2010 جىلى باستالعان «مەديتسينالىق پويىزدار» جوباسى شالعاي ەلدى-مەكەن تۇرعىندارىنا جوعارى ساپالى مەديتسينالىق كومەك كورسەتۋدى كوزدەيدى. «Samruk-Kazyna Trust» الەۋمەتتىك جوبالاردى دامىتۋ قورىنىڭ باس ديرەكتورى دياس ازبەرگەنوۆ جىل سايىن جەمىستى جۇمىس اتقارىپ كەلە جاتقان يگىلىكتى جوبا بيىل دا ءساتتى اياقتالعانىن ايتتى.
«بيىلعى جىلى پرەزيدەنت ءوز جولداۋىندا العاشقى مەديتسينالىق-سانيتارلىق كومەكتىڭ ساپاسىن, اسىرەسە اۋىلدىق جەرلەردە ارتتىرۋدى تاپسىردى. 3 قىركۇيەكتە جولعا شىققان «دەنساۋلىق» جانە «سالاماتتى قازاقستان» مەديتسينالىق پويىزدارى الماتى, تۇركىستان, قاراعاندى, پاۆلودار, اتىراۋ, ماڭعىستاۋ, قوستاناي, قىزىلوردا جانە شىعىس قازاقستان وبلىستارىنداعى 127 ستانسادا توقتاپ, 41 360 ادامعا مەديتسينالىق كومەك كورسەتتى. مۇنىڭ ىشىندە 6 مىڭنان استام تەكسەرۋ بالالارعا جاسالدى. تەراپەۆت, ءتىس دارىگەرى, وفتالمولوگ, ماممولوگ جانە باسقا دا مامانداردى قامتىعان 10 مەديتسينالىق توپ 192 195 دارىگەرلىك قابىلداۋ وتكىزدى. سونداي-اق ماماندار 67 مىڭنان استام دياگنوستيكالىق ەمشارا جانە 3 مىڭ شاعىن حيرۋرگيالىق وپەراتسيا جاسالدى», دەدى د.ازبەرگەنوۆ.
اتالعان پويىزدار مرت, رەنتگەن, فگدس, ۋدز سياقتى زاماناۋي دياگنوستيكالىق قۇرالدارمەن جابدىقتالعان, سونداي-اق, ستوماتولوگيالىق, لور جانە وفتالمولوگيالىق اپپاراتتاردىڭ سوڭعى ۇلگىلەرىمەن قامتاماسىز ەتىلگەن.
ءباسپاسوز ءماسليحاتىنا ءسوز العان «دەنساۋلىق» پويىزى مەديتسينالىق بريگاداسىنىڭ باس دارىگەرى ارزىقۇل كەنجەەۆ جوبا ارقىلى تۋبەركۋلەز, قاتەرلى ىسىك جانە جۇرەك-قان تامىرلارى اۋرۋلارىن اسقىندىرماي, ەرتە انىقتاۋعا مۇمكىندىك تۋعانىن ايتادى. سونداي-اق ول بيىلعى جىلى كوپ بايقالعان بەس ءتۇرلى اۋرۋدى اتادى. اتاپ ايتقاندا دارىگەرلەر وڭىرلەردە ارتەريالىق گيپەرتونيا, يشەميالىق اۋرۋ, قانت ديابەتى, سوزىلمالى برونحيت جانە ەندەميالىق جەمساۋ سياقتى دەرتتىڭ دەندەپ تۇرعانىن انىقتاعان.
جوبا «سامۇرىق-قازىنا» اق كومپانيالار توبىنىڭ «Samruk-Kazyna Trust» الەۋمەتتىك جوبالاردى دامىتۋ قورى جانە دەنساۋلىق ساقتاۋ مينيسترلىگى, سونىمەن قاتار «قازاقستان تەمىر جولى» ۇك» اق-تىڭ «الەۋمەتتىك جوبالار» كورپوراتيۆتىك قورىنىڭ قولداۋىمەن جۇزەگە اسىپ كەلەدى.
مايگۇل سۇلتان,
«ەگەمەن قازاقستان»
