وسى جارىستىڭ باستى باسەكەلەرىنىڭ بىرىندە «ساق» دەگەن بۇركەنشىك ەسىممەن تانىلعان اسىلجان باقىتجان ۇلى ايقاس الاڭىنا شىعادى. 93 كيلو سالماقتا كۇش سىناسىپ جۇرگەن قازاقتىڭ نار تۇلعالى ازاماتى بۇل كۇندەرى ايشىقتى ونەرىمەن كوزگە ءتۇسىپ ءجۇر. وسى كۇنگە دەيىن 8 كەزدەسۋ وتكىزگەن ول جەتى رەت جەڭىسكە جەتتى. تەك بيىلعى جىلدىڭ مامىر ايىندا ماسكەۋدە وتكەن اۆس تۋرنيرىندە قانداسىمىز رەسەيلىك ءمۇسىلىم ماگومەدوۆتان ۇتىلدى.
كۇنى كەشە اسىلجاننىڭ تالدىقورعانداعى تۋرنيردە كىممەن ايقاساتىنى بەلگىلى بولدى. قازاق جىگىتىنىڭ قارسىلاسى – اميلكار الۆەش. برازيليانىڭ سپورتشىسى وسى كۇنگە دەيىن وكتاگوندا 29 رەت ونەر كورسەتىپ, 13 باسەكەنى ءوز پايداسىنا شەشتى. كەزىندە الۆەش الەمدەگى ەڭ بەلدى ۇيىم – UFC-دە باق سىناعان.
عالىم سۇلەيمەن,
«ەگەمەن قازاقستان»
