جيىنعا پارلامەنت سەناتىنىڭ سپيكەرى قاسىم-جومارت توقاەۆ, مادەنيەت جانە سپورت ءمينيسترى ارىستانبەك مۇحامەدي ۇلى, مەملەكەت جانە قوعام قايراتكەرى مىرزاتاي جولداسبەكوۆ, ءابىش كەكىلباي ۇلىنىڭ جۇبايى كلارا جۇمابايقىزى, زيالى قاۋىم وكىلدەرى, اقىن-جازۋشىلار قاتىستى.
ايتۋلى شارادا العاشقى بولىپ ءسوز العان قاسىم-جومارت كەمەل ۇلى ۇلت رۋحانياتىنا ولشەۋسىز ۇلەس قوسقان ءابىش كەكىلباي ۇلىنىڭ ەسىمى قانداي قۇرمەتكە دە لايىق ەكەنىن ايتتى. «كوسەمسوز شەبەرىنىڭ شىعارماشىلىعى بويىنشا تەرەڭ زەرتتەۋلەر جۇرگىزۋ – كەلەشەك بۋىن عالىمدارىنىڭ الدىنداعى ماڭىزدى مىندەت بولۋى ءتيىس. سەبەبى ءابىش كەكىلباي ۇلىنىڭ ويلارى, فيلوسوفياسى جانە جالپى رۋحاني الەمى مۇحيتتاي تەرەڭ. ءابىش كەكىلباي ۇلىنىڭ ادەبي الەمى شەكسىز دۇنيە, كوپقىرلى, ماعىنالى مۇرا. ءبىلىمىنىڭ كوكجيەگى شەكسىز, بىرەگەي تۇلعا, ءارى جازۋشى, ءارى ادەبيەتتانۋشى, عالىم, تاريحشى, ويشىل, فيلوسوف قانا ەمەس, مەملەكەتىمىزدىڭ دامۋىنا ەلەۋلى ەڭبەك سىڭىرگەن كورنەكتى مەملەكەت قايراتكەرى. بۇل – ۇلى جازۋشىلاردىڭ اراسىندا وتە سيرەك كەزدەسەتىن قۇبىلىس», – دەدى.
تاۋەلسىزدىكتىڭ ەلەڭ-الاڭ شاقتارىندا ەلباسىنىڭ سەنىمدى سەرىگى بولعان ءابىش كەكىلباي ۇلىنىڭ تۋىندىلارىنىڭ يدەيالارى «رۋحاني جاڭعىرۋ» فيلوسوفياسىنىڭ نەگىزدەرىمەن ۇندەسىپ جاتقانىنا ەرەكشە نازار اۋدارعان قاسىم-جومارت توقاەۆ: «پرەزيدەنتتىڭ « ۇلى دالانىڭ جەتى قىرى» يدەولوگياسى – ءتۇپتىڭ تۇبىندە قازاق زيالى قاۋىمىنىڭ, جالپى حالقىمىزدىڭ اسىل ارمانىنىڭ كورىنىسى. بۇگىندە ءبۇتىن حالقىمىز ۇلتتىق يدەيانى جاڭعىرتۋ جولىنا بەت بۇردى. وسىلايشا, ءابىش اعامىزدىڭ ارمانى ىسكە اسۋدا. مارجان ءسوزدىڭ شەبەرى, گۋمانيست-عالىم, ۇلتجاندى ساياساتكەر ءابىش كەكىلباەۆتىڭ شىعارماشىلىعىن, ونىڭ جالپى مۇراسىن ءوسىپ كەلە جاتقان ۇرپاق اراسىندا كەڭىنەن دارىپتەۋ ءبىزدىڭ ءبىرىنشى كەزەكتەگى ماقساتىمىز بولۋى ءتيىس. وسى باعىتتا كەكىلباەۆتانۋ ادەبيەتتانۋ عىلىمىنداعى نەگىزگى پاندەردىڭ ءبىرى بولىپ قالىپتاسۋى قاجەت. ءبىز قوعام رەتىندە ءتيىستى ارەكەت جاساپ, بۇل جۇمىستى باقىلاۋعا الۋىمىز كەرەك» دەپ ءسوزىن تۇيىندەدى.
