ەلىمىزدىڭ ۇلىق مەرەكەلەرىنىڭ ءبىرى – تاۋەلسىزدىك كۇنىنە ارنالعان سالتاناتتى شارا مەملەكەتتىك تۋدى سالتاناتپەن اكەلۋدەن جانە انۇرانمەن باستالدى.
–تاۋەلسىزدىك العان شيرەك عاسىردان استام ۋاقىت ىشىندە قازاقستان كەلەشەگى كەمەل, بولاشاعى بەكەم, قۋاتتى مەملەكەت قۇردى,–دەدى وبلىس اكىمى.
مۇنان سوڭ مەملەكەت باسشىسى ن.نازارباەۆتىڭ « ۇلى دالانىڭ جەتى قىرى» ماقالاسىندا ايتىلعانىنداي وتكەن تاريحتى بىلمەي, بولاشاققا باعدار ۇستانۋدىڭ قيىندىعىن ايتىپ, ماقتانىش ەتەر تاريحي جەتىستىكتەرىمىزدى ناسيحاتتاۋدىڭ ءجونى بولەك ەكەندىگىن تىلگە تيەك ەتتى.
تاۋەلسىز مەملەكەتىمىزدە العاشقى قورعانىس ءمينيسترى بولىپ ءبىزدىڭ جەرلەسىمىز, ارميا گەنەرالى ساعادات نۇرماعامبەتوۆتىڭ قىزمەت اتقارۋى اقمولالىقتار ءۇشىن زور ماقتانىش. اقمولا وبلىسىنىڭ تاۋەلسىز ەلدىڭ دامۋىنا قوسىپ وتىرعان ۇلەسى دە ايتا قالارلىقتاي. بيىلعى جىلدىڭ وزىندە توعىز مىڭعا جۋىق جاڭا جۇمىس ورىندارى اشىلدى, كوپتەگەن ءىرى ينۆەستيتسيالىق جوبالار ىسكە قوسىلۋدا. ەلىمىزدىڭ ءىرى, ىرگەلى ءوندىرىس ورنى ساناتىنداعى – «كوكشەتاۋ-التىنتاۋ», «ستەپنوگورسك پودشيپنيك زاۋىتى», «كوكشەتاۋ مينەرالدى سۋلارى» ءتارىزدى كاسىپورىندار ءوندىرىس كولەمىن ارتتىرىپ, سالانى دامىتۋعا ايرىقشا ۇلەس قوسۋدا.
–بيىل اقمولالىق ديقاندار 5,6 ميلليون توننا استىقتى قامباعا قۇيىپ, گەكتار بەرەكەسىن 13 تسەنتنەرگە جەتكىزدى,–دەدى وبلىس باسشىسى,–جىل سوڭىنا دەيىن وبلىستا بەس مىڭ پاتەرگە پايدالانۋعا بەرىلەتىن بولادى. وبلىس ورتالىعىندا 900 ورىندىق ءىت مەكتەپ-ليتسەيى اشىلدى. الداعى جىلدارى ءۇش مىڭ ورىندىق جاتاقحانا سالىنباقشى. وسىنىڭ بارلىعى ەل تاۋەلسىزدىگىنىڭ ارقاسىندا.
مۇنان سوڭ وبلىس اكىمى ەڭبەكتە ەرەكشە كوزگە تۇسكەن ءبىر توپ اقمولالىقتارعا مەملەكەتتىك ناگرادالار تاپسىردى. سالتاناتتى شارانىڭ سوڭى مەرەكەلىك كونتسەرتكە ۇلاستى. تاۋەلسىزدىككە ارنالعان سالتاناتتى جيىندار وبلىستىڭ بارلىق قالالارى مەن اۋدان ورتالىقتارىندا بولىپ ءوتتى.
بايقال ءبايادىل,
«ەگەمەن قازاقستان»
اقمولا وبلىسى
