جوبانى جۇزەگە اسىرۋشىلاردىڭ ءبىرى, اەروعارىش كوميتەتىنە قاراستى «عالام» جشس-ءنىڭ جەتەكشى ينجەنەر-كونسترۋكتورى بەرىك جۇماجانوۆتىڭ ايتۋىنشا, جاقىن ارادا مۇنداي سۋرەتتەردىڭ ەل ەكونوميكاسىنىڭ بارلىق سالاسىندا ماڭىزى جوعارى بولماق.
– مۇنداي سپۋتنيكتەن تۇسىرىلگەن سۋرەتتەر دامىعان ەلدەردە جوعارى سۇرانىسقا يە. ءبىزدىڭ ەلىمىزدە دە قازىر كەڭ قولدانىستا. ماسەلەن, اۋىل شارۋاشىلىعىنا قاتىستى ايتار بولساق, كەڭ القاپتاردى 10 تاۋلىك نەمەسە ەكى اپتا سايىن مونيتورينگ جاساپ, ەگىننىڭ شىعىمىن, قۋراعان اۋماقتارىن, زيانكەستەردىڭ قوزعالىسىن عارىشتان بايقايتىن بولامىز. مۇنىڭ ناتيجەسى بولجام جاساۋعا جانە جەدەل ارەكەت ەتۋگە مۇمكىندىك بەرمەك, – دەيدى ب.جۇماجانوۆ.
«KazSTSat» ميكروسپۋتنيگى – كاليفورنياداعى ۆاندەنبەرگ ىسكە قوسۋ بازاسىنان 4 جەلتوقسان كۇنى استانا ۋاقىتى بويىنشا ساعات 00.32-دە ۇشىرىلعان عىلىمي-تەحنولوگيالىق ماقساتتاعى ەكى عارىش جۇيەسى اپپاراتىنىڭ ءبىرى. امەريكالىق «SpaceX» كومپانياسىنىڭ ورتا كلاستى «Falcon» سەريالى زىمىران-تاسىعىشى «KazSTSat» ميكروسپۋتنيگى مەن «KazSciSat-1» نانوسپۋتنيگىن وربيتاعا ءساتتى شىعارعان بولاتىن.
بۇل جەرسەرىكتەردى قازاقستان مەن ۇلىبريتانيا ينجەنەرلەر كومانداسى بىرلەسە جاساپ شىققان.
– ەلىمىز العاشقى سپۋتنيكتەردى تاپسىرىسپەن جاساتتى. ال سوڭعى ەكەۋىنىڭ قۇرىلىسىنا ءبىز بەلسەندى ارالاستىق. ءتىپتى عىلىمي-تەحنولوگيالىق سپۋتنيكتىڭ ءون بويىندا قازاقستاندا جاسالىپ, عارىشتا سىناپ كورۋگە ارنالعان تەحنولوگيالار بار. ولار – وپتيكالىق جۇيە, بورتتاعى كومپيۋتەر, جەراستى ستانساسى, كۇن داتچيگى. وعان قوسا, باعدارلامالىق قامتاماسىز ەتۋ جۇيەسى جانە باسقا دا باعدارلامالار – قازاقستان ينجەنەرلەرىنىڭ ەڭبەگى, سونداي-اق ولاردىڭ قولدارىنان جوعارى تەحنولوگيالى ءىس كەلەتىندىگىنىڭ دالەلى, – دەيدى ب.جۇماجانوۆ.
وسى جاڭاشىلدىقتاردان جانە جوبالاردان-اق ەلىمىزدىڭ عارىش سالاسىنداعى ىلگەرىلەۋشىلىكتى اڭعارۋعا بولادى. ماسەلەن, عىلىمي-تەحنولوگيالىق ماقساتتاعى عارىش جۇيەسىن قۇرۋ تومەنگى وربيتالى عارىش اپپاراتتارىن جوبالاۋعا, قۇراستىرۋ جانە سىناۋ تەحنولوگيالارىن پىسىقتاۋعا, جەر يونوسفەراسىنا عىلىمي-زەرتتەۋلەر جۇرگىزۋگە, تەحنولوگيالىق جۇكتەمە ءۇشىن ۇشۋ تاريحىن الۋعا مۇمكىندىك بەرمەك. ونىڭ ۇستىنە, جوبا شەڭبەرىندەگى جۇمىستار ەلىمىزدىڭ بولاشاقتا جاسالاتىن سپۋتنيكتەرىنىڭ قۇنىن تومەندەتۋگە جانە شەتەلدىك تاپسىرىس بەرۋشىلەر ءۇشىن عارىشتىق جۇيەلەر ءوندىرۋ كەزىندە قازاقستاندىق ۇلەستى ارتتىرۋعا جول اشادى.
ەڭ باستىسى, جوبانى جۇزەگە اسىرۋ اياسىندا كوپتەگەن جەرگىلىكتى ماماندار الىس-جاقىن شەتەلدەردە وقىتىلدى, تاجىريبە جيناقتادى. قازىر ولار ەلىمىزدە جۇمىس ىستەپ جۇرگەندىكتەن ادامي بايلىق ۇلى مۇراتتاردىڭ سارقىلماس كوزى ەكەندىگىن اڭعارۋ قيىن ەمەس. بۇل ماماندار ەلىمىزدىڭ ءۇشىنشى عىلىمي-تەحنولوگيالىق ماڭىزى بار عارىشتىق جۇيەسىن جاساۋدىڭ باسىندا تۇردى.
ءسويتىپ قازىر عارىشتا ەلىمىزدىڭ التى سپۋتنيگى ءجۇر. ولاردىڭ ەكەۋى – جەردى قاشىقتان زوندتاۋعا, ەكەۋى – بايلانىستى قامتاماسىز ەتۋگە ارنالعان جانە سوڭعى ەكەۋىنىڭ ماقساتى تۋرالى وسى ماتەريالدا ايتىپ وتىرمىز.
سەرىك ابدىبەك,
«ەگەمەن قازاقستان»