تاۋەلسىزدىكتى نىعايتۋ ىسىنە ءابىش كەكىلباي ۇلىمەن قاتار ءجۇرىپ ۇلەس قوسقان ءماجىلىس دەپۋتاتى قۋانىش سۇلتانوۆ, مەملەكەت جانە قوعام قايراتكەرى مىرزاتاي جولداسبەكوۆ جازۋشى تۋرالى ەستەلىكتەرىن ايتىپ, ءابىش الەمىنىڭ ەرەكشە جارقىراعان قىرلارىنا توقتالدى. «شىن مانىندە كەكىلباەۆتانۋ عىلىمى قالىپتاسۋى كەرەك. ءابىش كەكىلباي ۇلى ەسىمى بولاشاق ۇرپاق جادىندا ماڭگى ساقتالادى. ءابىش تۋرالى ءالى تالاي فيلمدەر ءتۇسىرىلىپ, كىتاپتار جازىلادى. «مەنىڭ باسىمنان باق تايسا دا, ەلىمنىڭ باسىنان باق تايماسىن» دەگەن كەمەڭگەردىڭ ءومىرى ءار قازاققا ۇلگى», دەدى مىرزاتاي جولداسبەكوۆ.
ءىس-شارا اياسىندا ءا.كەكىلباي ۇلى تۇرعان ءۇيدىڭ قابىرعاسىنا ەسكەرتكىش تاقتا ورناتىلىپ, جازۋشى اتىنداعى جاڭا وقۋ زالى تانىستىرىلدى.
ءا.كەكىلباي ۇلى كىتاپحاناسى ەڭ باي كىتاپحانالاردىڭ ءبىرى بولىپ سانالادى. ءابىش كەكىلباي ۇلى اتىنداعى وقۋ زالىنىڭ قورى جازۋشىنىڭ كىتاپحانا كوللەكتسياسىنان ىرىكتەلگەن جەكە كىتاپحاناسىنىڭ كاتالوگى بويىنشا مىناداي ادەبيەتتەردى ۇسىنادى: بۇل – ادامزات تاريحىنا ارنالعان مادەنيەت جانە ونەر تاريحى تۋرالى باسىلىمدار, الەمنىڭ ۇلى تۇلعالارى تۋرالى كىتاپتار, قازاقستاننىڭ اقىندارى مەن جازۋشىلارىنىڭ كىتاپتارى, البومدار مەن اتلاستار, قازاقستاننىڭ گەوگرافياسى مەن تاريحى جانە ماڭعىستاۋ الماناحتارى مەن كوپتەگەن قىزىقتى باسىلىمدار.
كوللەكتسيادا بارلىعى 6019 جادىگەر ۇسىنىلعان. ونىڭ ىشىندە 5 883-ءى كىتاپ, CD جانە DVD ديسكىلەرىندەگى بەينەفيلمدەر مەن اۋديو كىتاپتار 134 دانا جانە
2 بيبليوگرافيالىق بروشيۋرا بار.
قازىرگى تاڭدا وقىرمانداردىڭ سۇرانىسى بويىنشا جازۋشىنىڭ «اڭىزدىڭ اقىرى» شىعارماسى فرانتسۋز جانە قىتاي تىلدەرىنە اۋدارىلىپ جاتىر.
ءابىش كەكىلباي ۇلىنىڭ الاپاسى زور ەسىمى قازاق حالقىنىڭ تاريحىندا ايتۋلى ورىنعا يە. ونىڭ قاجىر-قايراتى, پاراسات پايىمى, قالدىرعان شىعارماشىلىق مۇراسى ءالى تالاي ۇرپاقتىڭ رۋحاني ازىعى بولادى.
كەلەر جىلى تۋعانىنا سەكسەن جىل تولاتىن جازۋشىنىڭ مەرەيتويى وسى شارامەن-اق باستالىپ كەتكەندەي. ءبىر جاعى جاستار جىلىمەن دە تۇسپا-تۇس كەلەتىنى عانيبەت بولىپ تۇر. كەكىلباي ۇلى مۇراسىنان الار تاعىلىم مول.
باعاشار تۇرسىنباي ۇلى,
«ەگەمەن قازاقستان»
