شارانى دۇنيەجۇزى قازاقتارى قاۋىمداستىعى (دقق) توراعاسىنىڭ ءبىرىنشى ورىنباسارى زاۋىتبەك تۇرىسبەكوۆ اشىپ بەرەدى. شەتەلدىك وتانداستارعا ارنايتىن العىسوزىندە ول تاريحي وتاننىڭ قازىرگى جاعدايى, الەۋمەتتىك-ەكونوميكالىق جانە قوعامدىق-ساياسي دامۋىنداعى جەتىستىكتەرى تۋرالى ايتىپ, دقق مەن «وتانداستار» قورىنىڭ بىرلەسكەن قىزمەتى جايىندا اقپارات بەرەدى. وتكەن جىلى ەلباسى تاپسىرماسىمەن قۇرىلعان «وتانداستار» قورىنىڭ ماقسات-مىندەتتەرى تۋرالى قوردىڭ ۆيتسە-پرەزيدەنتى تالعات ادۋوۆ ايتادى. ول مەملەكەت باسشىسىنىڭ «رۋحاني جاڭعىرۋ» باعدارلامالىق ماقالاسىندا ايتىلعان ۇلتتىق بىرەگەيلىكتى ساقتاۋعا باعىتتالعان قوردىڭ جوسپارلى جوبالارىنا ەرەكشە توقتالىپ وتەدى.
«قاسيەتتى قازاقستان» عىلىمي-زەرتتەۋ ورتالىعى ديرەكتورىنىڭ ورىنباسارى باتىرحان جۇماباەۆ ءوز بايانداماسىندا رۋحاني قۇندىلىقتاردى ساقتاۋدىڭ, قاسيەتتى تاريحي جەرلەردى زەرتتەۋ مەن ناسيحاتتاۋدىڭ, قازاقستاننىڭ مادەني-تۋريستىك كلاستەرلەرىن دامىتۋدىڭ ماڭىزدىلىعى تۋراسىندا ءسوز قوزعايدى. مەملەكەتتىك ءتىلدى دامىتۋ قورىنىڭ ديرەكتورى ازات شاۋەەۆ وتانداستاردى ءوزى باسقارىپ وتىرعان قوردىڭ جوبالارىمەن تانىستىرىپ, قازاق ءتىلىن مەڭگەرۋگە ارنالعان قولجەتىمدى تەگىن ءموبيلدى قوسىمشالار, ونلاين-كۋرستار جانە ينتەرنەت-رەسۋرستار تۋرالى تولىق ايتىپ بەرەدى.
قۇرىلتايدا رەسەيدەگى قازاق دياسپوراسىنىڭ انا تىلىندە ءبىلىم الۋى, مادەني-رۋحاني مۇرالاردى زەرتتەۋى جانە ىسكەرلىك دامۋى تۇرعىسىندا قولداۋ كورسەتەتىن جوبالاردى ىسكە اسىرۋدىڭ نەگىزگى باعىتتارىن تالقىلاۋ جوسپارلانىپ وتىر. شارا قازاقستاندىق ارتىستەردىڭ قاتىسۋىمەن وتەتىن گالا-كونتسەرتپەن اياقتالادى.
رەسەيدەگى قازاقتاردىڭ سانى شامامەن 1 ميلليون ادامدى قۇرايدى. كوپشىلىگى قازاقستانمەن شەكارالاس ايماقتاردا تۇرادى. ەڭ ءىرى قازاق دياسپورالارى استراحان, ورىنبور, ومسك جانە ساراتوۆ وبلىستارىندا ورنالاسقان. رەسەي حالىق ساناعى بويىنشا قازاقتار تاتار, باشقۇرت, شۋاس سىندى تۇركى ەتنوستارىنان كەيىن ءتورتىنشى جانە رەسەيدىڭ جالپى ەتنوستارى ىشىندە ونىنشى بولىپ تۇر.
شەتەلدە تۇراتىن قازاقتاردىڭ كىشى قۇرىلتايلارى جىل سايىن قازاقستاننىڭ قوعامدىق دامۋ مينيسترلىگى قولداۋىمەن وتكىزىلەدى. شارا قازاق دياسپورالارىنىڭ ءتول مادەنيەتىن, داستۇرلەرى مەن ادەت-عۇرىپتارىن ساقتاپ قالۋىنا باعىتتالعان.
