.
وزدەرىڭىز بىلەتىندەي, بىلتىر قاراشا ايىندا وتكەن AIBA كونفەرەنتسياسىندا قابىلدانعان ەڭ ماڭىزدى شەشىمدەردىڭ ءبىرى دەپ, بوكستىڭ سالماق دارەجەلەرىندەگى وزگەرىستەردى ايتۋعا بولادى. توكيو وليمپياداسىندا بوكستان ەرلەر اراسىندا 8 سالماق بويىنشا مەدال جيىنتىعى ساراپقا سالىنادى. ەندى توكيودا ەرلەر 52, 57, 63, 69, 75, 81, 91 جانە +91 كيلو سالماقتاردا باق سىنايدى. وسىلايشا وليمپيا ويىندارىنا 214 بوكسشى قاتىسادى. ەسەسىنە, ايەلدەر اراسىنداعى سالماق دارەجەلەرى بەسەۋگە دەيىن كوبەيدى: 51 كگ, 57 كگ, 60 كگ, 69 كگ, 75 كگ. جاپونيادا 72 بۇرىمدى بوكسشى ونەر كورسەتەدى. دەگەنمەن سوچيدەگى الەم چەمپيونى ادەتتەگىدەي 10 سالماقتا وتەدى. ال جولداماعا جوعارىدا ايتىپ وتكەن 8 سالماقتاعى بوكسشىلار تالاساتىن بولادى.
2019 جىلى جەرلەستەرىمىز كۇرەس تۇرلەرىنەن الەم چەمپيوناتىنىڭ كۋاسى بولادى. ويتكەنى دۇنيەجۇزىنىڭ ەڭ مىقتى بالۋاندارى الەم چەمپيونى اتانۋ ءۇشىن ەلوردامىز استاناعا جينالادى. قىركۇيەك ايىندا جالاۋى جەلبىرەيتىن بايراقتى دودا «داۋلەت» سپورت كەشەنىندە وتەدى دەپ جوسپارلانعان. گرەك-ريم كۇرەسىنەن قازاقستان ۇلتتىق قۇراماسىنىڭ باس باپكەرى نۇرىم دۇيسەنوۆتىڭ ايتۋىنشا, قۇراما ءتىزىمى 95 پايىزعا جاڭارعان. «مەن قۇراما ءتىزىمىن قولعا العان كەزدەن باستاپ كوماندانى جاسارتۋ ماسەلەسىن كوتەردىم. سپورتشىلارىمىز قانشا جەردەن تاجىريبەلى بولسا دا, قۇراماعا جاڭا لەپ, جاس بۋىن كەرەك. قىزمەتىمە كىرىسكەن بويدا قولعا العان ءىسىم كومانداعا جاستاردى تارتۋ بولاتىن. بۇگىندە سول مىندەتتى ورىندادىق دەپ ايتا الامىن. ويتكەنى قۇرامانىڭ 95 پايىزى جاڭاردى», دەيدى ول.
قىركۇيەك ايىندا بالۋاندارىمىز استانادا باق سىناسا, اۋىر اتلەتتەرىمىز تايلاندتا وليمپيا ويىندارىنا جولداما الۋ ءۇشىن جارىس جولىنا شىعادى. بىلتىر اشعابادتا وتكەن بىرىنشىلىكتە زىلتەمىر كوتەرگەن تولاعايلارىمىزدىڭ ونەرى جانكۇيەرلەر كوڭىلىنەن شىقپادى. ويتكەنى اتلەتتەرىمىز ەلىمىزگە نەبارى ەكى جۇلدەمەن ورالادى. بيىلعى چەمپيوناتتا وليمپيادا جولداماسى ساراپقا سالىنىپ جاتقاندىقتان سپورتشىلارىمىز ايانىپ قالماس دەپ سەنەمىز. ايتپاقشى, الەم چەمپيوناتىنىڭ الدىندا ءساۋىر ايىندا قىتايدا ازيا بىرىنشىلىگى وتەدى. ازيا چەمپيوناتى دا وليمپياداعا جولداما بەرۋشى ماڭىزدى تۋرنير سانالادى.
