مەنىڭ ەلىم – قازاقستان! قانداي مارتەبەلى, كەۋدەڭدە ماقتانىش پەن ورەلىك وتىن لاۋلاتار قاسيەتتى ۇعىم. بۇگىندە قازاق ەلى جەر-جاھانعا تاتۋلىق پەن بەرەكەنىڭ, بەيبىتشىلىكتىڭ ورداسى رەتىندە تانىلدى. ال مۇنداي زور مارتەبەگە يە بولۋ جولىندا اتا-بابالارىمىز جان اياماي كۇرەسىپ, ۇلى دالانى كەيىنگى ۇرپاعىنا ۇلى مۇرا ەتىپ قالدىردى.
ەۋرازيا كەڭىستىگىندە ورنالاسقان قازاقستان بۇگىندە مەملەكەت باسشىسىنىڭ سارابدال ساياساتىنىڭ ارقاسىندا بەيبىتشىلىك پەن تۇراقتىلىقتى تۋ ەتكەن, الەمنىڭ قانداي ەلىمەن بولسىن ەكونوميكالىق-ساياسي سەرىكتەس رەتىندە ءوزىنىڭ ورنىن مىعىمداپ, قانداي جاعدايدا دا تەرەزەسىن تەڭ ۇستاي الاتىن دارەجەگە جەتتى.
ەلىمىزدىڭ كەلەشەگى جولىندا ىسكە اسىپ جاتقان الەۋمەتتىك-ەكونوميكالىق باعدارلار ۇلى دالانى ءالى دە جاڭا قىرىنان, زور جەتىستىكتەر ۇدەسىنەن تانىتاتىندىعىنا سەنىم زور.
وسى تۇستا مىنا ءبىر تاريحي دەرەك كوڭىلگە ورالادى. «ابىلاي حان دۇنيەدەن وزار الدىندا بۇقار جىراۋمەن قوشتاسىپ: – قانشا جىل ءومىر ءسۇرىپ, جاساعانىمنان نە پايدا, قازاقتىڭ ارقاسىن تامعا, اۋزىن نانعا سۇيەگەنىم جوق, بۇل – ءبىر. اقبوزاتتىڭ قۇنىن ەر قۇنىنا تەڭەگەنىم جوق, ەكى.
مىلتىعىمنىڭ قۇنىن ەكى ەردىڭ قۇنى دەگىزگەنىم جوق, ۇستا مەن ەتىكشىنىڭ قۇنىن جارتى قۇن دەگىزىپ كەسىم كەستىرگەنىم جوق, مۇنىم ءۇش. وسى ءۇش ارمانىم بويىمدا كەتتى», دەگەن ەكەن. ابىلاي حاننىڭ وسى ءۇش ارمانىنىڭ ار جاعىندا ۇلكەن تۇجىرىم جاتىر. بۇل ونىڭ قازاقتىڭ باسىن بىرىكتىرسەم, ياعني «ماڭگىلىك ەل» ەتسەم دەگەنىن, ەل بولاشاعىن تەرەڭنەن ويلاعانىن بىلدىرەدى ەمەس پە؟.. بابالارىمىزدىڭ وتكەن جولىنا زەر سالىپ قاراپ وتىرساق, سوناۋ وتكەن زاماندا ارمان بولعان تاۋەلسىز ەل, ماڭگىلىك ەل بولۋ بۇگىندە پرەزيدەنتتىڭ العا قويعان يگى باستامالارىندا جارقىن كورىنىس بەرىپ وتىر. پرەزيدەنت اتاپ وتكەنىندەي, «ماڭگىلىك ەل» – قازاق ەلىنىڭ ۇلتتىق يدەياسى.
