بيىكتىگى 16 مەتر بولاتىن «ماڭگىلىك ەل» مونۋمەنتى ورناتىلعان ساياباق جاسىل جەلەكپەن كومكەرىلگەن. دەمالىس ورنىنىڭ قۇرىلىسىنا 79 ملن تەڭگە قارجى جۇمسالىپتى. قالا ورتالىعىندا تازا اۋامەن تىنىستاپ, الاڭسىز سەرۋەندەۋگە بولاتىن ساياباقتىڭ جول جيەگىنە جايلى ورىندىقتار مەن اسەم شامدار ورناتىلعان. «قۇرمەتتى ازاماتتار» اللەياسى دا قالا تۇرعىندارىنىڭ كوز قۋانىشىنا اينالدى. اۋداننىڭ دامۋىنا ولشەۋسىز ۇلەس قوسقان ارىس قالاسىنىڭ قۇرمەتتى ازاماتتارىنىڭ ەسىمدەرى تاسقا قاشاپ جازىلعان اللەيا قۇرىلىسىنا 47 ملن تەڭگە جۇمسالعان.
جالپى 16 جەلتوقساندا ارىس قالاسىندا 16 نىسان ەل يگىلىگىنە پايدالانۋعا بەرىلدى. ەلباسىنىڭ «جايلىلىق دەگەنىمىز-ەڭ الدىمەن تۇرعىن ءۇيدىڭ قولجەتىمدىلىگى, اۋلانىڭ ادەمىلىگى مەن قاۋىپسىزدىگى, تىرشىلىككە جانە جۇمىس ىستەۋگە قولايلى ەلدى مەكەننىڭ جانە ساپالى ينفراقۇرىلىمنىڭ بولۋى», - دەگەن ءسوزىن باسشىلىققا العان ارىس قالاسىنىڭ اكىمدىگى تۇرعىندار ءۇشىن بارلىق جاعداي جاسالعان ۇيلەردى ەل يگىلىگىنە بەردى. «نۇرلى جەر» باعدارلاماسى اياسىندا قالاداعى «كوكتەم» شاعىناۋدانىنان بوي كوتەرگەن 3 تۇرعىن ءۇيدىڭ, ياعني 36 پاتەردىڭ كىلتى باسپاناعا مۇقتاج, ءۇي كەزەگىندە تۇرعان وتباسىلارعا تابىس ەتىلدى. سونداي-اق مەرەكە كۇنى بالالاردىڭ بوس ۋاقىتتارىن ءتيىمدى پايدالانىپ, سپورتپەن شۇعىلدانۋىنا بارلىق جاعداي جاسالعان سپورت الاڭشالارى اشىلدى.
عالىمجان ەلشىباي,
«ەگەمەن قازاقستان»
تۇركىستان وبلىسى
