30 جاستاعى گوللانديانىڭ سپورتشىسى ەرەجەسىز جەكپە-جەك الەمىندەگى ەڭ بويشاڭداردىڭ ءبىرى. ونىڭ بويى – 212 سانتيمەتر, سالماعى – 120 كيلو. سپورتتىڭ بۇل تۇرىمەن ستەفان سترۋۆە 14 جاسىنان بەرى اينالىسۋدا. تورتكۇل دۇنيەنىڭ ءار قيىرىندا وتكەن جارىستاردا ءوزىن جاقسى قىرىنان كورسەتكەن كەيىپكەرىمىز 2009 جىلدىڭ اقپان ايىندا UFC-دە كۇش سىناسۋ قۇرمەتىنە يە بولدى. وعان دەيىن ول 16 رەت جەڭىسكە جەتىپ, تەك ەۋى كەزدەسۋدە عانا جەڭىلىستىڭ كەرمەك ءدامىن تاتقان بولاتىن.
UFC-دە كىلەڭ «سەن تۇر, مەن اتايىندار» جينالعانى بارشاعا ءمالىم. سول سەبەپتى دە ايتۋلى ۇيىمدا ءوزىن مويىنداتۋ وعان وڭايعا سوققان جوق. ول بىردە ۇتسا, ەندى بىردە ۇتىلىپ ءجۇردى. دەسەك تە ءوزىنىڭ ەڭبەكقورلىعى مەن تاباندىلىعى, باتىلدىعى مەن جانكەشتىلىگىنىڭ ارقاسىندا قىسقا عانا ۋاقىت ارالىعىندا سان ميلليون جانكۇيەردىڭ ىستىق ىقىلاسىنا بولەندى.
2012 جىلدىڭ 29 قىركۇيەگىندە انگليانىڭ نوتتينگەم قالاسىندا وتكەن جارىستا UFC-ءدىڭ جارقىن جۇلدىزى, كەيىننەن وسى ۇيىمنىڭ تەڭدەسسىزى اتانعان ستيۆ ءميوچيچتى ەكىنشى راۋندتا ۇرىپ جىققانى كوپشىلىكتىڭ ەسىندە قالدى. ودان بولەك, ستەفان سترۋۆە ءار جىلدارى چەيز گورملي, پول بەنتەللو, پاتريك بەرري, انتونيۋ رودريگۋ نوگەيرا, انتونيۋ سيلۆا سىندى جۇلدىزداردى جەڭدى. روي نەلسون, اليستار وۆەريم, اندرەي ورلوۆسكي, مارك حانت, الەكساندر ۆولكوۆ سەكىلدى ساڭلاقتارعا ەسە جىبەردى.
بۇل قازاقستانعا مەنىڭ العاشقى رەت كەلۋىم. العان اسەرىم وتە جاقسى. حالقى دا قوناقجاي ەكەن. ال, شىندىعىن ايتسام, الماتىعا تابان تىرەگەنىمىزگە بىرنەشە كۇن بولعانىمەن, قالانى ءالى دۇرىس ارالاي العان جوقپىن. ويتكەنى, ەرتەڭ وتەتىن جارىستا مەنىڭ دوسىم نيل ۆان نوورد ونەر كورسەتەدى. ول گەرمانيالىق الەكساندر پوپپەكپەن ايقاسادى. سول كەزدەسۋدەن كەيىن جاقسى كوڭىل-كۇيمەن شىقساق, الماتىنى ارالىپ ۇلگەرەمىز. سونداي-اق, بەيبىت نازاروۆ پەن مارتين براۋن اراسىندا وتەتىن وسى كەشتىڭ باستى جەكپە-جەگى دە قىزىقتى بولادى دەگەن ويدامىن, – دەيدى ستەفان سترۋۆە.
ەستەرىڭىزگە سالا كەتەيىك, گوللانديا سپورتشىسى ەرەجەسىز جەكپە-جەكتەن وتكەن سايىستاردا بارلىعى 39 كەزدەسۋ وتكىزىپ, 28 مارتە جەڭىسكە جەتتى. 25 باسەكەنى ول مەرزىمىنەن بۇرىن اياقتادى.
عالىم سۇلەيمەن,
«ەگەمەن قازاقستان»
الماتى