وسى جولدا ەلىمىزدىڭ الداعى جارقىن بولاشاعىن ايقىنداپ بەرگەن «قازاقستان-2050» ستراتەگيالىق باس قۇجاتى ءبىلىم, دەنساۋلىق, ەكونوميكا, ت.ب. سالالارداعى الار اسۋلارىمىزدىڭ باعدارشامى ىسپەتتى. الدىمىزدا الەمنىڭ وزىق 30 مەملەكەتىنىڭ قاتارىنا قوسىلۋ مىندەتى تۇر. «ىرىس – ىنتىماققا جولىعادى, داۋلەت – بىرلىكپەن تولىعادى» دەگەن حالقىمىزدىڭ دانالىعىن ەسكە الاتىن بولساق, « ۇلى دالانىڭ جەتى قىرىن» ەل الدىندا ناقتىلاپ ايتىپ بەرگەن مەملەكەت باسشىسىنىڭ الدىندا ءالى دە حالقىن بيىكتەرگە جەتەلەيتىن ۇلى مۇرات جاتىر. «قۋانا بىلگەنگە – قۇت قونادى, باعالاي بىلگەنگە – باق قونادى» دەيدى حالىق ءتامسىلى. قازاقستان بۇگىندە قىدىر دارىپ, باق قونعان, ىرىس جايلاعان ەلگە اينالدى!
تۇسىنە بىلگەن ادامعا تاۋەلسىزدىك – اسىل ۇعىم, ۇلى مۇرات. تاۋەلسىزدىك – حالىقتىڭ باقىتى. پرەزيدەنت اتاپ وتكەنىندەي, ەلىڭنىڭ ۇلى بولساڭ, ەلىڭە جانىڭ اشىسا, ازاماتتىق نامىسىڭ بولسا, قازاق مەملەكەتىنىڭ نىعايىپ, كوركەيۋى جولىندا جان تەرىڭدى سىعىپ ءجۇرىپ ەڭبەك ەت. جەردىڭ دە, ەلدىڭ دە يەسى ءوزىڭ ەكەنىڭدى ۇمىتپا!
ۇلى دالا – قازاقتىڭ مەكەنى, ەجەلگى قونىسى. ەلىمىز ولشەۋسىز تابيعات بايلىعىمەن عانا ەمەس, كوپتەگەن ۇلت وكىلدەرىن ءوزىنىڭ باۋىرىنا باسىپ, بەيبىت ءومىر كەشىپ وتىرعان ساليقالى ساياساتى بار دارا مەملەكەت.
ۇلى دالا مۇراتتارى ۇلتتىق رۋحىمىزدى بەكەمدەپ قانا قويماي, ۇلتتىق داستۇرىمىزبەن, دىنىمىزبەن, تىلىمىزبەن, رۋحاني بايلىعىمىزدىڭ قۋاتتىلىعىمەن جاھاندانۋ داۋىرىندە ءوز بيىگىنە باستايدى. 2025 جىلعا دەيىن لاتىن قارپىنە كوشەمىز دەگەن ماقسات-مىندەتتەرىمىز رۋحاني كەمەلدەنىپ, ۇلتتىق رۋحىمىزدىڭ اسقاقتاۋىنا ىقپال ەتەتىن ماڭىزدى قادام. مەملەكەتتىڭ وركەنيەتتى شەشىمى قازاق ۇلتىنىڭ ۇلتتىق ساناسىن بەكەمدەپ, الەم حالىقتارىمەن رۋحاني كوكجيەگىن كەڭەيتىپ, عاسىرلار قويناۋىندا جاتقان ءارى عاسىردان-عاسىرعا جالعاسىن تاباتىن مول مۇرامىزدى پاش ەتۋگە باستايدى.
ۇلى دالا ۇرپاعىن ۇلى مۇراتتارعا جەتەلەيتىن ۇلتتىق مۇددە. ولاي بولسا, مەملەكەت باسشىسى العا قويىپ وتىرعان ۇلى دالانىڭ ماڭىزدى ماقساتتارىنا قادام باسقان كەزەڭدە ۇرپاعىمىزدىڭ كەمەل كەلەشەگى جولىندا ۇلتتىق مۇددەنى باستى ۇستانىم ەتە وتىرىپ ايانباي ەڭبەك ەتۋگە ءتيىسپىز.
ارعىماق اتقا قامشى سالعانداي, ەندىگى كەزەكتە سوزدەن ىسكە كوشەتىن, بيىك اسۋلارعا جەتەتىن ءسات تۋدى. ىرگەسى مىعىم, بەيبىت قازاق دالاسى ەلباسىنىڭ كورەگەندى ساياساتىنىڭ ارقاسىندا ءالى دە بيىك مەجەلەرگە جەتەتىندىگىنە سەنىم مول.
جاسان زەكەي ۇلى,
مەديتسينا عىلىمدارىنىڭ دوكتورى, دەنساۋلىق ساقتاۋ ءىسىنىڭ ۇزدىگى
