جاپونيانىڭ جوعارى مارتەبەلى يمپەراتورى 23 جەلتوقسان كۇنى 85 جاسقا تولادى. ايتا كەتۋ كەرەك, الداعى جىلى يمپەراتوردىڭ بيلىك باسىندا جۇرگەنىنە 30 جىل تولماق. سايكەسىنشە, كەلەسى جىلدىڭ ساۋىرىندە ءوز ورنىن بوساتىپ, مامىردا مۇراگەر حانزادا تاققا وتىرادى. بۇل وزگەرىستەر قازاقستان مەن جاپونيا مەملەكەتتەرى اراسىنداعى قارىم-قاتىناسقا كەرى اسەر ەتپەيدى. بيىلعى جىلدىڭ وزىندە ءارتۇرلى سالانى قامتىعان ەكى ەل اراسىنداعى بايلانىس نىعايا ءتۇستى. قازاق جەرىندە جاپونيا ەلشىلىگىنىڭ مۇرىندىق بولۋىمەن استانا قالاسىنىڭ 20 جىلدىعىنا ارنالعان حالىقارالىق كونفەرەنتسيالار مەن سيمپوزيۋمداردان بولەك بىرنەشە ءىس-شارا وتكىزىلگەن.
جالپى بايلانىس اياسىندا ەكونوميكا, ساۋدا جانە ينۆەستيتسيا ماسەلەلەرى تالقىلانىپ, ورتاق كەلىسىمدەر جاسالعان. بۇعان دەيىن الماتى مەن استانادا جاڭادان جاپون زاۋىتتارى اشىلىپ, بىرلەسكەن كاسىپورىندار قۇرىلدى.
– جاپونيا مەن قازاقستان بۇۇ مەن باسقا دا ساياسي الاڭ شەڭبەرىندە بەلسەندى تۇردە بىرلەسە قىزمەت اتقارىپ كەلەدى. سونىمەن قاتار حالىقارالىق ارەنادا سەرىكتەس ەلدەر. ءبىز قازاقستاننىڭ بۇۇ قاۋىپسىزدىك كەڭەسىنىڭ تۇراقتى ەمەس مۇشەسى رەتىندە قىزمەتىن جوعارى باعالايمىز, – دەدى جاپونيانىڭ قازاقستانداعى ەلشىسى يتيرو كاۆاباتا.
قازاقستان تاراپىنان ءسوز العان ەلىمىزدىڭ سىرتقى ىستەر ۆيتسە-ءمينيسترى ەرجان اشىقباەۆ قوس ەل گەوگرافيالىق جاعىنان الىس بولعانىمەن, ءوزارا ىنتىماقتاستىق پەن دامۋدىڭ قارقىن الىپ كەلە جاتقانىن تىلگە تيەك ەتتى. «2018 جىلدىڭ سوڭىندا جاپونيانىڭ قازاقستانعا قۇيعان تىكەلەي ينۆەستيتسياسىنىڭ كولەمى 1,2 ملرد اقش دوللارىنا جەتكەنىن اتاپ وتۋگە بولادى», دەدى ول.
جانبولات كەنجەعۇل,
«ەگەمەن قازاقستان»