سونداي-اق بيىلعى جىلدىڭ باستى جارىسى قىسقى جانە جازعى ۋنيۆەرسيادا ويىندارى دەپ ايتا الامىز. ويتكەنى ستۋدەنت سپورتشىلاردىڭ ءىرى جارىسى ءار ەكى جىل سايىن ۇيىمداستىرىلىپ, ءوزارا مىقتىلاردى انىقتايدى. بىلايشا ايتقاندا, ستۋدەنت سپورتشىلار اراسىنداعى وليمپيادا دەۋگە بولادى. قىسقى ۋنيۆەرسيادا 2-12 ناۋرىز ارالىعىندا رەسەيدىڭ كراسنويارسك قالاسىندا وتەدى. الەمنىڭ 50 ەلىنەن كەلەتىن 3000-نان اسا سپورتشىلار سپورتتىڭ 11 ءتۇرى بويىنشا باق سىنايدى. وسىدان ەكى جىل بۇرىن الماتىدا وتكەن XXVIII قىسقى ۋنيۆەرسياداعا الەمنىڭ 56 ەلىنەن كەلگەن 1600-دەن اساتىن سپورتشى 12 سپورت ءتۇرى بويىنشا جۇلدە ءۇشىن تالاسقان بولاتىن. ءوز ەلىمىزدە وتكەن سپورت دوداسىندا جەرلەستەرىمىز جالپى سانى 36 مەدال يەلەنىپ, جالپىكوماندالىق ەسەپتە رەسەي قۇراماسىنان (71 مەدال) كەيىن ەكىنشى ورىن يەلەنگەن ەدى.
ال جازعى ۋنيۆەرسيادا ويىندارىنىڭ جالاۋى 3-14 شىلدە ارالىعىندا يتاليانىڭ نەاپول قالاسىندا جەلبىرەيدى. XXX جازعى ۋنيۆەرسياداعا الەمنىڭ 170 ەلىنەن 12 000-نان اسا سپورتشى قاتىسادى دەپ كۇتىلۋدە. سپورتشىلار سپورتتىڭ 12 ءتۇرى بويىنشا باق سىناپ, 250 مەدال جيىنتىعىن ساراپقا سالادى. 2017 جىلى تايپەيدە وتكەن بايراقتى دودادا قازاقستان قۇراماسى ساپىندا 120-عا جۋىق اتلەت سپورتتىڭ 14 تۇرىنەن ەل نامىسىن قورعاپ, 3 التىن, 6 كۇمىس, 7 قولا مەدال جەڭىپ العان-دى. جالپىكوماندالىق ەسەپتە 21-ورىننان كورىندى.
مۇنان بولەك, 2019 جىلدىڭ اقپان ايىندا تەننيستەن قازاقستان قۇراماسى دەۆيس كۋبوگىنىڭ 1/8 كەزەڭىندە پورتۋگاليا قۇراماسىمەن كەزدەسەدى. ويىندار 1-2 اقپان كۇندەرى استاناداعى «داۋلەت» سپورت كەشەنىندە وتپەك. ال 5-10 اقپان ارالىعىندا اقش-تىڭ اناحايم قالاسىندا مانەرلەپ سىرعاناۋدا ءتورت قۇرلىقتىڭ چەمپيوناتى وتەدى. سونداي-اق وسى ايدا قىسقى سپورت تۇرلەرىنەن (تاۋ شاڭعىسى, شاڭعى سپورتى جانە كونكيمەن جۇگىرۋ) الەم چەمپيوناتىنىڭ جالاۋى جەلبىرەيدى. ناۋرىزدا بياتلوننان (ەستەرسۋند, شۆەتسيا) جانە مانەرلەپ سىرعاناۋدان (سايتاما, جاپونيا) الەم بىرىنشىلىگى, مامىردا شايبالى حوككەيدەن الەم چەمپيوناتى وتەدى. ناۋرىز ايىندا فۋتبولدان 2020 جىلعى ەۋروپا چەمپيوناتىنا ىرىكتەۋ كەزەڭى مەن قازاقستان پرەمەر-ليگا ويىندارى باستالسا, شىلدەدە قازاقستاندىق فۋتبول كلۋبتارى ەۋروپا ليگاسىنداعى ىرىكتەۋ ماتچتارىن باستايدى. «قايرات», «توبىل», «ورداباسى» كوماندالارى كارى قۇرلىقتاعى جورىقتارىن العاشقى اينالىمداردان باستاسا, ءىزىن الا «استانا» كومانداسى چەمپيوندار ليگاسىنداعى ويىندارىن وتكىزەدى.
حالىقارالىق جارىستاردان ماۋسىم ايىندا ەكىنشى ەۋروپا ويىندارى, شىلدە ايىندا ۆەلوسپورتتان كلۋبتار اراسىنداعى بەيرەسمي الەم چەمپيوناتى سانالاتىن «تۋر دە فرانس» ۆەلوكوپكۇندىگى جانە وڭتۇستىك كورەيادا سۋ سپورت تۇرلەرىنەن الەم چەمپيوناتى وتەدى. سونىمەن قاتار 2019 جىلى بىرنەشە ەلىشىلىك جارىستار, تۋرنيرلەر وتەدى دەپ جوسپارلانۋدا.
قورىتا ايتقاندا, 2019 جىلى سپورتشىلار ءۇشىن سايىسقا تولى جىل بولماق. سوندىقتان بيىل جارىس جولىنا شىعاتىن ساڭلاقتارىمىز جانكۇيەرلەردى جىگەرلى جەڭىستەرىمەن قۋانتادى دەپ سەنەمىز.
ءالي بيتورە,
«ەگەمەن قازاقستان»
