ەگەر كەز كەلگەن سالادا ءوز بيىگىنە كوتەرىلگەن عاجايىپ تالانتتار وپ-وڭاي ەستەن شىعىپ, ەرەن تابىستارى وسىلايشا ۋاقىتتىڭ ەنشىسىندە تارك ەتىلەتىن بولسا, ءومىرزايا دەگەن وسى بولار؟! ويتكەنى 1989 جىلى فرانتسيادا وتكەن الەم چەمپيوناتىندا كۇللى الەمدى مويىنداتقان مارات ساتىبالديەۆتىڭ جەڭىستەرىن قايتالاعان قازاق ۆەلوترەكشىسى بار ما؟ سوندىقتان دا بۇل سۋرەت بۇگىنگى ايدارىمىزعا سۇرانىپ-اق تۇر.
ەكىنشىدەن, سپورتشىنىڭ جەرلەسى, ءبىر بويىنا تالاي قابىلەت قوناقتاعان ايتىسكەر اقىن, كومپوزيتور, ەسترادا ءانشىسى ەلەنا ابدىقالىقوۆا بۇل تۋرالى: ء«بىر جىلدارى قىزىلوردا وبلىستىق اكىمدىگىنە «وسى مارات ساتىبالديەۆ دەگەن چەمپيون جەرلەسىمىز بار. نەگە ەلگە شاقىرىپ, جاستارعا كورسەتىپ, كەزدەسۋ وتكىزبەيسىڭدەر؟» دەگەنىمدە اكىمدىكتەگىلەر تانىمايمىز دەدى» دەپ تاۋسىلا جازدى...
ايتقانداي, سپورتشىنىڭ ايتۋىنشا, انىعىندا ول سولتۇستىك قازاقستان وبلىسى, پولۋدينسك اۋدانى, گاۆرينو اۋىلىندا دۇنيەگە كەلگەن. اكەسى قۋانباي اسكەري ادام ەكەن. اناسى زاعيپامەن بىرگە سول كەزدە پەتروپاۆلدا قىزمەت ىستەپ, ماراتتىڭ ءۇش جاسىندا ولار قىزىلورداعا قايتا كوشىپ كەلگەن.
قاي دوداعا سالساڭ توپ جاراتىن قارىمى جەتكىلىكتى قۋانباي مەن زاعيپانىڭ ەرەك تۋعان بالاسى كەڭەس وداعىنىڭ چەمپيوناتتارىندا دا الدىنا جۇيرىك سالماعان. ەگەر 1985-1990 جىلدارى الىپ دەرجاۆادا 286 ميلليون حالىق بار ەكەندىگىن, كسرو-دا سول كەزەڭدە 10 مىڭعا جۋىق ۆەلوسيپەدشى بولعانىن ايتساق, وندا تۇڭعىش الەم چەمپيونى اتانعان قازاقتىڭ بايراعى ودان ءارى بيىكتەي بەرمەك.
«...ونىڭ الەم چەمپيونى اتانعان كەزىندەگى كوڭىل كۇيىمىزدى تىلمەن جەتكىزۋ قيىن. 1989 جىلى تامىزدىڭ 20-سىنان 21-ىنە قاراعان ءتۇنى ۇيقىدا مازا بولعان جوق. تاڭ بوزىنان تەلەديدارعا تەلمىرىپ, راديوعا قۇلاق تۇرۋمەن بولدىم. ءالى ەسىمدە, تاڭعى ساعات 7-دەن 9 مينۋت وتە بەرە ماسكەۋدىڭ ورتالىق تەلەديدارىنان مارات باۋىردىڭ الەم چەمپيونى اتانعانىن ەستىدىم. كوز شاراسىنا ىستىق جاس ىركىلدى. تار عانا پاتەر بايتاق دالاداي كەڭىپ سالا بەردى. قويىن داپتەردەگى: «1989 جىلى تامىزدىڭ جيىرماسىنشى جۇلدىزىندا قۇرداسىم مارات ساتىبالديەۆ ۆەلوسيپەدتىڭ سوڭىنا تۇسكەن قازاق جاستارىنان ءبىرىنشى بولىپ الەم چەمپيونى اتاندى...» دەگەن جازۋ ءالى كۇنگە دەيىن ىستىق كورىنەدى», دەيتىن تانىمال سپورت ءجۋرناليسى قىدىربەك رىسبەكتىڭ ەستەلىگىنەن اتتاپ تا وتە المايسىڭ, ارتىق تا ايتا الماسسىڭ.
ارينە, مۇنشاما تابىستى مەملەكەت اتاۋسىز, قۇرمەتسىز قالدىرعان جوق. ون بەس جىل بويى جارىس جولدارىندا ءجۇردى. بىراق 1991 جىلى سپورتتى دوعارعان مارات قۋانباي ۇلى ءارى-ءسارى كۇي كەشە ءجۇرىپ, كۇنكورىستىڭ قامىمەن تاۋەكەلگە باستى, تاۋار تاسىدى. كەيىن بيزنەستىڭ بەل بالاسىنا اينالدى. قالاي بولعاندا دا بايىرعى سپورتشى ۇلتتىڭ ماقتانىشى بولىپ قالا بەرەدى.
ايناش ەسالي,
«ەگەمەن قازاقستان»
الماتى
